1. (a) Ana Mlungu ŵampele Adamu masengo gatuli? (b) Ana ŵandu ŵa Mlungu aŵele ali mkukamulicisya masengo catuli mtuka wa ciŵeceto kutandila ndaŵi jelejo?

YEHOFA MLUNGU ŵapele ŵandu mtuka wa ciŵeceto. Mu mgunda wa Edeni, Mlungu ŵampele Adamu masengo gakupeleka mena kwa yinyama yosope. Adamu ŵapelece lina lyakuŵajilwa kwa cinyama cilicose. (Gen. 2:19, 20) Kutandila ndaŵi jelejo, ŵandu ŵa Mlungu aŵele ali mkukamulicisya masengo mtuka wa ciŵeceto pakumlumba Mlungu soni pakwasalila ŵane ya jwalakwe. Pacangakaŵapa, ŵandu ŵa Mlungu akamulicisye masengo mtukawu pakugopolela Baibulo kuti ŵandu ŵajinji alijiganye yakwamba Yehofa.

2. (a) Ana komiti jagopolela Baibulo ja cilambo casambano jakuyisye yindu yitatu yapi pamasengo gakwe? (b) Ana mu ngani ajino citulole cici?

² Pana Mabaibulo gejinji, nambo gane gakusasala maloŵe ga Mlungu mwakamulana ni muyaŵelele yakulemba yandanda kulekangana ni gane. M’yaka ya m’ma 1940, komiti jagopolela Baibulo ja cilambo casambano jakuyisye yindu yitatu pakusaka kugopolela Baibulo mwakamulana ni yakulemba yandanda. Yindu yakwe yili, (1) Kucimbicisya lina lya Mlungu mwakuliwucisya pamalo pakwe palikusosecela. (Aŵalanje Matayo 6:9.)  (2) Kugopolela maloŵe gakusaliligwa ni Yehofa liloŵe ni liloŵe payikukomboleka, nambo pangayikukomboleka kugopolela nganisyo syakwe. (3) Kamulicisya masengo ciŵeceto cangasawusya kuŵalanga soni kucipikanicisya. * (Aŵalanje Nehemiya 8:8, 12.) Kwende tulole mwele yindu yitatuyi ŵayikuyiye paŵalinganyagasoni Baibulo ja cilambo casambano ja mu 2013, soni paŵagopolelaga Mabaibulo ga yiŵeceto yine.

3, 4. (a) Ana yilembo mcece yakwimila lina lya Mlungu yasimanikwaga m’mipukutu japi? (b) Ana Mabaibulo gane gatesile yatuli ni lina lya Mlungu?

³ Ŵandu ŵaŵalijiganyisye mipukutu jacihebeli jandanda, mpela mipukutu ja ku Nyasa Jewe, ŵasimene kuti mukusasimanikwa yilembo m’cece yakwimila lina lya Mlungu m’malo gejinji. Lina lya Mlungu lyasimanikwagasoni m’Baibulo jacigiliki jakolanjikwa Septuagint kutandila mu 200  B.C.E mpaka mu 100 C.E. Ŵandu ŵajinji akusasimonga kulola kuti lina lya Mlungu lyasimanikwaga m’malo gejinji m’mipukutu jakala.

⁴ Atamose kuti pana umboni wakuwoneka cenene wakulosya kuti lina lya Mlungu likusosekwa kusimanikwa m’Baibulo, nambo m’Mabaibulo gejinji ŵatyosisyemo lina lya Mlungu. Mwambone, panyuma pa yaka yiŵili Baibulo ja Cilambo Casambano ja Malemba Gacigiliki jili jikopwece, kwakopwece Baibulo ja American Standard Version jelinganyesoni. M’Baibulo jajakopwece mu 1901 ŵakamulicisye masengo lina lya Mlungu, nambo m’Baibulo jelinganyesoniji jajakopwece mu 1952 nganakamulicisya masengo lina lya Mlungu. Ligongo cici? Ŵakugopolela ŵakwe ŵaganisyaga kuti kamulicisya masengo lina lya Mlungu “kuli kwangaŵajilwa.” Ŵaŵagopolele Mabaibulo gane, gacisungu soni gayiŵeceto yine ŵatesilesoni yakulandanayo.

5. Ligongo cici lina lya Mlungu likusosekwa kusimanikwa m’Baibulo?

⁵ Ana yana masengo galigose naga ŵagopolela Baibulo akukamulicisya masengo lina lya Mlungu kapena iyayi? Jwagopolela jwambone akusosekwa kumanyilila yakusaka mkulemba soni akusosekwa kuyikuya pakugopolela. Malemba gejinji ga m’Baibulo gakusalosya kuti lina lya Mlungu lili lyakusosekwa mnope soni kuti tukusosekwa kulicimbicisya. (Eks. 3:15; Sal. 83:18; 148:13; Yes. 42:8; 43:10; Yoh. 17:6, 26; Mase. 15:14) Yehofa Mlungu jwali Mkulemba jwa Baibulo, ŵasalile ŵandu ŵaŵalembile Baibulo kuti akamulicisye masengo lina lyakwe. (Aŵalanje Ezekieli 38:23.) M’yoyo kutyosya lina lya Mlungu lyalikusasimanikwa maulendo gejinji m’mipukutu jakala kuli kungamcimbicisya Mkulemba jwakwe.

6. Ligongo cici m’Baibulo jacisungu ja cilambo casambano jelinganyesoni mwana malo gane 6 gajonjecesye lina lya Mlungu?

⁶ Apano, panasoni umboni wine wakulosya kuti lina lya Mlungu likusosekwa kusimanikwa m’Baibulo. M’Baibulo jacisungu ja cilambo casambano ja 2013, linali likusimanikwa maulendo 7,216. Baibuloji jikulekangana panandi ni jajakopwece mu 1984, ligongo ajonjecesye lina lya Mlungu m’malo gane 6. Malo msano gakusimanikwa pa 1 Samueli 2:25; 6:3; 10:26; 23:14, 16. Ŵajonjecesye linali pamaloga ligongo lyakuti likusasimanikwa pa malembaga m’mipukutu ja ku Nyasa Jewe, jajili jakala mnope kupunda mipukutu jaŵalembile Amasoleti. Pa Lilemba lya Oweruza 19:18 ŵajonjecesyeposoni lina lya Mlungu panyuma pakuwungunyasoni m’mipukutu jakala.

7, 8. Ana lina lyakuti Yehofa likusagopolela cici?

 ⁷ Lina lya Yehofa lili lyakusosekwa mnope kwa Aklistu ŵasyesyene. Yakonjecesya ya m’Baibulo jacisungu ja cilambo casambano ja 2013 yikusala yejinji panganiji. Komiti jagopolela Baibulo ja cilambo casambano japatile kuti lina lya Yehofa lyalikusatyocela ku maloŵe gacihebeli gakuti ha·wah, likugopolela “Akusatendekasyaga.” * Munyumamu, mabuku getu gasalaga kugopolela kwa lina lya Mlungu pakamulicisya masengo lilemba lya Eksodo 3:14 lyalikusati, “Cinjiŵa Jwacinjisaka Kuŵa.” Baibulo jajakopwece mu 1984 jasasile kuti Yehofa “akusalitendekasya kuŵa cilicose casagwile kuti akwanilisye yaŵalagucisye.” * Nambo, Baibulo jajakopwece mu 2013 jasasile kuti, “Yili yisyene kuti lina lya Yehofa likusagopolela yeleyi, nambope ngalikusagopolelape yakusasagula msyenejo kuŵa. Likusapwatikaposoni kutendekasya yakupanganyikwa yakwe kuŵa cilicose cakusaka kuti akwanilisye lisosa lyakwe.”

⁸ Yehofa akusayitendekasya yakupanganyikwa kuŵa cilicose casagwile. Mwakamulana ni gopolela kwa lina lyakwe, Mlungu ŵamtendekasisye Nowa kuŵa jwakutaŵa combo, Besaleli kuŵa jwakumanyilila cenene masengo gapayala, Gideoni kuŵa jwangondo jwamacili, soni Paulo kuŵa ndumetume ku mitundu ja ŵandu. Kusala yisyene, lina lya Mlungu likwete ngopolelo jekulungwa kwa ŵandu ŵakwe. Soni komiti jagopolela Baibulo ja cilambo casambano ngasijicembulusya kusosekwa kwa lina lya Mlungu mwakulityosya m’Baibulo.

9. Ligongo cici Baibulo jikusosekwa kujigopolela m’yiŵeceto yine?

⁹ Mabaibulo ga cilambo casambano gagagopolele m’yiŵeceto yakupunda 130 gakusacimbicisya lina lya Mlungu mwakuliŵika pamalo palikusosecela. (Aŵalanje Malaki 3:16.) Mwakulekangana ni yeleyi, Mabaibulo gane akusatyosyamo lina lya Mlungu ni kamulicisya masengo lina lyakuti “Ambuje” kapena mena gane. Ni ligongo lyakwe Likuga Lyakulongolela likutenda yiliyose yakomboleka kuti ŵandu ŵa yiŵeceto yosope akole Baibulo jajikusacimbicisya lina lya Mlungu.

10, 11. Ana ŵagopolela Baibulo ja cilambo casambano m’yiŵeceto yine ŵasimene ni yakusawusya yatuli?

¹⁰ Kugopolela Baibulo ja cilambo casambano m’yiŵeceto yine kuŵele ni yakusawusya yejinji. Mwambone, pandanda Baibulo jacisungu ja cilambo casambano jakuyisye Mabaibulo gane gacisungu pakamulicisya masengo maloŵe gakuti “Shelo” pa Mlaliki 9:10 soni pa malemba gane. Ŵagopolela Mabaibulo ŵajinji ŵalagaga kugopolela maloŵe gakuti “Shelo” ligongo ŵandu ŵajinji nganagamanyililaga, nganigasimanikwaga m’mabuku gakugopolela maloŵe, soni ŵane ŵaganisyaga kuti gali malo ganegakwe. Paligongo lyeleli, Likuga Lyakulongolela lyajiticisye kuti maloŵe gacihebeli gakuti “Shelo” soni gacigiliki gakulandana nago gakuti “Hade” agopoleleje kuti “Malembe.” Maloŵe gelega gali gakupikanika cenene.

¹¹ M’yiŵeceto yinesoni, papali yakusawusya kugopolela maloŵe gacihebeli gakuti neʹphesh soni gacigiliki gakuti psy·kheʹ gagakusagopolela “msimu”. M’yiŵecetoyi, maloŵe gakuti “msimu” ndaŵi syejinji gakusasala ya cindu cacikusatyoka m’cilu mundu pawile. M’yoyo  kuti aŵambale kwasokonasya ŵandu, Likuga Lyakulongolela lyakundile kuti ŵagopolela agopoleleje maloŵe gakuti “msimu” mwakamulana ni yajikusala ngani. Ngopolelo sya maloŵe gakuti “msimu” sikusimanikwa mu yakonjecesya mu Baibulo ja cilambo casambano jacisungu jakola malifalensi. Yindu yine yakamucisya kupikanicisya maloŵe gacihebeli soni cigiliki akusayiŵika m’maloŵe gamwiŵanda kuti tukalagaga kuŵalanga soni kupikanicisya maloŵe ga m’Baibulo.

12. Ana yindu yapi yaŵayicenjile mu Baibulo jacilambo casambano jelinganyesoni ja 2013?

¹² Yiwusyo yakutyocela kwa ŵagopolela yalosyagasoni kuti nganapikanicisya yindu yine m’Baibulo jacisungu. M’yoyo mu September 2007, Likuga Lyakulongolela lyajiticisye kuti alinganyesoni Baibulo ja cilambo casambano jacisungu. Paŵalinganyagasoni Baibuloji, ŵalolite yiwusyo yejinji yakutyocela kwa ŵagopolela Baibulo. Maloŵe gacisungu gagaliji gacikala ŵagatyosisye ni kuŵika gasambano gakupikanika cenene gagagopolelagasoni yindu yakulandanayo. Kuya yaŵatesile ŵane pakugopolela Mabaibulo m’yiŵeceto yine kwakamucisyesoni kuti alinganye cenene maloŵe gacisungu.—Miy. 27:17.

13. Ana ŵandu akupikana wuli mumtima ligongo lya Baibulo jelinganyesoni jajakopwece mu 2013?

¹³ Ana ŵandu akupikana wuli mumtima ligongo lya Baibulo jelinganyesoniji? Abale ni alongo ŵajinji aŵele ali mkutumisya yikalata yawo yakuyamicila ku likulu lya Mboni sya Yehofa ku Brooklyn. Ŵajinji akupikana mumtima mpela muŵapikanile mlongo jwine juŵalembile kuti, “Baibulo jili mpela libokosi mwamuli yindu yamtengo wapenani. Kuŵalanga maloŵe gakupikanika cenene ga Yehofa mu Baibulo jelinganyesoniji kuli mpela kulola kasalale ka cindu camtengo wapenani cilicose. Malemba gagalembile m’ciŵeceto cangasawusya kupikana gangamucisye kuti nammanyilile cenene Yehofa, jwali mpela mtati jwangumbatile ni kumbalanjilaga maloŵe gakwe gambone.”

14, 15. Ana ŵandu akupikana wuli mumtima ligongo lya kopoka kwa Baibulo ja cilambo casambano m’yiŵeceto yawo?

¹⁴ Ŵandu ŵakusaŵeceta yiŵeceto yine akuyamicilasoni Baibulo ja cilambo casambano. Mwambone, jwamlume jwine jwacikulile jwa mumsinda wa Sofia ku Bulgaria, ŵayamicile Baibulo jacibugaliya jelinganyesoni paŵatite,  “Mbele ndili mkuŵalanga Baibulo kwa yaka yejinji, nambo nganimbalanjeje Baibulo jangasawusya kujipikanicisya soni jakamula mtima mpela jeleji.” Mlongo jwinesoni jwa ku Albania paŵapocele Baibulo ja cilambo casambano jam’ciŵeceto cakwe, ŵatite, “Maloŵe ga Mlungu gakupikanika cenene m’Ciabaniya. Uli upile wekulungwa kupikana Yehofa ali mkuŵeceta nawe m’ciŵeceto cetu.”

¹⁵ M’yilambo yejinji, Mabaibulo gali gakatala soni gakusawusya kugapata. M’yoyo, kwamba kupocela Baibulo peko uli upile wekulungwa. Lipoti lyalyatyocele ku Rwanda lyasasile kuti, “Kwa yaka yejinji, ŵandu ŵajinji ŵele abale ŵalijiganyaga nawo Baibulo nganajawulaga pasogolo ligongo lyakuti nganakola Mabaibulo. Jemanjaji nganakombolaga kusuma Mabaibulo ga dini sine. Nganapikanicisyagasoni gopolela kwa Malemba gane, yayatendekasyaga kuti akajawula pasogolo.” Yindu yacenjile pandaŵi jele Baibulo ja cilambo casambano jakopwece m’ciŵeceto cawo. Liŵasa line lyalyakwete ŵanace ŵacinyamata mcece lyatite, “Tukum’yamicila mnope Yehofa soni kapolo jwakulupicika ni jwalunda ligongo lyakutupa Baibulo. M’weji tuli ŵakulaga soni nganitukola mbiya syakusumila Baibulo ja mundu jwalijose mwiŵasa mwetu. Nambo apano jwalijose akwete Baibulo jakwe. Tukusaŵalanga Baibuloji mpela liŵasa lisiku lililyose pakulosya kum’yamicila Yehofa.”

16, 17. (a) Ana Yehofa akusasaka kuti ŵandu ŵakwe atendeje cici? (b)  Ana tukusosekwa kutenda cici?

¹⁶ Msogolomu, Baibulo ja cilambo casambano jelinganyesoni cijikopoce m’yiŵeceto yejinji. Satana akulingalinga kumasya masengo gelega, nambo tukumanyilila kuti Yehofa akusaka kuti ŵandu ŵakwe wosope apikaneje pakuŵeceta nawo m’ciŵeceto cakupikanika cenene. (Aŵalanje Yesaya 30:21.) Pacangakaŵapa, ‘cilambo capasi cicigumbale ni umanyilisi wa Yehofa mpela mugakusagumbalila mesi m’nyasa.’—Yes. 11:9.

¹⁷ Kwende tukamulicisyeje masengo mtuka uliwose wakutyocela kwa Yehofa, kupwatikapo Baibulo jajikusacimbicisya lina lyakweji. Amkundeje Yehofa kuti aŵeceteje nawo lisiku lililyose kupitila m’Maloŵe gakwe. Jwalakwe akusapikanila mapopelo getu. Kuŵecetana ni Yehofa kucitukamucisya kuti tummanyilile cenene soni kuti tumnonyeleje mnope.—Yoh. 17:3