Mlungu aŵele ali mkuŵecetana ni ŵandu. Jwalakwe ŵakamulicisye masengo msimu wakwe weswela kuŵika nganisyo syakwe m’mitima mwa ŵandu ŵaŵalembile Baibulo. (2 Petulo 1:20, 21) M’yoyo mpaka tumanyilile yisyesyene yakwamba Mlungu mwakuŵalanga Baibulo.—Aŵalanje Yohane 17:17; 2 Timoteo 3:16.

M’Baibulo, Mlungu ŵasasile yejinji yakwamba jwalakwejo. Ŵasasile ligongo lyaŵapanganyile ŵandu, yacacatendela ŵandu, soni yakusasaka kuti tutendeje. (Masengo 17:24-27) Yehofa Mlungu akusasaka kuti tumanyilile yisyesyene yakwamba jwalakwe.—Aŵalanje 1 Timoteo 2:3, 4.

Yehofa ali Mlungu jwa usyesyene, soni ŵamtumisye Mwanagwe, Yesu, kuti ciŵajiganye ŵandu usyesyene. M’yoyo, Yesu akusasangalala ni ŵandu ŵakusanonyela usyesyene. (Yohane 18:37) Mlungu akusasaka kuti ŵandu ŵeleŵa amlambileje.—Aŵalanje Yohane 4:23, 24.

Satana ŵalepelekasisye ŵandu ŵajinji kummanyilila Mlungu mwakuwandisya yijiganyo yaunami yakwamba Mlungu. (2 Akolinto 4:3, 4) Ŵandu ŵangakusanonyela yambone akusajigalika ni yijiganyo yaunamiyi. (Aloma 1:25) Nambo ŵandu mamiliyoni gejinji akumanyilila yisyesyene yakwamba Mlungu mwakulijiganya Baibulo.—Aŵalanje Masengo 17:11.