Mwanace jwine jwamkongwe jwa yaka mcece jwaliweni lyosi lili mkutuka mu yakopocesya lyosi ku fakitale jine. Ligongo lya kutupa kwa lyosilyo, lyawonekaga mpela mawunde. Pambesi pakwe, mwanacejo jwatandite ganisya kuti fakitalejo ni jajikusapanganya mawunde. Ngani ja mwanaceji mpaka jiŵe jakusecesya. Nambo jeleji jili ngani jamwana. Pana ngani sine syekulungwa syatukusasosekwa kusipikanicisya cenene ligongo kulepela kutenda yeleyi umi wetu mpaka uŵe pangosi. Mwambone, naga mundu nganapikanicisya cenene malamusi ga kamwe ka mtela winewakwe mpaka paŵe yakuyicisya yakogoya.

Nambo kulepela kupikanicisya yindu yakwayana ni Mlungu kuli kwakogoya mnope. Mwambone, ŵandu ŵane nganapikanicisyaga yaŵajiganyaga Yesu. (Yohane 6:48-68) Yakuyicisya yakwe, m’malo mwakuti alijiganye yejinji, ŵagambaga kusisya cilicose. Kweleku kwaliji kwasa upile!

Ana akusaŵalanga Baibulo ni cakulinga cakuti jakamucisyeje? Naga yili m’yoyo, akusatenda cenene. Nambo, ana yili yakomboleka ngapikanicisya yineyakwe yaŵalasile? Ŵandu ŵajinji pakwete piyatendecele yeleyi. Kwende tulole maloŵe gane ga m’Baibulo gele ŵandu ŵangagapikanicisya cenene.

• Ŵandu ŵane ŵangalipikanicisya lilamusi lya m’Baibulo lyakuti, “Mumjogopeje Mlungu.” Akusaganisya kuti tukusosekwa kumjogopa mpela cindu cakogoya. (Mlaliki 12:13) Nambo Mlungu jwangasaka kuti ŵandu ŵakusamlambila am’woneje m’yoyo. Jwalakwe akusati, “Mkasimtenda woga, pakuŵa ndili namwe. Mkasimdandawula, pakuŵa ndili Mlungu jwenu. Cinamlimbisye, soni cinamkamucisye.” (Yesaya 41:10) Kumjogopa Mlungu kukusagopolela kumcimbicisya mnope.

• Ŵandu ŵane ŵangalipikanicisya lilemba lyalikusati, “Cilicose cikwete ndaŵi jakwe, . . . ndaŵi jakupagwa soni ndaŵi jakuwa.” Akusaganisya kuti Mlungu jwamlembele jwalijose ndaŵi jacaciwa. (Mlaliki 3:1, 2) Nambope, lilembali likwamba kutagulila yayikusatendekwa paumi wa mundu, kuti akusapagwa kaneko kuwa. Maloŵe ga Mlungu gakusatujiganya kuti yatukusasagula kutenda mpaka yitendekasye kuti tukole umi wejipi kapena welewu. Mwambone, gakusati, “Kumjogopa Yehofa kukusamtendekasya mundu kutama kwa ndaŵi jelewu.” (Miyambo 10:27; Salimo 90:10; Yesaya 55:3) Mwatuli? Naga tukupikanila Maloŵe ga Mlungu tuciŵambala yindu yampaka yijonanje umi mpela kolelwa, soni yamsese.—1 Akolinto 6:9, 10.

• Baibulo pajikuti kwinani ni cilambo ‘ayisunjile kuti cayijoce ni moto,’ ŵandu ŵajinji akusaganisya kuti Mlungu cacicijonanga cilambo cisyesyeneci. (2 Petulo 3:7) Nambo Mlungu jwasasile kuti ngasacijonanga cilambo cisyesyeneci. Jwalakwe “ŵacitamilikasisye cilambo capasi payilimbilimbi yakulimba, ngasicitenganyika mpaka kalakala.” (Salimo 104:5; Yesaya 45:18) Ŵacacajonanga ali ŵandu ŵakusakala pampepe ni yitendo yawo yosope, ngaŵaga cilambo cisyesyeneci. Pacacajonanga, ngasasimanikwasoni, mpela kuti apile ni moto. Kwinani kwakukusala pa 2 Petulo 3:7 kuli kwakuwanicisya ngaŵaga mwipananga, kwinani kwakukusawoneka ndondwa, kapena kwinani kwakusatama Mlungu. Yeleyi ngaŵa mkonasika.

Yisyasyo yatuyiweniyi yikulosya kuti ndaŵi syejinji ŵandu ŵangasipikanicisya ngani syakusaŵalanga m’Baibulo. Nambo ligongo cici Mlungu akusakunda yeleyi kutendekwa? Ŵandu ŵane akusati, ‘Naga Mlungu ali jwalunda mnope soni jwakumanyilila yosope, wuli nganagamba kutupa buku jakuti mundu jwalijose ajipikanicisyeje mwangasawusya?’ Kwende tulole magongo gatatu gagakusatendekasya ŵandu ŵane kuti akasipikanicisyaga ngani syakusaŵalanga m’Baibulo.

1. Baibulo jalembedwe m’litala lyakuti ŵandu ŵakulinandiya soni ŵakusacilila kulijiganya ni ŵampaka ajipikanicisye. Yesu jwasalile Atatigwe  kuti, “Atati, wawo Ambuje ŵakwinani ni cilambo capasi, ngwalumba pameso pa ŵandu wosopeŵa ligongo ayisisile yindu yeleyi kuti ŵandu ŵalunda soni ŵalijiganye mnope akayimanyilila, nambo ayijuwile kwa tuŵanace.” (Luka 10:21) Baibulo jalembedwe m’litala lyakuti ŵandu ŵakusajiŵalanga ni cakulinga cambone awupikanicisyeje utenga wakwe. Ŵandu ŵakulikwesya, mpela mwakusatendela ŵandu ŵajinji “ŵalunda soni ŵalijiganye mnope,” ni ŵele ŵangakusawupikanicisya utenga wa m’Baibulo. Nambo ŵandu ŵakusajiŵalanga ni mtima mpela wa “tuŵanace,” wakulinandiya soni kusacilila kulijiganya yejinji, ni ŵakusakola upile wakupikanicisya Maloŵe ga Mlungu. Pelepatu yikulosya kuti Mlungu jwalembile Baibulo mwalunda mnope.

2. Baibulo ŵalembele ŵandu ŵakusasaka cikamucisyo ca Mlungu kuti ajipikanicisye. Yesu jwalosisye kuti ŵandu cacisosekwa cikamucisyo kuti apikanicisye cenene yaŵajiganyaga. Ana cacipocela catuli cikamucisyoco? Yesu jwatite, “Jwakamucisya, wawuli msimu weswela, wele Atati cacitumisya m’lina lyangu, ucajiganya yindu yosope soni kwakumbusya yosope yinasalile.” (Yohane 14:26) M’yoyo, Mlungu akusakamulicisya masengo msimu wakwe weswela, wawuli macili gakwe, pakwakamucisya ŵandu kupikanicisya yakuŵalanga m’Baibulo. Nambo kwa ŵandu ŵangasaka cikamucisyo ca Mlungu, jwalakwejo jwangakamucisya ni msimu wakwe kuti ajipikanicisyeje Baibulo. Ni ligongo lyakwe kwa jemanjajo Baibulo jikusaŵa jakusawusya kujipikanicisya. Nambosoni msimu weswela ukusiwalimbikasya Aklistu ŵakumanyilila yejinji kuti ŵakamucisye ŵane ŵakusacilila kuti ajipikanicisye Baibulo.—Masengo 8:26-35.

3. Ngani sine sya m’Baibulo ŵandu akusasipikanicisya pandaŵi jasagwile Mlungu. Mwambone, lilayika line lyamsalile jwakulocesya Daniyele kuti alembe yayicitendekwa msogolo. Lyatite, “Daniyele, msunje maloŵega mwamtemela soni m’wugale ni kumata bukuji mpaka ndaŵi ja mbesi.” Kwa yaka yejinji, ŵandu aŵele ali mkuŵalanga buku ja m’Baibulo ja Danieli nambo nganajipikanicisyaga cenene. Atamose Daniyele m’syenejo nganayipikanicisya yine yaŵalembile. Mwakulinandiya, jwatite, “Napikene yiŵasasileyo, nambo yalemile kupikanicisya ngopolelo syakwe.” Nambo, yaliji yakuti ŵandu cacipikanicisya cenene yakulocesya yaŵalembile Daniyele pandaŵi jiŵasagwile Mlungu. Lilayika lila lyasasilesoni kuti, “Mjawule Daniyele, pakuŵa maloŵega cagasunje mwamtemela soni cagamate mpaka ndaŵi jambesi.” Ana ŵani ŵacaciwupikanicisya utenga wa Mlunguwu? “Pangali jwakusakala atamose jumo jucacigapikanicisya maloŵe gelega, nambo ŵandu ŵaumanyilisi ni ŵacacigapikanicisya.” (Danieli 12:4, 8-10) M’yoyo, Mlungu jwangajuwula ngopolelo sya ngani sine sya m’Baibulo mpaka pandaŵi jakuŵajilwa.

Ndaŵi sine Ŵamboni sya Yehofa ŵangasipikanicisya cenene ngani sine sya m’Baibulo ligongo lyakuti nganijiŵa ndaŵi jakwe kuti asipikanicisye. Nambo pajikwanile ndaŵi jakuti Mlungu ŵakamucisye kusipikanicisya cenene akusatenda mwakamulana ni yeleyo. Pakutenda yeleyi akusaŵa ali mkuya cisyasyo ca ŵandumetume ŵa Klistu, ŵaŵacengaga kaganisye kawo naga Yesu ŵakamucisye.—Masengo 1:6, 7.

Ngani ja mwanace jwatumsasile kuti nganapikacisyaga cenene kugakusatyocela mawunde jili ngani jamnono. Nambo, kupikanicisya yajikusasala Baibulo jili ngani jekulungwa mnope kwa wawojo. Ligongo lyakusosekwa kwa utenga wa m’Baibulo, tukwaŵenda kuti apate cikamucisyo kuti awupikanicisyeje cenene. Ŵaŵende ŵandu ŵakusalijiganya Baibulo ni mtima wakulinandiya, ŵakusajegamila msimu weswela kuti ajipikanicisyeje, soni ŵakusamanyilila kuti tukutama mu ndaŵi jele Mlungu ali jwakusacilila kuti tujipikanicisye mnope Baibulo. Aŵecetane ni Ŵamboni sya Yehofa kapena aŵalanje ngani syawo syasili pa webusayiti ja jw.org/yao. Nganisi ŵasiwungunyisye cenene mkanasikoposye. Baibulo jikusatulagusya kuti, “Naga akuŵenda kupikanicisya . . . , cacimmanyilila Mlungu.”—Miyambo 2:3-5.