Ngani ja acalume mcece ŵakwesile mahaci mpaka jasimonjesye soni kwatesya woga, nambo ngatukusosekwa kujiwona mwamti m’yoyo. Ligongo cici? Ligongo lyakuti Baibulo, nambosoni yayikutendekwa masiku agano mpaka yitukamucisye kupikanicisya ngopolelo sya yeleyi. Atamose kuti acalumeŵa akwimila yindu yakusawusya yayikutendekwa pacilambopa, nambo yeleyi yikugopolelasoni ngani syambone kwa wawojo soni liŵasa lyawo. Mwamtuli? Candanda, kwende tulole yakwimila jwamlume jwalijose jwakwesile haci.

Nganiji jikusatanda ni maloŵe gakuti, “Najiweni haci jeswela, juŵakwesile pelepo ŵakwete ukunje m’miyala mwakwe soni ŵampele cisoti. Jwalakwe ŵajawile kukwagomeka acimmagongo ŵakwe ni ŵapundile ngondo jakulimbana nawo.”—Ciunukuko 6:2.

Ana jwakwesile haci jeswelaji ali ŵani? Buku ja ciunukuko mpaka jitukamucisye kumanyilila ya munduju. Bukuji jikulosya kuti mundu jwakwesile haciji ali jwakwinani, nambo akumanyika ni lina lyakuti, “Maloŵe ga Mlungu.” (Ciunukuko 19:11-13) Lina lyakuti Maloŵe lili lya Yesu Klistu, ligongo lyakuti Mlungu akusamkamulicisya masengo mpela jwakum’ŵecetela jwakwe. (Yohane 1:1, 14) Yesu akumanyikasoni ni lina lyakuti, “Mwenye jwa mayimwene ni Ambuje ŵa acambuje” nambosoni lina lyakuti, “Jwakulupicika soni Jwakuwona.” (Ciunukuko 19:16) Yeleyi yikulosya kuti jwalakwe akwete ukumu wakuputa ngondo mpela mwenye, soni jwangakamulicisya masengo macili gakwe mwacinyengo kapena mwangalwe. Nambope mpaka papagwe yiwusyo yine.

Ana ŵani ŵampele Yesu ukumu wakupunda ngondo? (Ciunukuko 6:2) Jwakulocesya Daniyele jwam’weni Mesiya jwaŵawonekaga mpela, “mwanace jwa mundu,” ali mkupocela ulamusi, ucimbicimbi, soni ucimwene,” kutyocela kwa Jwamasiku Gejinji, jwali Yehofa Mlungu. * (Danieli 7:13, 14) M’yoyo, Mlungu Jwamaciligose ni juŵampele Yesu macili soni ukumu wakulamulila, nambosoni kwelusya ŵandu. Haci jeswela jikwimila cenene ngondo ja cilungamo jakuputa Mwanace jwa Mlungu. Ndaŵi syejinji Malemba gakusakamulicisya masengo mtundu weswela pakwimila cilungamo.—Ciunukuko 3:4; 7:9, 13, 14.

Ana acalume mcece ŵakwesile mahaciŵa ŵatandite cakaci kwenda? Jwakwesile haci jandanda ali Yesu. Akumbucile kuti palilemba lila asasile kuti jwalakwe jwatandite kwendesya haciji pandaŵi jaŵapocele cisoti ca umwenye. (Ciunukuko 6:2) Ana Yesu jwaŵele Mwenye jwakwinani cakaci? Ngaŵa kuti pandaŵi jaŵagambile kwimuka ni kwawula kwinani panyuma paciwa cakwe. M’malo mwakwe Baibulo jikusalosya kuti Yesu paŵapite kwinani, japite ndaŵi kuti mpaka apocele umwenye. (Ahebeli 10:12, 13) Yesu ŵasalile ŵakumkuya ŵakwe yimanyilo yayicakamucisya kumanyilila kumala kwa ndaŵi jele ŵajembeceyaga kuti apocele umwenye, soni kutanda kwa kulamulila kwakwe mpela mwenye kwinani. Jwalakwe jwasasile kuti kundanda kwa ulamusi wakwe, yakutendekwa pacilambopa yicisakala mnope. Kuciŵa ngondo, sala, soni yilwele yakulekanganalekangana. (Matayo 24:3, 7; Luka 21:10, 11) Pajawulice Ngondo Jandanda Japacilambo Cosope mu caka ca 1914, yawonecele cenene kuti Yesu apocele umwenye, soni atandite kulamulila kwinani. Pacilambo capasi patandite kutendekwa yindu yakusawusya mnope, Baibulo jikusakolanga ndaŵiji kuti “masiku gakumalisya.”—2 Timoteo 3:1-5.

Nambo ligongo cici yindu pacilambopa ngayikwenda cenene, m’malo mwake yiyice pakusakala mnope kutandila ndaŵi jele Yesu jwaŵele mwenye mu 1914? Ligongo lyakuti Yesu pandaŵiji jwatandite kulamulila kwinani ngaŵa pacilambo capasi. Yesu jwakusamanyikasoni ni lina lyakuti Mikayeli ali atandite kulamulila, kwinani kwapali ngondo, jwalakwe jwamponyisye Satana ni yiŵanda yakwe pacilambo capasi. (Ciunukuko 12:7-9, 12) Satana ali pacilambo capasi pano, soni ligongo lyakuti masiku gakwe gasigele panandi kumala jwalakwe atumbile mnope kupunda ni kalakose. Yeleyi yikulosya kuti pasigele kandaŵi kamnono kuti Mlungu amalane ni Satana pacilambo capasi. (Matayo 6:10) Sano kwende tulole yakwimila acalume ŵatatu ŵakwesile mahaci, soni yeleyi ciyitukamucisye kumanyilila kuti tukutama mu ndaŵi jakusawusya, elo, “masiku gakumalisya.” Mwakulekangana ni jwakwesile haci jandanda jwakwimila mundu jusyesyene, nambo acalume ŵane ŵakwesile mahaci gatatugo akwimila yindu yakusawusya yakusimana nayo ŵandu pacilambo cosope capasi.

“Haci jine jakopocele, jaliji jecejewu mpela moto. Juŵakwesile haciji ŵampele ukumu wakutyosa mtendele pacilambo capasi, kuti ŵandu awulagane, soni ŵampele ci upanga cekulungwa.—Ciunukuko 6:4.

Jwamlume jwakwesile haciji akwimila ngondo. Akaliŵalila kuti palilembapa akusala kuti jwalakwe akutyosya mtendele ngaŵape muyilambo yakuŵalanjika, nambo pacilambo cosope capasi. Kwandaŵi jandanda mu mbili ja ŵandu, pawulice ngondo ja pacilambo cosope mu 1914. Panyuma pa ngondoji, pawulicesoni ngondo jaŵili japacilambo cosope jajawuleje ŵandu ŵajinji kupunda ngondo jandanda. Ŵandu ŵane akusaŵeceta kuti kutandila mu 1914, ŵandu ŵakupunda 100 miliyoni ŵawile ligongo lya ngondo kapena yaciwawa. Konjecesya pa yeleyi ŵandu ŵajinji ŵawulele mnope.

Ana pakwika apano ngondo situpile mwamtuli? Kupunda ni kalakose, ngondo situpile mnope mwakuti mpaka yikombolece ŵandu wosope kumala pacilambo capasi. Atamose yiwanja yayikusakamucisya kuti pacilambopa paŵe mtendele, mpela ca United Nations, yilepele kumasya yakusawusya yayikutendekwa ligongo lyakwenda kwa haci jecejewu.

“Najiweni haci jepiliwu. Juŵakwesile haciji jwajigele sikelo m’miyala mwakwe. Kaneko napikene maloŵe mpela gakukopoka pasikati pa yakupanganyikwa mcece yila. Maloŵego galiji gakuti, ‘Kilogalamu jimo ja tiligu mtengo wakwe ciwuŵe dinali jimo, soni makilogalamu gatatu ga balele, mtengo wakwe ciwuŵe dinali jimo. Nambo akajonanga mawuta ga maolifi soni finyo.’”—Ciunukuko 6:5, 6.

Jwamlume jwakwesile haciji akwimila sala. Lilembali likulosya kuti yakulya yicisoŵa mnope mwamti tiligu jwangakwana kilogolamu jimo cacidula mpaka kwika pakumsumisya dinali jimo. Mu yaka 100 ya Aklistu ŵandanda, mundu jwasosekwaga kupocela mbiya jeleji pakamwile masengo kwa lisiku lyosope. (Matayo 20:2) Nambosoni balele jwangapunda makilogalamu gaŵili cacimsumisya ni dinali jimo. Balele nganaŵa jwakusosekwa mnope kupunda tiligu. Ana cakulya celeci cikaliji cakwanila kwa ŵandu ŵam’liŵasa lyekulungwa? Iyayi. Kunondipa kwa yakulyaku soni kusamala mauta ga maolifi ni finyo yikwimila cenene yayikutendekwa masiku agano. Ŵandu ndaŵi nikatema akwakalamusya kuti alyeje panandi yakulya ya lisiku ni lisiku.

Kutandila mu 1914, tugaweni maumboni gakulosya kuti jwamlume jwakwesile haci jepiliwu akwenda, mwamti kutandila m’yaka ya m’ma 1900, ŵandu ŵakupunda 70 miliyoni ŵawile ni sala. Ciwanja cine casasile kuti “ŵandu ciŵandika 805 miliyoni ŵalasile mnope ni sala m’caka ca 2012 mpaka 2014, yeleyi yikugopolela kuti mwa ŵandu 9 ŵaliwose pacilambo cosope, mundu jumo jwalwalaga ligongo lyakusoŵa kwa yakulya yakusosecela m’cilu. Lipoti line lyatite, “Caka cilicose sala jikuwulaga ŵandu ŵajinji kupunda ŵandu wosope ŵakuwa ni yilwele mpela ESI (AIDS), malungo soni TB.” Atamose pana yakulingalinga pakusaka kwakamucisya ŵandu ŵakulaga ni sala, nambo ŵandu akulagape ligongo jwamlume jwakwesile haci jepiliwu akwendelecela kwenda.

“Najiweni haci jaliwuka. Lina lya juŵakwesile haciji lyaliji ciwa. Soni malembe galiji mkumkuya ciŵandika. Jemanjaji ŵapocele ulamusi pa mbali jimo mwa mbali mcece sya cilambo capasi, kuti awulaje ŵandu ni upanga welewu, sala, mlili wakuwulaga soni yilombo ya pacilambo capasi.”—Ciunukuko 6:8.

Jwamlume jwakwesile haci jamcece akwimila ciwa cacikusayika ligongo lya milili soni pamagongo gane. Panyuma pa caka ca 1914, liwundika lya ku Spain lyawuleje ŵandu mamiliyoni gamajinji. Komboleka kuti ŵandu ciŵandika 500 miliyoni ŵakwete liwundikali. Yeleyi yikugopolela kuti mundu jumo pa ŵandu ŵatatu ŵaliwose ŵakwete ulwelewu.

Panyuma pa ulwelewu payicesoni yilwele yine. Ŵalijiganye ŵane akusasala kuti ŵandu mamiliyoni gamajinji ŵawile m’yaka ya m’ma 1900 ligongo lya ulwele wa nduŵi. * Atamose kuti masiku agano ŵandu akulingalinga mnope kuti apate mitela ja yilwele mpela ESI, TB soni malungo, nambope ŵandu mamiliyoni akuwa ni yilweleyi.

Ngondo, sala, soni milili jikuwulaga ŵandu. Ndaŵi syosope ŵandu pawile akwawula kumalembe yayikutendekasya ŵandu kuti asoŵe cembeceyo. Nambo Yehofa ni jwampaka atupe cembeceyo.

Yakusawusya yosope yatukusimana nayo yisigele panandi kumala. Akaliŵalila kuti mu 1914, Yesu “ŵajawile kukwagomeka acimmagongo ŵakwe” paŵamgwisisye Satana pacilambo capasi. Nambotu Yesu nganamalisya kugomekaku. (Ciunukuko 6:2; 12:9, 12) Pacangakaŵapa pangondo ja Alamagedo, Yesu catyosye yakusakala yosope yayikutendekwa ligongo lya Satana, soni ŵandu wosope ŵali kumbali jakwe. (Ciunukuko 20:1-3) Jwalakwe cacimasya yakusawusya yosope yayikutendekwa ligongo lya acalume ŵatatu ŵakwesile mahaciŵa. Ana cacitenda camtuli yeleyi? Kwende tulole yajasasile Baibulo.

M’malo mwa ngondo pacilambopa paciŵa mtendele. Yehofa ‘cacilekasya ngondo mpaka kumbesi kwa cilambo capasi. Cacitemanya ukunje, soni kuposokolanya lipanga.’ (Salimo 46:9) Nambo pakwamba ya ŵandu ŵakusanonyela mtendele, “cacisangalala ni mtendele wejinji.”—Salimo 37:11.

M’malo mwa sala, pacilambopa paciŵa yakulya yejinji. “Pacilambo capasi paciŵa yagungula yejinji. Pacanya pa matumbi paciŵa yagungula yejinji.”—Salimo 72:16.

M’malo mwa milili soni ciwa, ŵandu wosope cacikola yilu yambone soni umi wangamala. Mlungu “cacipukuta misosi josope m’meso mwawo, soni ciwa ngasicipagwasoni. Ngasipapagwasoni kulila, kuwuwula kapena kupikana kupweteka.”—Ciunukuko 21:4.

Yaŵatendaga Yesu ali pacilambo capasi yikusatupa ciwulili cambone ca mwawuciŵela umi pacacilamulilaga cilambo capasi. Jwalakwe jwalimbikasyaga mtendele, kulisya ŵandu ŵajinji, kuposya ŵakulwala, soni kwimusya ŵawe.—Matayo 12:15; 14:19-21; 26:52; Yohane 11:43, 44.

Ŵamboni sya Yehofa mpaka aŵe ŵakusangalala kwalosya wawojo m’Baibulo jawo, yampaka atende kuti aŵe ŵakoseka mkanijiyice ndaŵi jakuti yakusawusya yayikusayika ligongo lya acalume ŵatatu ŵakwesile mahaciŵa yimale. Ana mpaka akunde kumanyilila yejinji?