Mwesi wa Julayi soni Ogasiti 2020, kaliji kandanda pachilambo chosope kulolela msongano wa chigawo pandaŵi jakulandana. Kuti yeleyi yikomboleche nganisi syasosekwaga kusigopolela m’yiŵecheto yakupunda 500. Ndaŵi syejinji pakusajigala chaka kapena kupunda kuti amalisye masengo gosope gakwambula nganisi soni mafidiyo gakwe. Nambo ligongo lya mlili wa kolona, msongano ŵa mtwe ŵakuti, “Aŵeje Ŵakusangalala” ŵawugopolele. Msongano Wachigawo ŵawumalisisye kugopolela mwangakwana miyesi mcheche.

 Dipatimenti Jakulola Ŵagopolela soni Dipatimenti Jakusuma Yindu ja ku Likulu lya Mboni sya Yehofa Pachilambo Chosope, lyakamuchisye pa masengoga. Dipatimenti jakulola ya gopolela jayimanyi kuti ŵagopolela ŵajinji chasosekwe yindu yejinji yakamulichisya masengo pagopolela msonganowu mpela yakwambulila yamachili mnope. Myoyo dipatimenti jakusuma yindu, jasumile yindu yakwambulila yakwana 1,000 ni kuyitumisya mmalo gakupunda 200.

 Pakusaka kuti mbiya sikajonasika syejinji, dipatimentiji jasumile yakwambulila yejinji ni kuyiŵika pa malo gamo. Kaneko ŵayityosyaga pelepo nikuyitumisyaga kwa ŵagopolela pa chilambo chosope chapasi. Ligongo lyakuti yakwambulilayi ŵasumile yejinji, chimo wachisumaga madola 170 ga ku America. Mtengowu waliji wambone mnope pakulandanya ni kusuma chimochimo.

 Dipatimenti Jakusuma Yinduyi, jasosekwaga kusuma yinduyi ni kutenda yakuti ayitumisye mkatikati mwa mwesi wa Epulo soni Meyi 2020. Miyesi jeleji boma jaliji jili jipeleche chimanyisyo chakuti ŵandu akatendaga mabisinesi gawo soni kukamula masengo ligongo lya mlili wa kolona. Nambope, kumbesi kwa Meyi yinduyi yaliji yili yikopochele ku maofesi ga nyambi soni kumalo gakulekanganalekangana gagopolela mabuku.

 M’bale Jay Swinney juŵajili jwakulolela mu Dipatimenti Jakusuma Yinduyi jwasasile kuti, “Paliji mkamulano pasikati pa madipatimenti ga Nyambi soni ŵamalonda ŵakulekanganalekangana ŵaŵakamulaga nawo masengoga. Twakombwele kukamula masengoga mwachitema soni kukamulichisya masengo mbiya mwalunda ni chikamuchisyo chakutyochela kwa Yehofa.”

 M’bale Nicholas Ahladis jwakusakamula masengo mu Dipatimenti Jakulola ya Ŵagopolela jwatite, “Ŵagopolelaŵa ŵele pandaŵiji yaliji yakuti ngakwendajenda ligongo lya mlili wa kolona, ŵasangalele mnope ali apochele yipangisoyi. Mwangasamala kandu kuti akugopolela ŵane ali kunyumba nambope ŵakamwile masengoga mwakamulana soni mwakulipeleka. Jemanjanji ŵakamwile masengo gagopolela ngani, mafidiyo soni nyimbo m’yiŵecheto yakupunda 500.”

 Masengoga gali gamo mwa yindu yayatendekasisye kuti msongano wachigawo wa 2020 wakuti “Aŵeje Ŵakusangalala” ukomboleche. Koloŵa magasa kwawo pakupeleka mbiya kupitila pa donate.pr418.com soni matala gane, ni yayitendekasisye kuti yikomboleche kusuma yinduyi.