M’chaka achino cha 2024, m’yilambo yejinji pachilambopa chimutendekwe yisagula. Nambo ŵandu ŵajinji alesile kwakulupilila ŵandale.

•   Ŵandu ŵajinji ŵa ku America panyuma pakwawungunya ŵatite, “ŵandale ŵajinji akusatenda yindu mwakulinonyela” mmalo mwakulipeleka kuti ŵakamuchisyeje ŵandu wosope. a—Pew Research Center, September 19, 2023.

 Ŵachinyamata ŵajinji nombenawo alesile kwakulupilila ŵandale.

•   Nyusipepala jine (The New York Times) ja pa 29 Januwale, 2024 jatite “Masiku agano ŵachinyamata akusalingalinga kupata matala gakumachisya yakusawusya, nambo panyuma pakwawusya yakwayana ni ŵandale akusasala kuti ŵandale ngakukombola kupata litala lyakumachisya yakusawusya.”

•   Nyusipepala jine (The Korea Times) ja pa 22 Januwale, 2024, jasasile kuti, “Ŵachinyamata ŵajinji akusakulupilila mnope ma webusayiti mmalo mwakwakulupilila ŵandale.”

 Ana tukusosekwa kwakulupilila ŵandale kuti tukole sogolo jambone? Ana tukusosekwa kwakulupilila ŵani?

 Ŵandu akusosekwa kuŵa ŵakusamala mnope ni ŵandu ŵakusosekwa kwakulupilila. Baibulo jikusasala kuti, “Mundu jwakuloŵela akusakulupilila chilichose, nambo mundu jwakalamuka akusalolechesya mwakwendela.”—Misyungu 14:15.

•   Kuti apate mfundo syampaka syakamuchisye kumanyilila naga utenga wapochele uli wakuwona kapena iyayi, aŵalanje ngani ja Chichewa ja mtwe wakuti “Samalani Kuti Musamapusitsike Ndi Nkhani Zabodza.”

 Nambosoni, atamose ŵandale ali ŵakuwona mtima soni kuti akwete yakulinga yambone, nambope nganaŵa akombwele kutenda yosope yakusasaka. Lyeleli ni ligongo lyakwe Baibulo jikusatukalamusya kuti:

•   “Mkasimwakulupilila ayimwene, kapena ŵandu ŵane ŵangakupakombola kukamuchisya.”—Salimo 146:3.

 Baibulo jikusasala kuti Mlungu asagwile mlongola jwambone soni jwakudalilichika mnope jwali, Yesu Klistu. (Luka 1:32, 33) Yesu ali Mwenye jwa Uchimwene wa Mlungu, jajili boma jajikulamulila kwinani.—Mateyu 6:10.

•   Alole ligongo lyakwe akusosekwa kulupilila Yesu nambosoni yachachitenda kuti amasye yakusawusya yatukusimana nayoyi. Aŵalanje ngani jakuti “Ana Mwenye jwa Uchimwene wa Mlungu Ali Ŵani?” nambosoni ngani ja mtwe wakuti “Ana Uchimwene wa Mlungu Uchikwanilisya Chichi?”