Mwakamulana ni lipoti lya bungwe ja United Nations:

•    Kutandila pa 7 mpaka pa 23 Okotoba, 2023, ngondo ja pasikati pa Israel ni Gaza, jawulajisye ŵandu ŵakupunda 6,400 nambosoni kuwulasya ŵandu ŵane ŵakwana 15,200. Mwamti ŵajinji ŵaliji ŵandu wamba. Konjechesya pelepa, ŵandu masawusande gejinji ŵatisile mnyumba syawo.

•    Pakwikanaga pa 24 Sepetemba, 2023, ngondo ja pasikati pachilambo cha Russia ni Ukraine jawulajisye ŵandu wamba ŵakwana 9,701 nambosoni kuwulasya ŵandu ŵane ŵakwana 17,748.

 Ana Baibulo jikusasala ya chembecheyo chamtuli kwa ŵandu ŵakulaga ligongo lya ngondo?

 Baibulo jikusasala kuti msogolo Mlungu ‘chachilekasya ngondo mpaka kumbesi kwa chilambo chapasi.’ (Salimo 46:9) Jwalakwe chachitendekasya boma jakwinani, kapena kuti uchimwene, kuti chiwujinjile mmalo mwa maboma gosope ga ŵandu. (Daniele 2:44) Uchimwene wa Mlunguwu, uchimasya yakusawusya yosope ya ŵandu.

 Alole yele Yesu Klistu jwali Mwenye jwa Uchimwene wa Mlungu chachitenda:

•    “Pakuŵa tachimkulupusya jwakusoŵa jutachigumilajo, ni jwakulaga jwangali ŵakumkamuchisya. Jwalakwe tachatendela chanasa ŵangali machili ni ŵakulaga, tachiwukulupusya umi wa ŵandu ŵakusingalilwa. Tachiwukulupusya umi wawo ku ŵandu ŵaukali ni ŵakwasawusya.”—Salimo 72:12-14.

 Mlungu chachikamulichisya masengo Uchimwene wakwe pakumasya yakusawusya yosope yayikusayika ligongo lya ngondo soni yachiwawa.

•    “Jwalakwe chachipukuta misosi josope m’meso mwa ŵanduwo, mwamti chiwa ngasichipagwasoni. Ngasipapagwasoni yakutesya chanasa, kulila kapena kupikana kupweteka. Yindu yakala yosope yeneyi yichiŵa yili yimasile.”—Chiwunukuko 21:4.

 Pangakaŵapa Uchimwene wa Mlungu chiwutande kulamulila pachilambo chosope chapasi. Baibulo jasasile mkanipaŵe yakwamba “ngondo soni ngani syakwamba ngondo” syasikutendekwa masiku agano. (Mateyu 24:6) Myoyo ngondosi nambosoni yindu yine yosope yakogoya yayikutendekwayi yikulosya kuti tukutama “m’masiku gakumalisya” ga maulamusi ga ŵandu.—2 Timoteyo 3:1.