Chaka cha 2023 pachitandite, tukwembecheya yindu yambone yachiyitendekwe paumi wetu soni wa maŵasa getu. Ligongo chichi tukwembecheya myiyi?

 Baibulo jikusasala ngani syambone syakuti yakusawusya yatukusimana nayoyi yili yakandaŵi soni pamkaŵapa chiyimale. Ni ligongo lyakwe, Baibulo jikusati “yayalembedwe m’Malemba kalakalako, yalembedwe kuti yitujiganye. Soni tukwete chembecheyo ligongo Malembaga. . . gakusatulimbikasya.”—Aloma 15:4.

•   Kuti amanyilile yejinji yakwamba yajikusasala Baibulo kuti yichitendekwa, aŵalanje ngani jakuti “Chembecheyo Chisyesyene Chikusatukamuchisya Kola Sogolo Jambone.”

 Chembecheyo chakusachikolanga m’Baibulo akusachilandanya ni “nangula jwa umi wetu.” (Ahebeli 6:19, maloŵe gamwiŵanda) Chembecheyochi mpaka chitukamuchisye kuti tukatenganyikaga. Mpaka chitukamuchisyesoni kupilila yakusawusya yatukusimana nayo apano, kuŵa ŵaganisya chenene soni ŵakusangalala mpaka kalakala. Mwachisyasyo:

•   Amanyilile mwele chembecheyo cha m’Baibulo chamkamuchisye mundu jwine kuleka chisyoŵe chakusakala. Alolele fidiyo ja Chichewa jakuti Napesile ni Ndamo Jangu Jakusakala.

•   Alole mwele chembecheyo cha m’Baibulo chikusatukamuchisya m’weji pandaŵi jele jwakunonyelwa jwetu pajasiche. Alolele fidiyo ja Chichewa jakuti Uthenga Wotonthoza Anthu Omwe Aferedwa.

 Ŵandu ŵajinji akusajembecheya yindu yambone kutendekwa, mwamti ŵangasimichisya kuti yakwembecheyayo mpaka yikomboleche. Nambo yajikusasala Baibulo yili yakulekangana ni yeleyi. Ligongo chichi? Ligongo lyakuti yajikusasala Baibulo yikusatyochela kwa Yehofa Mlungu a msyene “jwanganaŵa alambwisye.” (Tito 1:2) Yehofape ni jwakwete machili gakwanilisya yaŵaŵechete. Jwalakwe chachitenda “chilichose chele. . . akusaka kuchitenda.”—Salimo 135:5, 6.

 Tukwawilanjila kuti apindule ni chembecheyo chisyesyene chakutyochela m’Baibulochi. Mpaka alimbisye chikulupi chawo naga ‘akuwungunya malemba.’ (Masengo 17:11) Alinjelinje kutenda yakuti mundu jwine wakamuchisyeje kwajiganya Baibulo mwalulele. Kutenda yeleyi kwakamuchisye kola chembecheyo chisyesyene m’chaka cha 2023 chelechi.