Mlembela jwamkulungwa jwa Bungwe ja United Nations, Che António Guterres, jwatite: “Apanopano tukusosekwa kunandiya kuputa ngondo. Apanopano tukusosekwa kulilekasya mnope.” Jwalakwe jwaŵechete myoyo ligongo lya mabomba gele chilambo cha Iran chawulisye m’chilambo cha Israel Lyakuŵeluka pa 13 Epulo, 2024.

 Ngondo jajikutendekwa ku Middle East jili chisyasyo chimo cha ngondo syasikutendekwa pachilambo chosope.

 Bungwe ja United Nations Security Council, pa 26 Januwale, 2023 jatite, “Apanopano yachiwawa nambosoni ukangani yitupile mnope pachilambopa kutandila pandaŵi ja Ngondo Jaŵili ja Pachilambo Chosope, mwamti ŵandu 2 biliyoni akukwayidwa soni kulaga ni yachiwawayi.”

 Yilambo yele kukutendekwa yachiwawayi yili Israel, Gaza, Syria, Azerbaijan, Ukraine, Sudan, Ethiopia, Niger, Myanmar, soni Haiti. a

 Ana ngondo jichimala chakachi? Ana achimlongola ŵa yilambo mpaka ayikasye mtendele? Ana Baibulo jikusasala yamti uli panganiji?

 Yachiwawa yayikutendekwa pachilambopa yikulosya kuti ngondo simale pachangakaŵapa. Ngondosi sikukwanilisya yakulochesya ya m’Baibulo yakusala ya ndaŵi jatukutamaji. Baibulo jikusasala ya ndaŵiji kuti kuli “kumala kwa ndaŵi ajino.”—Mateyu 24:3.

•    “Chimchipikana masegwe ga ngondo chapakuŵandika soni ngani syakwamba ngondo. . . . Mtundu uchijimuchilana ni mtundu ujakwe soni uchimwene ni uchimwene ujakwe.”—Mateyu 24:6, 7.

 Aŵalanje ngani ja Chichewa jakuti “Kodi Chizindikiro cha “Masiku Otsiriza” Kapena Kuti Nthawi “ya Mapeto” N’chiyani’? ” kuti alole mwele ngondo syasikutendekwa masiku agano sikukwanilichisya yakulochesya ya m’Baibulo.

 Baibulo jasasile mkanipaŵe kuti yachiwawa nambosoni ukangani yichimala. Ana yeleyi yichikomboleka uli? Pangali mundu jwalijose jwampaka amasye yeleyi nambo yichimala ni “ngondo ja lisiku lyekulungwa lya Mlungu Jwamachiligosope” jajikusakolanjidwa kuti Alamagedo. (Chiwunukuko 16:14, 16) Ngondoji jichiwugula litala lyakuti Mlungu chakwanilisye yajwasasile yakuti ŵandu chachisangalala ni mtendele wangamala.—Salimo 37:10, 11, 29.

 Kuti amanyilile yejinji pakwamba ya ngondo ja Mlungu jajichimasya ngondo syosope, aŵalanje ngani jakuti “Ana Ngondo ja Alimagedo ni Chichi?”