Elo. M’weji tuli Aklistu pa magongo gakuyichisyaga:

•   Tukusalingalinga kukuya mwakusamala yindu yiŵajiganyaga Yesu Klistu soni ndamo syakwe.—1 Petulo 2:21.

•   Tukusakulupilila kuti Yesu ni jwampaka atukamuchisye kuti chitukulupuche. Yeleyi yikugopolela kuti “pangali mundu jwinesoni jwampaka atukulupusye, ligongo pachilambo pano pangali lina linesoni lyalipelechedwe kwa ŵandu lyampaka litukulupusye.”—Masengo 4:12.

•   Ŵandu palijiganyisye Maloŵe ga Mlungu akusabatisidwa mu lina lya Yesu ni kuŵa ŵa Mboni sya Yehofa.—Mateyu 28:18, 19.

•   Tukusapopela kwa Mlungu kupitila mu lina lya Yesu.—Yohane 15:16.

•   Tukusakulupilila kuti Yesu ali mtwe, kapena kuti jwalakwe ŵampele udindo wakwalongolela achalume wosope.—1 Akolinto 11:3.

 Nambope, mmatala gane m’weji tuli ŵakulekangana ni madini gane gagakusalikolanga kuti gali ga Chiklistu. Mwachisyasyo, m’weji tukusakulupilila kuti Baibulo jikusajiganya kuti Yesu ali Mwanache jwa Mlungu, soni nganaŵa mbali ja Utatu. (Maliko 12:29) Ngatukusakulupililasoni kuti pana chachikusasigala ni umi mundu pawile. Konjechesya pelepa pangali Lilemba lyalikusasala kuti Mlungu akusiŵalagasya ŵandu ni moto wangamala ku helo. Nambosoni ngatukusakulupilila kuti ŵandu ŵakwete udindo wakulongolela madini akusosekwa kukola mena gaudindo gakwatendekasya kuŵa wakusosekwa mnope kupunda ŵane wosope.—Jwakulalichila 9:5; Esekiele 18:4; Mateyu 23:8-10.