•  Ana ŵa Mboni sya Yehofa akusamanyilila chamtuli kuti mpaka atende nawo yisangalalo yine yakwe?

•  Ana ŵa Mboni sya Yehofa ŵangakusatendaga nawo yisangalalo yine yakwe, nikuti akusaganonyela maŵasa gawo?

•  Ana ŵa Mboni sya Yehofa akusiŵasalila ŵandu ŵane kuti akatendaga yisangalalo?

 Ŵa Mboni sya Yehofa mkanatande kutenda nawo chisangalalo chine chakwe, chandanda akusawungunya kaje m’Baibulo. Yili myoyo ligongo lyakuti maholide soni yisangalalo yine, yikusaŵaga yakutindana ni mfundo sya m’Baibulo. Myoyo naga yili yakutindana ni mfundo sya m’Baibulo, ŵa Mboni sya Yehofa akusasagula kuti akatenda nawo. Nambope pa yisangalalo yine, jwa Mboni jwalijose akusasagula jika. Akusatenda yeleyi pakusaka “kuŵa ni nganisyo syambone pameso pa Mlungu ni ŵandu.”​—Masengo 24:16.

 Yiwusyo yakuyichisyayi ni yakusaliwusya ŵa Mboni sya Yehofa naga akusaka kutenda nawo yisangalalo yine yakwe. a

•   Ana chisangalalochi chikusakamulana ni yagakusasala malemba?

   Mfundo ja m’Baibulo: “AMBUJE akuti, ‘Mwaleche jemanjajo soni mŵe ŵapajika. Kasimkwaya kandu kangaswejela.’”​—2 Akolinto 6:​15-​17.

   Pakusaka kulilekanganya ku yijiganyo yangakamulana ni malemba, ŵa Mboni sya Yehofa ŵangasangalalila nawo maholide gakuyichisyaga.

   Maholide gakwayana ni yikulupi kapena kulambila milungu jine. Yesu jwatite, “Mumlambileje Ambuje, Mlungu jwenu, ni kwatumichila ŵelewo pewo.” (Mateyu 4:​10) Pakuya lilamusili ŵa Mboni sya Yehofa ŵangatenda nawo Kilisimasi, Isitala, kapena May Day, ligongo ndanda jakwe jatyochele pakulambila milungu ja unami mmalo mwakulambila Yehofa. Konjechesya pa maholide gelega ŵa Mboni sya Yehofa ŵangatenda nawosoni maholide gakuyichisyaga.

  •  Kwanzaa. Lina lyakuti Kwanzaa “lyatyochele ku maloŵe ga Chiswahili gakuti matunda ya kwanzaa, gagakusagopolela ‘yisogosi yandanda.’ Mwakamulana ni mbili ja kwa Africa yikusalosya kuti holide jeleji jatandite pa ndaŵi jiŵagowolaga yisongosi yandanda.” (Encyclopedia of Black Studies) Atamose kuti ŵandu ŵane akusalola kuti Kwanzaa uli mwambo wachikusa, nambo buku ja Encyclopedia of African Religion jikusasala kuti yayikusatendekwa pa mwambowu yikusalandana ni yayikusatendekwa pa mwambo wa ŵandu ŵa ku Africa. Pamwambowu pakusapelechedwa yisogosi yandanda kwa “milungu jaunami soni kwa achinangolo ŵawo mpela litala lyakwayamichila jemanjajo.” Bukuji jajonjechesyesoni kuti: “Chakulinga cha holideji chili kupeleka ulemu soni kulosya kuyamichila yindu yajatendele misimu ja achinangolo ŵawo. Mwamti ŵandu ŵa ku Africa ŵakusatama ku America akusajikolanga holideji kuti Kwanzaa.”

  •  Chisangalalo Chapasikati pa Mwesi (Mid-Autumn Festival). Chelechi chili “chisangalalo chakusachimbichisya mlungu jwamkongwe jwa mwesi.” (Holidays, Festivals, and Celebrations of the World Dictionary) Pachisangalalochi pakusaŵa mwambo wakuti “achakongwe atindiŵalileje mlungu jwawo jwamkongwe.”​—Religions of the World​—A Comprehensive Encyclopedia of Beliefs and Practices.

  •  Nauruz (Nowruz). Bungwe jine jasasile kuti, “Yine mwa yisangalalo yayatendekwaga kala yatyochele ku dini ja Zoroastrianism. Kalendala ja Zoroastrianism, lisiku lya chisangalalochi ŵaliwonaga kuŵa lyakusosekwa mnope. . . . Yikuwoneka kuti mundaŵi jakusisima, Msimu wakusisima wagwisisye pasi Msimu wa chitukuta lina lyakwe Rapithwin. Pakusaka kupochela Msimu wa chitukuta, ŵalinganyisye yakuti atende chisangalalo pandaŵi ja musi pa lisiku lya Nowruz mwakamulana ni mwambo wa Zoroastrian.”​—United Nations Educational, Scientific and Cultural Organization.

  •  Shab-e Yalda. Mwakamulana ni buku ja Sufism in the Secret History of Persia chisangalalochi chikusatendekwa mu ndaŵi jakusisima. “Chikusatendekwa ni kulambila Mithra” jwele ali mlungu jwa lilanguka. Ŵandu ŵane akusasalasoni kuti chisangalalochi chili chakamulanasoni ni chisangalalo cha Aroma ni Agiriki ŵakusalambila milungu ja lyuŵa. b

  •  Mituka ja kuyamichila. Mwakulandana ni Kwanzaa, chisangalalochi chatyochele ku chisangalalo chagowola chachachimbichisyaga milungu jakulekanganalekangana. Pali papitile ndaŵi “mipingo ja Chiklistu jatandite kutenda misyungu jeleji.”​—A Great and Godly Adventure​—The Pilgrims and the Myth of the First Thanksgiving.

   Maholide gakwayana ni kulupilila ya masenga soni upile. Baibulo jikusasala kuti ŵandu ŵakusalambila “milungu jakupeleka upile wa malweso” ali ŵandu ‘ŵakusakana AMBUJE.’ (Yesaya 65:11) Ni ligongo lyakwe ŵa Mboni sya Yehofa ŵangasangalalila maholide gakuyichisyaga:

  •  Ivan Kupala. Buku jine jikusasala kuti, “Mwakamulana ni yakusakulupilila ŵandu ŵajinji, pa holide ja Ivan Kupala chilengedwe chikusakoposya machili gakwayana ni yamasenga. Ŵandu ŵakulimba mtima nambosoni ŵa upile akusakombolako kupata machiligo.” (The A to Z of Belarus) Pandanda Ivan Kupala jaliji holide ja ŵandu ŵachikusa soni ŵajitendaga pa ndaŵi ja chawu. Nambope, buku ja Encyclopedia of Contemporary Russian Culture jikusati, “holideji jawanganyichilene ni holide ja madini jajikusakolanjidwa kuti [“holide ja ŵaswela mtima” ja Yohane M’batisi] panyuma pakuti ŵandu ŵachikusa ajinjile Chiklistu.”

  •  Chisangalalo cha chaka chasambano (Chaka chasambano cha ku China kapena Chaka Chasambano cha ku Korea). Buku jine jikusati, “Holideji jikusatendekwa pali pamasile mwesi umo m’chaka chasambano. Chakulinga chakwe chikusaŵa kwasosela yindu yambone ŵandu ŵa mwiŵasa, ŵakunguluka nawo nambosoni ŵachibale kuti apate upile m’chaka chelecho. Akusapelekasoni ulemu kwa milungu ja misimu.” (Mooncakes and Hungry Ghosts​—Festivals of China) Yikulandanasoni ni chisangalalo cha Chaka cha ku Korea. Buku jine jikusati, “Pa ndaŵiji akusalambila misimu ja achinangolo mwamti pakusaŵa mwambo ŵakutyosya misimu jakusakala ni kukusosela upile. Nambosoni akusasala yindu yachitendekwe m’chakacho.”​—Encyclopedia of New Year’s Holidays Worldwide.

   Maholide gagatyochele kuchijiganyo chakuti pana chindu chine chakwe chachikusaŵa ni umi mundu pawile. Baibulo jikusasala mwakupikanika chenene kuti umi ukusawa. (Esekiele 18:4) Ni ligongo lyakwe ŵa Mboni sya Yehofa ŵangatenda nawo maholide gakuyichisyaga:

  •  Lisiku Lyakumbuchila Ŵaswela Mtima Ŵaŵawile. Mwakamulana ni buku ja New Catholic Encyclopedia “lyeleli lili lisiku lyakusakumbuchila ŵandu wosope ŵakulupichika ŵaŵawile. Kutandila m’yaka ya mma 500.C.E. mpaka cha m’ma 1500.C.E., ŵandu ŵajinji ŵakulupililaga kuti palisikuli, misimu jajaliji ku puligatoliya jayikaga kwa ŵandu ŵaŵatendaga yakusakala pa ndaŵi jiŵaliji chijumi. Misimuji jawonechelaga kwa ŵandu mpela nyali sya asaŵi ni matala ganesoni.”

  •  Holide ja Qingming (Ch’ing Ming) soni ja Misimu ja Sala. Maholide gosopega gakusatendekwa pakusaka kuchimbichisya misimu ja achinangolo. Pa ndaŵi ja holide ja Ch’ing Ming buku jine ja mtwe wakuti, Celebrating Life Customs Around the World​—From Baby Showers to Funerals jasasile kuti, “palisikuli akusajocha yakulya, yakumwa nambosoni mbiya pakusaka kumsimichisya mundu jwa m’ŵejo kuti ngakusoŵa chilichose.” Bukuji jasasilesoni kuti, “pandaŵi ja holide ja Misimu ja Sala jatendekwaga chilo chalisiku lyele mwesi ŵakopoga wamtundu. Ŵandu ŵaŵatendaga holideji ŵakulupililaga kuti chilo chalisikuli paŵaga kukamulana pasikati pa ŵandu ŵawe ni ŵali chijumi. Myoyo pasosekwaga kupata litala lyambone lyakuti ŵandu ŵaŵe akatumbilikasya soni kujichimbisya misimu ja achinangolo.”

  •  Chuseok. Buku jine jasasasile kuti pa holideji pakusaŵasoni “kupeleka chakulya namboni ukana ku misimu ja ŵawe.” Yakupelekayi yikusalosya kuti ŵandu akwete “chikulupi chakuti mundu pawile pana chindu chine chachikusapitilisya kuŵa ni umi.”​—The Korean Tradition of Religion, Society, and Ethics.

   Maholide gakwayana ni yamisimu. Baibulo jikusati, “Pakaja kusimanikwa mundu kulondola chisango,kapena jwakusagamila masoka, kapena jwakutenda ya usaŵi, kapena jwakamulisya masengo yilisi yakusakala. Pakaja kusimanikwa mundu jwakuwusya lunda kwa misimu ja ŵandu ŵawe. AMBUJE Mlungu jwenu akusaŵengana nawo ŵandu ŵakutenda yakusakala ya mtundu welewo.” (Detulonomo 18:10-​12) Myoyo pakusaka kuŵambala yiliyose yakwayana ni yamisimu kupwatikapo kulupilila ya ndondwa, ŵa Mboni sya Yehofa ŵangatendaga nawo chisangalalo cha Halowini kapena maholide gakuyichisyaga:

  •  Chaka Chasambano cha Sinhala soni Tamil. Buku jine jatite, “pachakutendekwachi . . . ŵandu akusakulupilila kuti kutenda yindu pandaŵi jele ŵakusakulupilila ndondwa alochesye, kukusayikasya upile.”​—Encyclopedia of Sri Lanka.

  •  Songkran. Buku jine jikusati linali, lili lya chisangalalo chachikusatendekwa ku Asia. “Linali lyajigalidwe ku chiŵecheto chakala chele apano akusakamulichisya masengo pa yindu yakwayana ni dini. . . . Maloŵego gakusagopolela ‘kwenda’ kapena ‘kuchenga.’ Ŵandu akusakulupilila kuti pa ndaŵiji lyuŵa likusachenga nikuŵa gulu ja ndondwa syakusala ya msogolo. Gulu ja ndondwa syelesi pasili pampepe sikusawoneka mpela msengo wa ngondolo.”​—Food, Feasts, and Faith​—An Encyclopedia of Food Culture in World Religions.

   Misyungu jakwayana ni kulambila jijapali mu ndaŵi ja Mose, jamasile ni mbopesi ja Yesu. Baibulo jikusati, “Klistu ni kumala kwa Chilamusi.” (Aloma 10:4) Atamose kuti Aklistu nganituŵa pasi pa Chilamusichi, nambope tukusakamulichisya masengo mfundo sya m’Chilamusichi. Jemanjaji ŵangatenda nawo yisangalalo yayatendekwaga mu ndaŵi jelejo mnopemnope yakwayana ni kwika kwa Mesiya. Ligongo lyakwe lili lyakuti akusakulupilila kuti jwayiche kala. Baibulo jikusasala kuti, “Yosopeyi yili yiwulili chabe ya yindu yisyesyene yele yikwisayo, nambo yisyesyene yakwe ni Klistu.” (Akolose 2:​17) Chakulinga cha yisangalaloyi chakwanilichikwe kala. Konjechesya pelepa yisangalalo yampelaga yeleyi yikusapwatikapo misyungu jakutindana ni malemba. Myoyo ŵa Mboni sya Yehofa ŵangatendaga nawo yisangalalo yakuyichisyayi:

  •  Hanukkah. Chisangalalo chelechi akusakumbuchila kuwuchisidwa kwa nyumba ja kulambilila ja Ayuda ku Yelusalemu. Yesu ali Jwamkulungwa Jwambopesi. Baibulo jikusasala kuti, “chitenti chele ŵatumichilagacho chaliji chachikulungwa nipo soni chambone mnope. Nganichipanganyikwa ni ŵandu nikuti nganichiŵa chapasi pano.” (Ahebeli 9:​11) Kwa Aklistu nyumba jakulambilila ja usimuji jajinjilidwe mmalo ni nyumba jakulambilila jisyesyene ja ku Yelusalemu.

  •  Rosh Hashanah. Chisangalalochi chikusatendekwa pa lisiku lyandanda lya chaka cha Ayuda. Pa ndaŵi ja chisangalalo chelechi ŵandu ŵapelekaga mbopesi sya pajika kwa Mlungu. (Numeli 29:​1-6) Nambope Yesu Klistu jwali Mesiya, ‘jwalekasisye kupeleka mbopesi ni yakupeleka yine.’ Yeleyi yikulosya kuti kupeleka mbopesi syelesi kuli kwangali masengo kwa Mlungu.​—Daniele 9:​26, 27.

•   Ana holideji jikusalimbikasya kuti madini gatendeleje yindu pampepe?

   Mfundo ja m’Baibulo: “Ana jwakulupilila ni jwangakulupilila akwete yindu yakulandana mu ndamo syawo? Ana Nyumba ja AMBUJE mpaka jikamulane uli ni milungu jakupanganya ŵandu?”​—2 Akolinto 6:​15-​17.

   Ŵa Mboni sya Yehofa akusalingalinga kutama mwa mtendele ni ŵandu ŵane soni kuchimbichisya ufulu wa mundu jwalijose wakusagula dini jampaka asache. Nambope ŵangatendaga yisangalalo yakulimbikasya kuti ŵandu ŵa dini syakulekangana atendeleje yindu yimpepe. Yine mwa yisangalalo yangakusatendaga nawo kapena kulimbikasya yili yakuyichisyayi:

   Yisangalalo yakwayana ni kulambila chindu chine kapena yakutendekwa yayikusalimbikasya ŵandu ŵa dini syakulekangana kuti apopeleje pampepe. Pandaŵi jele Mlungu jwalongolelaga ŵandu ŵakwe paŵajinjilaga m’chilambo chasambano, jwasalile kuti, “Mkaja kutenda nawo chilanga jemanjajo kapena milungu jawo. . . . Naga mkuja kujipopelela milungu jawo, timkatanjile.” (Ekisodo 23:32, 33) Ni ligongo lyakwe ŵa Mboni sya Yehofa ŵangatendaga nawo maholide gakuyichisyaga.

  •  Loy Krathong. Buku jine jikusasala kuti chisangalalochi chikusatendekwa ku Thailand. Pa chisangalalochi “ŵandu akusalinganya mbale kutyochela ku masamba, ni kuŵikamo makandulo kapena tuyitela twakununjilisya. Kaneko akusaŵika mbalesyo m’mesi. Jemanjaji akusakulupilila kuti liboti palikupita likusatyosya likungu m’mesimo. Pelepa mpaka tusale kuti ŵandu akusatenda chisangalalochi pakumbuchila yiŵatesile a Buddha.”​—Encyclopedia of Buddhism.

  •  Lisiku Lyakupitikuka Mtima. Mwakamulana ni yaŵasasile jwamkulungwa jwine jwa boma mu nyusipepala jine ja ku Papua New Guinean, ŵandu ŵakusajigala nawo mbali pa chisangalalochi “akusaŵa ŵaŵajitichisye kukuya mfundo sya Chiklistu.” Ŵasasilesoni kuti lyeleli lili lisiku lyakuti “ŵandu wosope m’chilambomo akuyeje mfundo sya Chiklistu.”​—The National.

  •  Vesak. Buku jine jikusati “Lyeleli lili lisiku lyakusosekwa mnope kwa ŵaswela mtima ŵa Chibuda pa masiku gawo geswela. Jemanjaji akusasangalalila kupagwa kwa Buddha, chiwa chakwe soni kuti jwalakwe ni juŵayikasisye kuŵala kwa usimu.”​—Holidays, Festivals, and Celebrations of the World Dictionary.

   Misyungu jajatyochele ku yijiganyo ya dini yangakamulana ni Baibulo. Yesu ŵasalile achimlongola ŵa dini kuti, “Mkugachembulusya maloŵe ga Mlungu ligongo lya msyungu wenuwo.” Ŵasalilesoni kuti kulambila kwawo kwaliji kwangali mate ligongo akusajiganya “tumalamusi twakupanganya ŵandu wamba.” (Mateyu 15:​6, 9) Pa ligongo lyeleli ŵa Mboni sya Yehofa ŵangatenda nawo misyungu jakuyichisyaji.

  •  Epiphany (Lisiku Lyakumbuchila Mayimwene Gatatu, Timkat, kapena Los Reyes Magos). Ŵakusatenda msyunguwu akusakumbuchila ŵakulupilila ndondwa ŵaŵapite kukumlola Yesu pandaŵi jiŵapali kapenasoni akusakumbuchila ubatiso wakwe. Buku jine jasasile kuti “msyunguwu wawugalawisye ni kuŵa chisangalalo chachiklistu. Pandanda chisangalalochi chachimbichisyaga milungu ja sulo.” (The Christmas Encyclopedia) Pele chisangalalo cha Timkat, chikusakwayana mnope ni ndamo.​—Encyclopedia of Society and Culture in the Ancient World.

  •  Chisangalalo Chakumbuchila Kuti Maliya Virigo Jwapite Kwinani. Chisangalalochi ŵandu akusakumbuchila kuti mama ŵawo Yesu ŵapite kwinani ni chilu chawo chisyesyene. Buku jine jasasile kuti “Aklistu ŵandanda nganawumanyililaga msyunguwu soni wangasimanikwaga m’Baibulo.”​—Religion and Society​—Encyclopedia of Fundamentalism.

  •  Chisangalalo Chakumbuchila Kuti Maliya Jwapagwile ali Jwangali Ulemwa. Buku jine jikusasala kuti “Baibulo jangasalaga kuti Maliya jwapagwile ali jwangali ulemwa. . . . Chelechi chili chijiganyo cha dini.”​—New Catholic Encyclopedia.

  •  Namasani. Pandaŵiji ŵandu akusapitikuka mtima nambosoni ŵangalyaga musi. Buku ja New Catholic Encyclopedia, jikusati chisangalalochi chatandite “yaka ya m’ma 300 C.E.” Kutyochela pa ndaŵiji paliji pali pamasile yaka yakupunda 200 Baibulo ali ajimalisisye kujilemba. Pakwamba ya lisiku lyandanda lya namasani, bukuji jikusasalasoni kuti, “Pachisangalalochi ŵandu ŵakulupilila akusiŵajambula msalaba pawusyo pawo pakamulichisya masengo liwu pa Lisiku Lyakwasa Liwu. Msyunguwu watyochele ku Benevento mwamti watandite mu 1091. Myoyo msyunguwu uŵele uli mkutendekwa pachilambo chosope.”

  •  Meskel (kapena, Maskal). Buku jine jasasile kuti chelechi chili chisangalalo chachikusatendekwa ku Ethiopia. Pachisangalalochi akusakumbuchila “kusimanikwa kwa Msalaba Usyesyene (msalaba wele Klistu ŵamkomele). Akusatenda yeleyi ali akolesisye moto ni kuŵinaga mwakusyungulila motowo.” (Encyclopedia of Society and Culture in the Medieval World) Nambo ŵa Mboni sya Yehofa ŵangakamulichisyaga masengo msalaba pakulambila.

•   Ana holideji jikusapeleka ulemu wapadela kwa mundu, bungwe kapena chimanyilo chinechakwe cha chilambo?

   Mfundo ja m’Baibulo: “AMBUJE akuŵecheta kuti, ‘Likungu kwa mundu jwakusajegamila pa mundu mjakwe, jwele jwakusaŵika chikulupi chakwe pa mundu mjakwejo, chitamilecho jemanjajo ali angalawuchile une.’”​—Yelemiya 17:5.

   Atamose kuti ŵa Mboni sya Yehofa akusiŵayamichila achimjawo soni kwapopelela, nambope jemanjaji ŵagatendaga nawo yisangalalo yakuyichisyayi:

   Maholide gele gakusachimbichisya ŵakulamulila kapena mundu jwine jwakuchimbichika. Baibulo jikusasala kuti, “Mkasimumkulupilila mundu soni, pakuti umi wakwe wangakaŵa kumala. Ana jwalakwejo ni kumjigala mpela kandu?” (Yesaya 2:​22) Ni ligongo lyakwe ŵa Mboni sya Yehofa ŵangasangalalilaga lisiku lya kupagwa kwa mwenye.

   Yisangalalo yakwamba mbendela ja chilambo. Ana ligongo chichi ŵa Mboni sya Yehofa ŵangasangalalilaga Lisiku Lyakumbuchila Mbendela ja chilambo? Ligongo Baibulo jikusasala kuti, “Mliŵambasyeje mwachimsyene soni ngalambilaga milungu ja unami.” (1 Yohane 5:​21) Ŵandu ŵane masiku agano ŵangamanyililaga kuti kuchimbichisya mbendela kuli kwakulandana ni kulambila yiwanichisyo. Nambo jwakulemba mbili jwine lina lyakwe Carlton J. H. Hayes, jwalembile kuti, “Chimanyilo chakulosya kuti mundu akusanonyela mnope chilambo chakwe chili kulambila mbendela.”

   Maholide kapena yisangalalo yakuchimbichisya ŵaswela mtima. Ana ni chichi chachatendekwe mundu jwakogopa Mlungu paŵamtindiŵalile ndumetume Petulo? Baibulo jikusasala kuti, “Petulo ŵamjimwisye ni ŵatite, ‘Jimukani, none ndili mundu wamba.’” (Masengo 10:25, 26) Pakuŵapo ndumetume Petulo soni ŵandumetume ŵane ŵakanile kupochela uchimbichimbi wapajika, ŵa Mboni sya Yehofa ŵangatenda nawo yisangalalo yakuchimbichisya ŵaswela mtima. Yine mwa yisangalalo yele ŵangatendaga nawo yili yakuyichisyayi:

  •  Lisiku lya Ŵaswela Mtima. Buku jine jasasile kuti, “Chisangalalochi chikusatendekwa pakusaka kwachimbichisya ŵaswela mtima wosope. . . . Mwamti ngayikusamanyika mwachatandilile chisangalalochi.”​—New Catholic Encyclopedia.

  •  Chisangalalo cha Mayi Jwamswela jwa ku Guadalupe (Fiesta of Our Lady of Guadalupe). Chisangalalochi chikusachimbichisya jwamkongwe “jwamswela mtima jwa ku Mexico,” jwele ŵandu ŵane akusakulupilila kuti ali Maliya mamagwe Yesu. Jemanjaji akusasala kuti jwamkongweju jwawonechele mwakusimonjesya kwa mlimi jwakulaga m’chaka cha 1531.​—The Greenwood Encyclopedia of Latino Literature.

  •  Lisiku Lyakupeleka Lina. Buku jine jasasile kuti, “Lyeleli lili lisiku lya ŵaswela mtima lyele ŵandu akusasangalala panyuma pakuti mwanache ampele lina, abatisidwe kapena naga alosisye kuti akwete chikulupi payakutendekwa ya dini.” Jasasilesoni kuti, “Palisikuli ŵandu akusatenda yindu yakwayana ni dini.”​—Celebrating Life Customs Around the World​—From Baby Showers to Funerals.

   Yisangalalo yakwayana ni ndale. Baibulo jikusasala kuti, “Kutilila kwa AMBUJE kuli kwambone kupundana ni kumkulupilila mundu.” (Salimo 118:​8, 9) Pakulosya kuti ŵa Mboni sya Yehofa akusakulupilila kuti Mlungu ni juchachimasya yakusawusya yosope ya ŵandu, jemanjanji ŵangajigala mbali pa yisangalalo yakwayana ni Lisiku lya Ŵachinyamata kapena Lisiku lya Achakongwe. Chakulinga cha yisangalalo yeleyi chili kukamuchisya ya ndale. Ŵa Mboni sya Yehofa ŵangajigalasoni mbali pa chisangalalo chakumbuchila Lisiku Lyakumala kwa Ukapolo kapena yisangalalo yine yakulandana ni yeleyi. Mmalo mwakwe jemanjaji akusajembecheya kuti Uchimwene wa Mlungu uchimasya yakusawusya yayikusayika ligongo lyakusagulana mitundu.​—Aloma 2:​11; 8:​21.

•   Ana holideji jikusatendekasya ŵandu kuwona mtundu wine kuŵa wakusosekwa mnope kupunda ujakwe?

   Mfundo ja m’Baibulo: “Mlungu jwangali lusagu. Jwalijose jwakusamjogopa jwalakwe ni kutenda yambone akumpochela.”​—Masengo 10:34, 35.

   Atamose kuti ŵa Mboni sya Yehofa akusanonyela chilambo chawo, nambope akusaŵambala yisangalalo yampaka yimtendekasye mundu kumwona mtundu wine kuŵa wakusosekwa mnope kupunda wine. Yine mwa yisangalaloyi yili yakuyichisyayi:

   Yakutendekwa yayikusachimbichisya asilikali. Mmalo mwakulimbikasya ngondo, Yesu ŵasalile ŵakumkuya ŵakwe kuti, “Mwanonyeleje amagongo ŵenu nipo mwapopeleleje ŵandu ŵakusamsawusya.” (Mateyu 5:​44) Myoyo ŵa Mboni sya Yehofa ŵangatenda nawo yisangalalo yakuchimbichisya asilikali kupwatikapo maholide gakuyichisyaga:

  •  Lisiku lya Anzac. Buku jine jikusasala kuti, “Anzac gali maloŵe gakata gakuti Australian and New Zealand Army Corps. Mwamti mwapanandipanandi lisiku lya Anzac lyaŵele lisiku lyakumbuchila ŵandu ŵaŵawulajidwe pa ngondo.”​—Historical Dictionary of Australia.

  •  Lisiku Lyakumbuchila Asilikali (Remembrance Day, Remembrance Sunday, or Memorial Day). M’maholide gosopega ŵandu akusakumbuchila “asilikali ŵa mchilambomo ŵaŵapumwile pamasengo gawo soni ŵaŵawulajidwe pa ngondo.”​—Encyclopædia Britannica.

   Yisangalalo yakwayana ni mbili ja chilambo kapena lisiku lyele chilambocho chapochele ufulu. Yesu ŵasalile ŵakumkuya ŵakwe kuti, “Mpela une nganimba jwa chilambo chapasi, jemanjajo nganaŵa ŵa chilambo chapasi.” (Yohane 17:16) Atamose kuti ŵa Mboni sya Yehofa akusasangalala kumanyilila mbili ja chilambo chawo, nambope jemanjaji ŵangatenda nawo yisangalalo yakuyichisyayi:

  •  Lisiku lya Australia. Buku jine jasasile kuti palisikuli ŵandu akusakumbuchila kuti “mu 1788 asilikali ŵakwesisye mbendela syawo ni kupeleka chimanyisyo chakuti atandite kulamulila chilambo cha Australia.”​—Worldmark Encyclopedia of Cultures and Daily Life.

  •  Lisiku lya Guy Fawkes. Pa lisikuli “ŵandu akusakumbuchila ya uchiswamba wawalepelechekwe kutendekwa mu 1605. Guy Fawkes ni ŵandu ŵane ŵa Chikatolika ŵaŵamkamuchisyaga, ŵapanganyisye yakuti amwulaje Mwenye James I soni achakulungwakulungwa ŵa boma ja England.”​—A Dictionary of English Folklore.

  •  Lisiku Lyakumbuchila Ufulu Wakulilamulila. M’yilambo yejinji lyeleli lili lisiku liŵalitamilikasisye ŵa boma mwamti ŵandu akusakumbuchila lisiku lyele chilambo chawo chapochele ufulu wakulilamulila.​—Merriam-Webster’s Unabridged Dictionary.

•   Ana holideji jikusamanyika ni ndamo syakusakala?

   Mfundo ja m’Baibulo: “Kalakala mwajasaga ndaŵi jejinji pakutenda yindu yele yakusayinonyela ŵandu ŵa mitundu jine. Mwakuyaga yindu yakunyalaya, yilakolako yakunyalaya, kukolelwa, kutunduka, masegwe ga pa mkologo ni kupopelela yindu yakupanyidwa ni ŵandu.”​—1 Petulo 4:3.

   Mwakamulana ni mfundo ja palilembali, ŵa Mboni sya Yehofa ŵangajawula ku yisangalalo yele ŵandu akusakolelwa soni yamasegwe. Nambope akusasangalala kunguluka ni achimjawo soni naga asachile akusasagula kumwa ukana mwachikatikati. Pakutenda yeleyi akusakuya mfundo ja m’Baibulo jakuti, “Kanga mkulya kapena kumwa, kapena mkutenda chilichose, mtendeje yeleyi kuti mumchimbichisye Mlungu.”​—1 Akolinto 10:31.

   Myoyo ŵa Mboni sya Yehofa ŵangatenda nawo yisangalalo yayikusalimbikasya ndamo syakusakala. Yeleyi yikupwatikapo chisangalalo chakusatenda Ayuda cha Purim. Atamose kuti kwa yaka yejinji Ayuda aŵele ali mkutenda chisangalalo cha Purim pakumbuchila lisiku liŵagopoledwe ku kapolo m’yaka ya mma 400 B.C.E., buku jine jikusasala kuti “masiku agano chisangalalochi ngachikusamanyika chenene soni chikusajinjilidwa mmalo ni chisangalalo cha chiyuda cha Mardi Gras kapena kuti Carnival.” Bukuji jasasilesoni kuti pa chisangalalochi “achalume akusaŵala yakuŵala yachakongwe, pakusatendekwa yachiwawa, ŵandu akusakolelwa soni pakusaŵa lisegwe pa malopo.”​—Essential Judaism.

 Elo. Baibulo jikusajiganya kuti ŵandu wosope ŵa mwiŵasa anonyelaneje nambosoni kuchimbichisyana, mwangajigalila yakusakulupilila jwine. (1 Petulo 3:​1, 2, 7) Jwa Mboni sya Yehofa palesile kutenda nawo yisangalalo yine yakwe, ŵachibale ŵane nganaŵa asangalele. Payitendekwe yeleyi ŵa Mboni sya Yehofa akusiŵalondechesyaga ligongo lyakwe atesile yeleyi nambo mwawuchimbichimbi. Konjechesya pelepa naga patendekwe yine yakwe akusajawulaga kukwalola.

 Iyayi. Jemanjaji akusakulupilila kuti jwalijose akusosekwa kulisagulila jika yakutenda. (Yoswa 24:15) Ŵa Mboni sya Yehofa ‘akusiŵachimbichisyaga ŵandu wosope’ mwangajigalila yakusakulupilila.​—1 Petulo 2:​17.