Yindu yosope yatukusakulupilila yikusatyochela m’Baibulo. Myoyo twachenjile yindu yine yatwakulupililaga ligongo lyakuti twapikanichisye chenene yagakusala Malemba. a

 Yatwatesileyi yili yakamulana ni yajikusasala Baibulo pa Misyungu 4:18 kuti, “Litala lya ŵandu ŵakulungama lili mpela kumasikusiku kwele kukusaŵa kuli mkulanguchilalanguchila mpaka palikukwela lyuŵa pa mtwe.” Mpela mwayikusaŵela kuti tukusatanda kuyiwona chenene yindu lyuŵa palikuwala panandipanandi, ni mwayikusaŵelasoni kuti pandaŵi jakwe jambone Mlungu akusatukamuchisya mwapanandipanandi kuti tupikanichisye chenene Maloŵe gakwe. (1 Petulo 1:10-12) Mpela mwajikuŵechetela Baibulo, Mlungu aŵele ali mkutenda yeleyi mnopemnope mu “ndaŵi jakumalisya” jino.—Daniele 12:4.

 Patuchenjile kapikane ketu ka Maloŵe ga Mlungu, ngatukusasosekwa kusimonga kapena kukunda kuti yitusokonasyeje. Yili myoyo ligongo lyakuti nombenawo ŵakutumichila ŵa Mlungu ŵakala ŵaganisyaga soni kwembecheya yindu yele nganiyitendekwa. Myoyo ŵasosekwaga kuchenga mwaŵaganichisyaga.

•   Mose jwaganisyaga kuti mpaka jwakulupusye Ayisalayeli pajwaliji ni yaka 40. Nambotu jeleji nganijiŵa ndaŵi jambone kwa Yehofa.—Masengo 7:23-25, 30, 35.

•   Ŵandumetume ŵalepele kupikanichisya yakulochesya yayasalaga kuti Yesu akusosekwa kuwa soni kwimuka.—Yesaya 53:8-12; Mateyo 16:21-23.

•   Aklistu ŵane ŵa mu yaka 100 yandanda ŵakwete nganisyo syakulemwecheka pakwamba kwika kwa “lisiku lya Yehofa.”—2 Atesalonika 2:1, 2.

 Nambope, Mlungu jwakamuchisye jemanjaji kuti apikanichisye chenene yindu yele nganayipikanichisyagayi. M’wejisoni tukusaŵenda Mlungu kuti apitilisye kutukamuchisya kuti tupikanichisyeje maloŵe gakwe.—Yakobo 1:5.