Ŵandu ŵaŵabatisidwe ni kuŵa ŵa Mboni sya Yehofa nambo ngakusalalichila soni ŵalilekangenye ni ŵakulupilila achimjawo ngatukusitwaŵambalaga. Nambope tukusatenda yakomboleka pakwakamuchisya kuti ayiwoneje yindu yausimu kuti yili yakusosekwa mnope.

 Ngatukusagamba kwichila kwaŵambala ŵandu ŵatesile ulemwa wekulungwa. Nambope naga jwa Mboni jwabatisidwe akasile mfundo sya m’Baibulo ni ngakupitikuka mtima tukusamŵambala. Baibulo jikusasala mwakupikanika chenene kuti, “Mumtyosye mundu jwakusakalajo pasikati penu.”—1 Akolinto 5:13.

 Uli naga jwatyosyedwejo ali jwamlume nambo ŵamkwakwe ni ŵanache ŵakwe ali ŵa Mboni sya Yehofa? Ubale wa munduju ni liŵasa lyakwe wangamalaga nambo mpingo ukusagamba kuchenga katende ka yindu ni jwamlumeju. Yeleyitu yikulosya kuti jwamkongwe ni ŵanache ŵakwe akusapitilisya kutendela yalumo yindu ni jwamlumejo.

 Ŵandu ŵaŵatyosyedwe mpaka asimanikweje nawo pa misongano jetu. Naga akusaka mpaka apocheleje chikamuchisyo cha usimu kutyochela kwa achakulungwa ŵa mumpingo. Chakulinga cha malangisoga chili kumkamuchisya kuti aŵajilwesoni kuŵa jwa Mboni sya Yehofa. Ŵandu ŵaŵatyosyedwe ŵele apano alesile ndamo syakusakala soni akutenda yindu mwakamulana ni mfundo sya m’Baibulo mpaka aŵesoni ŵa Mboni sya Yehofa.