Komiti ja Nyambi ku Brazil, jatamilikasisye makomiti gakamuchisya ŵandu pajitendekwe ngosi ja chilengedwe. Chakulinga cha makomitiga chaliji kwapa yakusosechela abale ŵakusoŵa yakusosechela paumi ligongo lya mlili wa kolonafayilasi. Makomitiga gakukamuchisya mipingo jakwana 12,000 ja m’chilambo cha Brazil. Chikamuchisyochi chikupwatikaposoni abale ni alongo ŵetu ŵakusatama mudela jakutalichila mnope ja Lusulo lwa Amazon. Pakwikanaga apano, maŵasa gakwana 131 ga ku Amazon, gapochele chikamuchisyochi.

Komiti ja mu msinda wa Manaus wawuli likulu lya dela ja Amazonas jikupeleka chikamuchisyo champaka liŵasa lililyose likamulichisye masengo kwa mwesi. Chikamuchisyochi chikupwatikapo yindu mpela, mbwanda, utandi wa yinangwa, mpunga soni mkaka. Kupwatika pelepa komitiji jikupelekasoni yindu yine yakamuchisya mpela, sopo, matisyu gakamulichisya masengo ku bafa, miswachi soni mtela wakuchapila meno. Abaleŵa ŵatumisye katunduju chiŵandika ni chiko cha Manacapuru. Kaneko katunduju ŵamtumisye kupitila pa liboti kumadela gagasosechelaga chikamuchisyochi yayikupwatikapo ku madela ga Membeca soni Logo do Castanho.

Mlongo Marinelma jwakusatama ku Lago do Castanho, panyuma pakupochela chikamuchisyochi cha yakulyayi jwaŵechete kuti, “Chandanda nguyamichila mnope Yehofa kuti akusatusamalila. Twasosechelaga chikamuchisyo ligongo nganitukola mbiya syakuti mpaka tusumile yakulya. Ngusaka yamichile ligongo lyakoloŵa magasa soni chinonyelo chalosisye abale pakutukamuchisya. Mwanache jwangu jwa yaka 6 paŵambweni ndili mkulonganya yakulya yila napatilepo upile ŵakumsalila kuti Yehofa akamulichisye masengo abale kuti atukamuchisye. Kaneko mwanache jwangu jwamnondi jwatite, ‘Mama ana mpaka tupopele kwa Yehofa kuti tumyamichile pa yatutendeleyi?’”

M’bale Jonas Monteiro yalumo ni liŵasa lyakwe jwakusatama mumsinda wa Caapirang, jwalembile chikalata chakwaula ku komitiji. Jwalakwe jwalembile kuti, “Tukuyamichila mnope ligongo lya chikamuchisyo chatupochelechi. Pa yindu yatutendeleyo, yikulosya kuti Yehofa akusatunonyela. Uli upile wekulungwa mnope kuŵa mu liŵasa lyakamulana lya pachilambo chosope.”

Yeleyi yilimbikasisyesoni abale ŵa mu komiti jakupeleka chikamuchisyochi. Mwachisyasyo, M’bale Isaac Emannuel Ramalho de Oliveira jwali jwamkulungwa jwa mumpingo, akukamuchisya nawo pakupeleka chikamuchisyochi. Jwalakwe jwatite, “Lisiku lililyose pangukamulana nawo masengo gakwakamuchisya abale ŵakulagawo, ngusayiwona kuti chikulupi changu chikusalimbaga. Kukamula nawo masengoga, kukungamuchisya mnope kupundana ni chikamuchisyo chakupochela abale ni alongo.”

Yili yakulimbikasya kulola yakutenda Yehofa pakwakamuchisya ŵakutumichila ŵakwe mwangasamala kandu kuti akusatama kwapi soni ali mu ndaŵi ja mlili wa kolona.—Salimo 94:14.