Pa Nofemba 10, 2020, Luŵala lwa Magambo Lwakulola lya Ufulu wa Ŵandu ku Europe (ECHR) lwasasile kuti, achakulungwakulungwa ŵa m’chilambo cha Bulgaria ŵakasile ufulu abale ni alongo ŵetu wakutenda yindu yakwayana ni dini. Yeleyi yikulosya kuti achakulungwakulungwaŵa chiŵakunde abale ni alongo kuti apitilisye kukamula masengo gawo gakutaŵa Nyumba ja Uchimwene mu msinda wa Varna ku Bulgaria. Abale ni alongoŵa, aŵele ali ngakukamula masengoga kwa yaka yakupunda 10. Yeleyi yatendekwaga ligongo lyakuti achakulungwakulungwa ŵane ŵalekasyaga abaleŵa kukukamula masengoga. Konjechesya pelepa luŵala lwa magambolu lulamwile kuti achakulungwakulungwa ŵa m’chilambo cha Bulgaria, ŵalipile abaleŵa mbiya syakwana madola 11,500 sya kwa America.

Magambo gakwe galiji gakuti abaleŵa ŵataŵaga Nyumba ja Uchimwene pa malo gaŵasumile mwesi wa Januwale 2006. Achakulungwakulungwa ŵa ku Varna ŵajitichisye kuti abaleŵa atande kukamula masengoga mwesi wa Meyi 2007. Mwamti abaleŵa ŵatandite kukamula masengoga pandaŵi jijojo. Nambo mwesi wa Julayi m’chaka chichocho, jwamkulungwa jwakulolela msindawu, ŵasalile abaleŵa kuti nganataŵa Nyumba ja Uchimweneji mwakuŵajilwa mwamti ŵasalile kuti aleche kutaŵaku. Mwesi welewu, chipani chine cha ndale ku Bulgarian, chaŵisile yikwangwani yawo yakulosya ungakamulana ni kutaŵa kwa nyumba ja Uchimweneji.

Mwakamulana ni yalwalamwile luŵala lwa magambolu, achakulungwakulungwa ŵa boma ŵa ku Varna ŵapeleche chimanyisyo chakwanyosya ŵa Mboni sya Yehofa. Yeleyi yatendekasisye kuti ŵandu atende yiwoneselo. Yajwaŵechete jwamkulungwa jwakulolela msindawu, yalosisye kuti akukamulana ni yakuti ŵandu atende yiwoneseloyo.

Jwamkulungwa jwakulolela msindawu soni achakulungwakulungwa ŵa boma ŵalosisye kuti akusaŵengana ni ŵa Mboni sya Yehofa. Nambope jemanjaji ŵaŵechete kuti ŵatesile yeleyi ngaŵa ligongo lyakuti akusaŵengana ni diniji, nambo ligongo lyakukuya malamusi ga kataŵe ka malo.

Abale ŵetu aŵele ali mkutenda apilo magamboga m’chilambo cha Bulgaria kupwatikaposoni ku luŵala lwekulungwa mnope lwa m’chilambochi, nambo ngayikukamuchisya. Pandaŵiji, mpingo wa mudelaji watesile lendi malo gane kuti atendelejepo misongano.

Luŵala lwa magambo lwa ECHR lwasasile kuti achakulungwakulungwaŵa nganakola magongo gakupikanika gakwalagachisya ŵa Mboni. Luŵalalu lwajojechesyesoni kuti yaŵatesile achakulungwakulungwaŵa pakwalekasya abale ŵetu kutaŵa Nyumba ja Uchimwene, kwaliji kwakasila ufulu “wakusala nganisyo mwagopoka soni wakutenda yindu mwakamulana ni yikulupi ya dini jawo.” Yeleyi yikukamulana ni Atiko 9 soni 11 sya mu mfundo syele yilambo ya ku Europe yakamulene kuti yikuyeje pangani sya ufulu wa ŵandu.

Tukukulupilila kuti yalusasile luŵala lwa magambolu, chiyakamuchisye achakulungwakulungwa ŵa bomaŵa kuti ŵakunde abaleŵa kupitilisya kutaŵa nyumba jakulambililaji. Yeleyi chiyakamuchisye abale ni alongo mumsindawu soni chichimbichisye lina lya Yehofa mu msinda wa Varna. Tukumyamichila Yehofa pa yosope yatesile kuti yeleyi yikomboleche.—Salimo 54:4.