Kutandila pa Sepitemba 1, ŵa Mboni sya Yehofa pachilambo chosope ŵatandilesoni masengo gawo gakulalichila nyumba ni nyumba. Chakusangalasya mnope chili chakuti m’mesi welewu, ŵa Mboniŵa akutendasoni masengo gapadela gakutandikasya majiganyo ga Baibulo. Abale ni alongo ŵetu ŵane ŵasangalele mnope ligongo lyakuti mtundu wakalalichile ka nyumba ni nyumba ni wakusawumanyilila chenene soni kuwunonyela mnope. Pele ŵane kwaliji kutanda kwalalichila ŵandu meso ni meso. Apikane yine yayitendekwe pachilambopa yakulosya kuti chaka cha utumiki cha 2023 chichiŵe changaliŵalichika.

Pa Sepitemba 2, 2022, alongo ŵetu ŵaŵili, Nicole soni Tina ŵa ku Petershagen mu chigawo cha North Rhine-Westphalia, ŵapite kunyumba jine kulalichila, nambo nganamsimako jwalijose. Paŵatyokaga panyumbapo ŵagambile kupikana jwamkongwe jwine ali mkwaŵilanga. Jwamkongwejo jwasasile kuti ŵalepele kuti ayiche pamlango kukwapochela alongoŵa ali apoposisye. Ni jwaŵendile alongoŵa kuti awuje kuti akakambilane ngani sya m’Baibulo. Alongo ŵala ali ajinjile m’nyumba mwa jwamkongwejo ŵajiweni Baibulo ja Chilambo Chasambano ja Malemba Geswela jemale. Jwamkongwejo jwasasile kuti ŵajipatile Baibulojo yaka yitatu yipiteyo paŵatamaga ku Italy. Nambo mkatikati mwa mliliwu, jwalakwe nganakolasoni upile wakuwonegana ni ŵa Mboni sya Yehofa chiyichile ku Germany. Ni alongo ŵala ŵampele jwamkongwejo manambala gawo ga foni soni ŵamŵendile kuti chayiche ku misongano ja mpingo. Pali pamasile masiku gaŵili, jwamkongwejo yalumo ni ŵanache ŵakwe ŵaŵili ŵayiche kumisongano. Mwamti apano alongoŵa ŵatesile yakuti alijiganyeje Baibulo ni jwamkongwejo.

Apayiniya ŵaŵili ŵapadela, ŵali Manuel soni Karol Gastelum, akusatumichila mu dela jajikusaŵecheta Chimamu. Lisiku line jwamkongwe jwine ŵaŵendile kuti ajawule kumwangwawo jwamkongwejo. Nambo jwamkongweju nganamanyililaga kuti Mlungu akwete lina. Myoyo apayiniŵa ŵasagwile yakuti akambilane ni jwamkongwejo lijiganyo 4 lyakuti “Ana Mlungu Ali Ŵani” kutyochela m’buku ja Asangalaleje ni Umi Mpaka Kalakala. Nambo ali aŵalasile lilemba lya Yesaya 42:8, jwamkongweju jwasimonjile kuliwona lina lya Yehofa m’Baibulo jakwe.

Jwamkongwejo jwatandite kulila nikusalaga kuti amanyilile sano kuti kwamba kola Baibulo ngaŵa kwakwanila, nambo kuti asosekweje kujiŵalanga kuti atendeje yindu yakamulana ni yajikusasalaga. Ali amalisisye kulijiganyako, jwamkongwejo jwasangalele mnope ligongo lya yindu yaŵalijiganyisyeyo. Mwamti jwasasile kuti chiŵasalile ŵamkwakwe yalijiganyisyeyo. Apayiniyaŵa ŵatesile yakuti apitilisye kulijiganya Baibulo ni jwamkongweju.

M’bale ni Mlongo Nakamori paŵalalichilaga mumsinda wa Yokohama, ŵayiche pa nyumba jine jakola chipangiso chine chachikusakamula masengo gakulandana ni foni (intercom). Kaneko jwamkongwe jwine, jwali msyene nyumba jwakomasisye abale ŵetuŵa kupitila pa chipangisochi. Jemanjaji ŵalimanyikasisye kuti ali ŵa Mboni sya Yehofa. Kaneko msyenenyumbajo ŵaŵendile ŵa Mboni kuti amlinde kaje. Pali papitile kandaŵi, jwamkongwejo jwawugwile litanga nikwasalila kuti, “Mbele ni mkwajembecheya ŵa Mboni sya Yehofa kuti ayiche.”

Jwamkongwejo jwasasilesoni kuti jwalijiganyaga Baibulo ni Mboni sya Yehofa paŵatamaga mu msinda wa Nagasaki. Nambo kaneko jwasamile ni kwawula ku Yokohama mkatikati mwa mlili wa Covid. Jwalakwe jwapitilisye kulijiganya Baibulo kupitila pa Zoom. Nambo kundanda kwa wiki jelejo, abwana ŵakwe ŵamsalile kuti “Pana masengo gapadela mu Sepitemba, mwamti mwangakayichila jwa Mboni sya Yehofa chayiche kumangwenu. Mkusosekwa kuŵenda kuti mlijiganyeje Baibulo meso ni meso ni mundu jwachayichejo.” Jwamkongwejo jwasangalele kuti chawonegane ni ŵamboni mwachangakaŵa. Mwamti jwalakwe jwalosisye kuti akusachilila kusimanikwa pamisongano soni jwasagwile lisiku lyachachitenda lijiganyo lyakuyichisya.

Liŵasa line lya Mboni lili limŵendile jwamkongwe jwine kuti alijiganyeje najo Baibulo. Jwalakwe jwasalile jemanjajo kuti jwalijiganyaga Baibulo ni Mboni sya Yehofa soni jwasimanikwaga pamisongano jampingo kalakala. Kaneko nganawoneganasoni ni ŵa Mboni kwa ndaŵi jelewu, mwamti jwatendega sooni kwasosasosa ŵa Mboniŵa ligongo lyakuti jwatendaga yindu yakusakala. Ali asalile yeleyi, jwalakwe jwatandite kulila. Liŵasa lila lyamŵalanjile lilemba lya Salimo 10:17 soni ŵamsalile kuti Yehofa nganamliŵalila. Ŵamyamichilesoni kuti ligongo lyakuti jwaliji jwakusachilila kukuya malamusi ga Yehofa. Jwalakwe jwakundile kulijiganya Baibulo soni jwasasile kuti mwanache jwakwe jwamlume akusasaka kulijiganya yejinji ya m’Baibulo.

Liŵasa lila palyapitesoni kwa jwamkongwejo, ŵamsimene jwalakwe yalumo ni mwanache jwakwe jula ali mkwajembecheya. Paŵagambile kulijiganya Lijiganyo 01 mkabuku ka Asangalaleje ni Umi, liŵasa lya Mbonilyo, lyaŵendile ŵanduŵa kuti akasimanikwe ku misongano ja mpingo, mwamti jemanjaji ŵasimanikwe pamisonganojo. Wosopeŵa ali ŵakoseka kupitilisya kulijiganya soni kusimanikwa pamisongano jampingo.

Tuli tutandilesoni masengo gakulalichila nyumba ni nyumba, Ramon, jwapopesile kwa Mlungu kuti amkamuchisye kupata mundu jwakuti amlalichile ngani syambone palisiku lyatwatandilesoni kulalichila nyumba ni nyumba. Ali ayiche pa nyumba ja jwamkongwe jwine, jwamkongwejo jwagambile kuwugula panandi ni kulingulilaga pasa. Ramon ŵamkomasisye jwamkongwejo ni kulimanyikasya. Nambo Ramon mkanatande kulalichila, jwamkongwejo jwatite, “Mbele ndili mkwamjembecheya jemanja kwandaŵi jelewu. Sonitu mbele ndili mkupopela kuti jemanja myiche kumangwetu kuno.”

Jwamkongwejo jwasasilesoni kuti pakwete pawonegene ni Ŵamboni yaka yamunyumamu soni kuti ŵasimanikwaga pamisongano jampingo. Nambo kaneko jwasamile mwamti nganawoneganasoni ni Jwamboni jwalijose. Ramon ŵamsalile jwamkongwejo kuti masengo getu gakulalichila kunyumba ni nyumba gajimi kaje pandaŵi ja mliliji. Ramon ŵamŵalanjile jwamkongwejo Salimo 37:29 nikumsalilasoni kuti pana upile wakuti mpaka alijiganyeje Baibulo. Jwamkongwe jwakundile kulijiganya Baibulo. Ramon jwatesile yakuti mlongo amjendejeleje jwamkongwejo.

Yili yitendekwe yeleyi, Ramon jwatite, “Ngumanyilila kuti Yehofa soni malayika akutulongolela kuti twapate ŵandu ŵakusaka kupikana utenga.”

Mlongo Katelyn Thompson ali apite panyumba jine m’chigawo cha Kentucky, jwayiweni kuti pamalo papakusachila yikalata palembedwe kuti “Yesu Akusamnonyela.” Katelyn ali apoposisye, jwamkongwe jwajanjile. Katelyn jwalimanyikasisye kwa jwamkongwejo soni ŵamsalile kuti ŵa Mboni sya Yehofa nganalalichilaga nyumba ni nyumba ligongo lya mlili wa COVID-19. Ŵamsalilesoni kuti ŵa Mboniŵa ŵagambaga kwalembela ŵandu yikalata soni kwajimbila ma foni pakusaka kwalimbikasya. Kaneko Katelyn ŵamwusisye jwamkongwejo mwayikwendela yindu paumi wakwe soni ni ŵamwiŵasa mwakwe. Jwamkongwejo jwasasile kuti babagwe ŵajasiche mundaŵi ja mlili. Jwalakwe jwatite, “Napochelaga yikalata kutyochela kwa jemanja, mwamti nalipekene mpela Mlungu akumba chindu chanasosekwaga pandaŵi jakwe.” Katelyn ŵampepesye jwamkongwejo ligongo lyachiwa cha babagwe. Kaneko ŵakambilene ni jwamkongwejo Lijiganyo 02 mu kabuku ka Asangalaleje ni Umi. Ŵaŵalasile malemba gagakusasalaga yakwimuka kuchiŵa mu lijiganyoli. Jwamkongwejo jwatandite kulila, soni jwasasile kuti palisikuli ni pachakwanaga chaka chiwile babawo. Jwamkongwejo jwampele Katelyn nambala jakwe ja foni soni jwakundile kuti Katelyn chamsimanesoni ulendo wine. Pali papite ndaŵi Katelyn ŵapochele utenga pa foni jakwe wakuti, “Sikomo kwejinji. Lelo nasosekwaga kulimbikasya.”

Ngatukukayichila kuti Yehofa akutukamuchisya patutandilesoni masengo gakulalichila nyumba ni nyumba soni pamasengo gapadela gakutandikasya majiganyo ga Baibulo. Tukwembecheya kola yakuyichisya yambone.—Yohane 4:35.