Ngondo jili jitandite ku Ukraine, mlongo jwine jwangalombedwa jwa yaka 46 lina lyakwe Iryna Makukha, jwapite ku malo gakwelela sitima ku Kharkiv. Mlongoju jwaganisisye kuti mpaka yiŵe chenene kutyoka m’chilambocho. Gulu ja ŵandu jagambaga kwela sitima ali ngakumanyilila kwakwawula. Sitima jiŵakwesile Iryna jawugalidwe mawindo gosope ni chakulinga chakuti umi wa ŵandu ukaŵa pangosi. Paŵanyakwiche pa malo gakwelela sitimaga ni paŵamanyilile kuti sitimaji jikwawula ku Slovakia.

Pa Malichi 3, 2022, Iryna jwajinjile m’chilambo cha Czech Republic chachili chiŵandika ni chilambo cha Ukraine. Mwamti jwalakwe akutama ku likulu lya chilambochi ku Prague. Jwalakwe ŵapatile masengo gakusamalila panyumba. Masengoga akusakamula yalumo ni alongo ŵaŵatisile soni ngondo ku Ukraine. Iryna akulijiganya chiŵecheto cha ku Czech mwamti atandilesoni utumiki wandaŵi syosope waŵele ali mkutenda kwa yaka 20.

Iryna jwatite, “Nayiweni kuti Yehofa akutusamalila kupitila mugulu jakwe. Yeleyi yilimbikasisye mnope chikulupi changu.”

Abale ni alongo chiŵandika 23,000 ŵasagwile kutilila m’yilambo yine. Atamose kuti jemanjaji apatile malo gambone gakutama, nambope akusosekwa kupata masengo, nyumba, yikalata yakwakunda kutama m’yilamboyo, kwalembechesya ŵanache ŵawo sukulu soni kulijiganya chiŵecheto chasambano. Jemanjaji ayiweni kuti kutenda yindu yausimu soni chinonyelo chakwalosya abale ni alongo pachilambo chosope ni yayikwakamuchisya mnope mu ndaŵi jakusawusyaji.

Anatoli Perceac ni ŵamkwakwe Olena, soni mwanache jwakwe jwa yaka 17 Alina, akutama ku Romania panyuma pakuyiwona kuti ŵandu ŵaŵatamaga chiŵandika ni jemanjaji ku Mykolaiv Oblast, ku Ukraine ŵaŵulichisye mabomba. Jemanjaji ŵayiche mchilambochi pa Malichi 6, 2022. Ligongo lyakuti Anatoli ŵaliji msika jwa ku Moldova, jwalakwe ŵamkundile kujigala liŵasa lyakwe ni kwaula ku Romania. Olena jwasasile kuti kusamila ku chilambo chine yili mpela “kuchichuŵa chitela nikuchijawusya ku malo gane.”

Nichikamuchisyo cha abale ŵa ku Romania, liŵasali lipatile sano malo gawogawope gakutama. Konjechesya pelepa, Anatoli ni Olena agapatile masengo soni mwanache jwawo Alina amalisisye majiganyo gakwe kusukulu ja ku Ukraine kupitila pa intaneti.

Abale ni alongo ŵa ku Romania ngaŵa kuti agamba kulikamuchisya liŵasali mwakuchilupe, nambo akulikamuchisyasoni mwausimu. Jemanjaji akupataga ndaŵi jakukunguluka ni liŵasali ni chakulinga chakuti akalipikanaga kuti ali achalendo m’chilambocho. Olena ni Alina akulijiganya chiŵecheto cha ku Romania pakamulichisya masengo JW Language app. Jemanjaji akukamula masengo gakulalichila yalumo ni mpingo wasambano ŵakusongana. Anatoli akusaŵechetaga Chiromaniya.

Anatoli jwatite, “Tuŵele tuli mkuliwona ligasa lya Yehofa kutandila pandanda. Tukuchiwona chinonyelo cha Yehofa kupitila mugulu jakwe soni yakututendela abale ni alongo.”

Ngondo mkanijitande, Alina Havryliuk yalumo ni mwanache jwakwe jwamkongwe jwa yaka 16 lina lyakwe Vladyslav, jwayiche mtawuni ja Suwałki, ku Poland, kutyochela ku Vinnystia, mchilambo cha Ukraine, mu Febuluwale 27. Jwalakwe jwatite, “Pandanda naliwusyaga kuti chingatameje kwapi une ni mwanache jwangu nambosoni kuti ana chitupateje chamtuli yakusosechela paumi. Nambo nakwete chikulupi chakuti Yehofa chatusamalileje”.

Alina, jwakwete yaka 37, jwatandite kusosasosa masengo gakuti gampeje mpata wakuti asonganeje. Jwalakwe jwakombwele kupata masengo gakuswejesya pa sukulu. Mwamti jwatite, “Umbone wekulungwa ni masengoga uli wakuti ngusapata mpata wakulalichila soni ngusakombola kulikamuchisya liŵasa lyangu.”

Alina ni Vladyslav akulijiganya Chipolish. Jemanjaji ali apayiniya ŵakamuchisya ŵakutumichila mumpingo wa Chipolish. Apano Vladyslav jwatandite kulijiganya ku sekondale.

Atamose kuti abale ni alongo ŵetu ŵa ku Ukraine yindu paumi wawo yikuchenga soni akusimana ni yipwetesi yekulungwa mnope, nambo Yehofa akupitilisya kwapa jemanjaji machili. Jemanjaji ayiweni kuti yalikusasala lilemba lya 2 Akolinto 4:8 yili yisyene. Lilembali likusati, “Yakusawusya yakulekanganalekangana yikutukanganika mnope, nambo ngaŵa mpaka kulepela kwenda. Tukumalaga lunda, nambo ngaŵa mpaka kusoŵa pakamula.”