Jwamkulungwa jwa mumpingo jwine jwajimbile foni kwa m’bale Femi Durodola ni ŵamkwakwe cha m’ma 5:00 kundaŵi. M’baleju jwalisalile liŵasali kuti, “Aŵe ŵakoseka ligongo lyakuti asilikali ŵa ku Russia akwika ku Kyiv.” Ŵamkwakwe ŵa Femi Durodola ŵaŵechete kuti. “Pandaŵiji wangamwile woga mnope.”

Liŵasa lyasambanoli lyajimwiche, kaneko ni kulya yakulya ya kundaŵi soni ŵatesile lilemba lyalisiku. Lilembali lyasasile kuti: “Chimchikolasoni machili naga mkutenda yindu mwakuwusimana mtima, soni naga mkulosya chikulupi.” (Yesaya 30:15, NWT.) Ndaŵi jijojo Femi ŵapopesile kwa Yehofa kutyochela pasi pamtima. Femi ni ŵamkwakwe ŵakutama ku Ukraine, ŵajigele chikwama cha pangosi ni kutilila ku Netherlands. Jemanjaji ŵalesile yindu yosope yiŵakwete.

Yeleyi ni yatesile abale ni alongo ŵetu ku Ukraine, ŵele ŵasagwile kutilila m’yilambo yine ligongo lya ngondo jiŵajitandite asilikali ŵa ku Russia pa Febuluwale 24, 2022. Ku Ukraine kwana ŵa Mboni sya Yehofa chiŵandika 130,000. Pakwikanaga apano, ŵa Mboni ŵakupunda 36,000 ŵasagwile kutila m’majumba gawo, soni ŵakwana 16,000 asagwile kutilila m’yilambo yine. Ŵajinji mwa abale ni alongoŵa alesile majumba, masengo nambosoni Nyumba sya Uchimwene. Pandaŵi jangondoji, achalume ŵakwete yaka yakutandila 18 mpaka 60 ngakukundidwa kukopoka mchilambochi. Nambope, achalume ŵa m’yilambo yine ni ŵakwakunda kukopoka.

Ŵanduŵa pakutila agamba kujigala yindu yamnono yayili yakusosechela paumi. Ulendowutu ukuŵaga wakusawusya mnope ligongo akukamulichisyaga masengo sitima soni mabasi. Mwamti pakwesile ngakumanyililaga kwachiwukamalile ulendowu. Chikulupi chawo kwa Yehofa, chikwakamuchisya kuti atile ngondoji mchilambo chawo atamose kuti ngakumanyilila kuti chachiwujilasoni.

Ŵamkwakwe ŵa Femi Durodola ŵatite: “Twalesile chilichose, mwamti twagambile kujigala yindu yamnono. Yiyatendekweyi yatukumbwisye kuti, unasi wetu ni Yehofa ni wawuli wakusosekwa mnope.”

Mlongo Lilia Antoniuk jwakusatama ku Kyiv, jwapikene chimanyisyo chakuti kukwika mabomba. Kaneko jwalakwe jwapikene kuwulika kwa mabombago. Pandaŵiji m’misewu mwaliji magalimoto gepye. Nambosoni majumba ni milato yajonasiche.

Mlongo Lilia ni mwanache jwakwe jwamkongwe jwa yaka 17, ŵaganisisye yakuti atile m’chilambochi. Jemanjaji ŵaganisisye yakutilila ku Poland, mwamti ŵajesile masiku gejinji ali akwesile sitima jijagumbele ŵandu. Pa ulendowu, jemanjaji ŵajigele yakulya yamnono soni ŵajimi kwa ndaŵi jelewu ali mu sitima. Alongoŵa ŵatandite kuwusimana mtima paŵayiche mu msinda wa Przemyśl wawuli ku Poland.

Mlongo Lilia jwatite, “Patwagambile kwawona abale ni alongo ali ajigele yikwangwani yelembe ‘JW.ORG’ twamanyilile kuti jemanjaji chatusamalile.” Abale ni alongoŵa, mkanamsalile mlongoju ni mwanache jwakwe kwachakatameje, ŵajigalile kaje ku Nyumba ja Uchimwene ni chakulinga chakuti akalimbikasye, akalye nambosoni kuti akapumule.

Mlongo Lilia, jwele apano juli ku Germany jwatite, “Twayiŵene kuti Yehofa jwatusamalile soni chikulupi chetu chalimbile mnope. Ngumyamichila mnope Yehofa soni abale ni alongo ŵele ŵaŵangamuchisye mu ndaŵi jakusawusyaji.”

Mlongo Anastasiia Kovalyova akulondesya yaŵatesile asilikali ŵa pandege pakwimuchila msinda wa Zaporizhzhia. Jwalakwe jwagaweni malamba ga moto gagatyochelaga mu wuti syaŵagombelaga asilikali. Nambosoni jwapikene kulila kwa wuti ku nyumba jakwe. Ligongo lyakuti ma bomba gagambaga kulila palipose, mlongo Anastasiia pampepe ni msuŵani jwakwe jwamlume jwa yaka 7 soni jwamkongwe jwa yaka yitatu wakamwile woga, mwamti jemanjaji ŵaganisisye yakutila. Mlongo Anastasiia jwatite, “ligongo lyakuti twajigele yindu yamnono, nganitukola yakuwala soni yindu yine. Nambo abale ŵatupaga chilichose. Mwamti twakwete chilichose chatwasakaga.” Mlongo Anastasiia, akwegwegwe ŵakongwe nambosoni ŵanache ŵala ŵatilile ku Germany kupitila ku Poland.

Mlongo Anastasiia Shchukina ni mamagwe, ndaŵi jilijose japikene kuti mabomba chigawuliche, ŵajuŵaga m’chipinda chapasi cha nyumba jawo jamwana. Jemanjaji ŵaliji apainiya ŵaŵatumichilaga ku dela kwakukusosechela ŵakulalichila ŵajinji m’tawuni ja mwana ja Brailiv ku Vinnytsia Oblast. Yaliji yakusawusya kuti asagule kutila kapena iyayi, nambo ngondo pajayiche pakusawusya ŵasagwile kutila. Jemanjanji ŵagambile kujigala yindu yakusosechela pa umi wawo. Nambosoni nganagona mwakwanila pa ulendo wa masiku gaŵili waŵajesile pa sitima. Mama ŵawo Anastasiia, yaliji yakusawusya kutila ligongo ŵakwete yaka 58 soni ŵalagaga ni uchekulu. Jemanjaji ŵakopochele 2 koloko ja ku ndaŵi mu msinda wa Rzeszów ku Poland. Mwamti abale ni alongo ŵapochele jemanjaji. Mlongo Anastasiia jwatite, “Atamose kuti kwaliji ku masikusiku abale ni alongoŵa ŵatujembecheyaga. Tukumyamichila mnope Yehofa soni yaŵatutendele abale ni alongo.”

Mumsinda wa Sumy, M’bale Andrzej Chyba jwakutyochela ku Polish ni ŵamkwakwe Elizabeth ŵakutyochela ku Britain yalumo ni ŵandu ŵane ŵajuŵile m’chipinda chapasi mnyumba sya abale. Jemanjaji ŵapikanaga kulila kwa ndege syangondo soni wuti. Atamose kuti yaliji myoyo, abale ŵalimbile mtima kulolela sewelo ja m’Baibulo ja mtwe wakuti, Wawo   Yehofa, . . . Une Ngusinakulupilila”. Seweloji jikusasala yaŵatesile Mwenye Hesekiya pandaŵi jele Asiliya ŵawujimuchile msinda wa Yelusalemu.

M’bale Andrzej jwali ku Poland yalumo ni ŵamkwakwe jwatite, “Abale ŵatutumichisyaga ngani syakulimbikasya sya mmalemba. Mwachisyasyo ŵatulimbikasisye ni maloŵe ga pa Salimo 27.”

Tuli ŵakusimichisya kuti Yehofa chapitilisye kwakamuchisya abale ni alongo ŵele ‘ŵalesile yindu yawo yosope,’ makamaka pakwembecheya ndaŵi jele ngondo jichimala pachilambo chosope mwakamulana ni Afilipi 3:8.