Pandaŵi ja mlili wa kolonawu, mipingo jejinji kusyungulila pachilambo chosope jikukamulichisya masengo matala gakulekanganalekangana kuti atendeje misongano. Nambo kwa abale ni alongo ŵakutama ku misi soni kwele netiweki jikusasawusyaga, akusasosekwa kulingalinga kuti atendeje misongano. Pakutenda yeleyi akusakuyagasoni malangiso gakuŵambalila ulwele wa kolona. Kwende tukambilane yisyasyo yine ya ku Africa.

Abale ni alongo ŵajinji ŵa ku Malawi, yili yakusawusya kuti atendeje misongano pakamulichisya masengo pologalamu ja pa foni jakulumbikanilana. Yili myoyo ligongo lyakuti netiweki jikusasawusya. Wiki jilijose, nyambi ja ku Malawi jikusatumisya misongano kwa achakulungwa ŵa mumpingo kupitila pa foni. Kaneko achakulungwaŵa, akusatumisya misonganoji kwa abale ni alongo ŵa mumpingo mwawo.

Nambope litala lyeleli lili lyakusawusya mnope kwa abale ni alongo ŵakwana 28 ŵa mpingo wa Tcharo. Mpingowu, uli ku dela ja matumbi mwamti ukusasimanikwa kumpoto kwa chilambo cha Malawi, mwakuŵandika ni nyasa. Matumbiga gakusatendekasya kuti netiweki jisawusyeje mwamti jwamkulungwa jwa mumpingo akusasosekwa kwenda lutando lwelewu kuti akayiche ku malo kwajili netiweki. Patesile dawonilodi misonganoji, akusawujila kwatyochele. Kaneko akusajawula kwa jwakulalichila jwalijose kukumpa misongano pakumtumichisya mu foni jakwe.

Pachangakaŵapa achakulungwaŵa ŵasangalele paŵakopochele kuti chiŵandika kumangwawoko mu nyasa ja Malawi, mukusasimanikwa netiweki mwangasawusya. Abaleŵa akusakwela wato kuti akatende dawonilodi misongano pa nyasaji. Yeleyi yikamuchisye kuti akajendaga lutando lwelewu.

Ŵakulolela madela kuti alimbikasye mipingo ja kumpoto chakungapilo lyuŵa kwa Mozambique, akusaŵecheta ngani syawo kupitila pa foni. Nambope yili yakusawusya kuti foni jimo jilumbikanye ŵandu ŵajinji. Myoyo ŵakulolela madelaŵa akwete mafoni gakusakamulichisya masengo pakwalumbikanya abale ni alongo ŵa mumpingo pakuŵecheta ngani.

Ŵane mwa abale ni alongoŵa akusatama ku madela gakuti netiweki jikusasawusya. Myoyo pajikwanile ndaŵi ja misongano, abale ni alongoŵa akusajenda m’misewu ja mwitinji mpaka ali ayiche pamalo gakuti pana netiweki. Payiche pamaloga jemanjaji akusatama pasi ni kupikanilaga misongano.

M’bale Yohane Vinho jwali jwakulolela dela kweleku jwasasile kuti, “abale ni alongo akusalingalinga kuti apindule ni misongano.” Mwamti yeleyi yikamuchisye kuti aŵe paunasi wambone ni Yehofa. Jwakulolela dela jwine lina lyakwe Carlos Cortazão jwaŵechete kuti, “Patulumbikene kupitila pa foni tukusalipikana mpela tuli mu Nyumba ja Uchimwene tuli mkupikanila ndemanga sya abale ni alongo soni kwimbila yalumo nyimbo. Kusala yisyene, tukulola umboni wakulosya kuti Yehofa akwakamuchisya ŵandu ŵakwe mwa usimu atamose kuti tuli mundaŵi ja ulwelewu.”—Yohane 21:17.