Atamose kuti ŵakutumichila Yehofa wosope akwete udindo wakulichenjela ku ulwele wa kolonafayilasi, yikusatukwaya mnope patupikene kuti abale ni alongo ŵetu ŵane awile ni ulwelewu. (Jwakulalichila 9:11) Chakutesya chanasa chili chakuti, abale ni alongo ŵetu 872 pachilambo chosope, awile ni ulwele wa kolonafailasiwu. Myoyo abale ni alongo akutenda yakomboleka pakwakamuchisya soni kwalimbikasya mwachitema ŵandu ŵawililwe. (1 Akolinto 12:26) Nambo kusala yisyene, abale ni alongo wetu pachilambo chosope, akutenda yeleyi ligongo lyakuti akusamdalilaga mnope Yehofa. Paja jwalakwe akusatendaga yindu mwakamulana ni maloŵe gakwe gagali pa Afilipi 4:7 gakuti chachitupa “mtendele wa Mlungu.”

Mlongo jumo jwapochele chikamuchisyo cha gulu ja Yehofa ali Hannchen Unnützer. Mlongoju ali mpayiniya jwapajika ku Bolzano, kumpoto kwa chilambo cha Italy. Chakutesya chanasa chili chakuti, ŵamkwakwe mlongoju, M’bale Manfred Unnützer, ŵawile pa Malichi 28, 2020, ni ulwele wa kolonafayilasi. M’bale Unnützer juŵele juli mkutumichila Mlungu kwa yaka 58, m’baleju jutumichile pampepe ni ŵamkwakwe kwa yaka 54. Kwa yaka 25 jemanjaji ŵatumichile yimpepe mpela ŵakulolela dela. Abale ni alongo chiŵandika 1,000 ŵa m’yilambo yakulekanganalekangana ŵalumbikene kupitila pa fidiyo kuti apikanile ngani jakulimbikasya jajikusaŵechetedwa pa malilo.

Mlongo Unnützer jwatite, “Nguyamichila mnope chinonyelo cha abale ni alongo. Jemanjaji nganandeka jika atamose kwa awala jimo. Kusala yisyene ŵandosisye chinonyelo chekulungwa. Ŵambaga yindu yakusosechela paumi soni kulimbikasya pakamulichisya masengo Baibulo. Ngusinanonyela mnope jemanjaji.”

Liŵasa line lyaŵalikamuchisye abale paŵawililwe lili lya Mlongo Maria Jose Moncada soni ŵamkwakwe Darwin. Jemanjaji akusatumichila mu dela ja chiŵecheto cha Chiquichua ku matumbi ga ku Ecuador. Chakutesya chanasa chaliji chakuti, achinangolo ŵa Mlongo Moncada, ŵali Mlongo Fabiola Santana Jordan, jwa yaka 56, jwaŵatumichilaga mpela mpayiniya jwakutamilichika, soni ŵamkwakwe, M’bale Ricardo Jordan, jwa yaka 60, jwaŵatumichilaga mpela mtumiki jwakamuchisa mu mpingo wa Praderas ku Guayaquil, ŵawile ni ulwelewu ali alwasile kwa masiku 6. Kupwatika pelepa, achalumbugwe ŵaŵili ŵa Mlongo Moncada ŵalwasilesoni ulwelewu nambo wosope ŵaponile.

Ligongo lya chanasa chekulungwa, jwalakwe jwasakaga kwenda ulendo wa maawala mcheche kuti akakamuchisye ŵachinasi ŵakwe kulinganya mwambo wa malilo. Nambope, panyuma pakupopela ŵayiweni kuti ngakusosekwa kwawula ku Guayaquil. Mmalo mwakwe, ŵalumbikene ni ŵachinasi ŵawo kupitila pa fidiyo. Mlongo Moncada jwatite, “Yikaŵe kuti twapite kukutama pampepe ni ŵachinasi ŵetu, nikuti tukaŵisile pangosi umi wetu soni wa achimjetu.”

Kusala yisyene, chiwachi “champweteche mnope” Mlongo Moncada. Nambo jwalakwe ni ŵamkwakwe ŵapitilisye kutenda yindu yausimu soni “nganaleka kupopela kwa Yehofa ndaŵi syosope kuti ŵakamuchisye.” Liŵasali lyapitilisye kosechela Chikumbuchilo cha chiwa cha Yesu. Jemanjaji ŵatesile yeleyi mwakugaŵilanjila majiganyo gawo ga Baibulo kumwambowu soni kuŵalanga ngani sya m’Baibulo syakusala yayatendekwe m’masiku gakumalisya ga umi wa Yesu pachilambopa. Jemanjaj ŵalalichilaga nawo mwakulemba yikalata soni kutenda nawo misongano ja mpingo kupitila pa fidiyo. Ŵachinasi ŵakwe ŵa Mlongo Moncada ŵakwana 9, ŵanganaŵa ŵa Mboni sya Yehofa ŵapochele yikalata yaŵatumichisye mlonguju yakwaŵilanjila ku Chikumbuchilo cha Chiwa cha Yesu. Ŵachinasiŵa ŵasimanikwepo pa chakutendekwachi.

Mlongo Moncada jwatite, “Yaliji yakulimbikasya kwawona ŵakulijiganya Baibulo ali mkutenda yakomboleka kuti alumbikanye ni kutenda nawo msonganowu atamose kuti yayaliji yakusawusya kwa jemanjaji. Jwalakwe jwasasilesoni kuti, “Yaliji yakulimbikasya kwawona achalongo achimjangu ŵakutama m’yilambo yine ali alumbikene nawo pakusaka kupikanila ngani ja Chikumbuchiloji.”

Mlongoju jwapitilisye kuti, “Yatusimene nayoyi yilosisye kuti patusimene ni yakusawusya, chindu champaka chitukamuchisye kumalana ni yakupweteka chili kutenda yampaka tukombole pakumtumichila Yehofa. Kaneko nombe Yehofa akusatendaga mbali jakwe.”

Abale ni alongo pachilambo chosope tukulila pampepe ni ŵandu ŵakulila ligongo lyakuti ŵakunonyelwa ŵawo ajasiche ni mlili wawupaliwu, soni chitupitilisye kwapopelela ŵandu ŵakulilaŵa. Tukwembecheya ndaŵi jele Yehofa chachimasya yakupweteka yosope mpela yilwele. Nambosoni pachachajimusya ŵakutumichila ŵakwe wosope ŵakulupichika ŵaŵawile.—1 Akolinto 15:21, 22.