Mwesi wa Nofemba, ŵa Mboni sya Yehofa pachilambo chosope, twagaŵile magasini ga Sanja ja Mlonda ja Na 2 2020. Magasiniji twagaŵile kwa ŵamalonda, ŵamwiŵasa soni kwa ŵandu ŵa chidwi. Chakulinga chagaŵila magasiniji chaliji chakuti, achakulungwakulungwa ŵa boma ŵali pa maudindo gakulekanganalekangana apochele magasiniji. Ma ofesi ga nyambi, gapochele malipoti gakulimbikasya panganiji.

M’chilambo cha Sierra Leone, jwaŵili kwa nduna jakulola ya Malo, Nyumba soni Mapulani Che Rex Bhonapha ŵalembile chikalata chakuyamichila ligongo lyakupochela magasiniji. Ndunaji jatite, “Magasiniji jili jakulimbikasya mnope soni jakamuchisya. Mwamti apano ngusajiŵalanga lisiku lililyose.”

Nduna Jekulungwa ja m’chilambo cha Samoa, jalembele abale chikalata chakwayamichila. M’chikalatachi, jwalakwe jwaŵechete kuti amanyilile kusosekwa kwa Lipopelo lya Ambuje. Konjechesya pelepa Pulesidenti jwa m’chilambochi (Tuimalealiifano Vaaletoa Sualauvi II) jwayamichile ligongo lya masengo gakwiganya Baibulo pakamulichisya masengo Sanjaji. Jwalakwe jwaŵechete kuti, “ŵandu pakulijiganya Baibulo pakamulichisya masengo Sanjaji, mpaka yakamuchisye kuti achenje umi wawo.” Jwalakwe ŵayamichilesoni abale ni alongo ligongo lyakuleka kusongana Nyumba sya Uchimwene soni kulalichila nyumba ni nyumba ligongo lya mlili wa COVID-19.

Mlembela jwine jwa boma mu msinda wine (Osvaldo Cartagena García) ku Chile jwatite, “Kugaŵila kwa magasiniji, kwakamuchisye ŵandu wosope ŵa mu chilambo chetu. Kutendekasisye kuti ŵandu ŵetu atendeje yindu yambone. Konjechesya pelepa kwakamuchisye kumanyilila yakusawusya yatukusimana nayo pachilambo chosope chapasi.”

Pungu jwine jwa ku nyumba ja malamusi (Deutscher Bundestag) ku German, jwalembele chikalata ŵa ku ofesi ja nyambi ja ku Central Europe jajili ku German. M’chikalatamo jwalakwe jwatite, “Dini ja jemanja ngujimanyilila chenene. Mwamti ngumanyilila chenene mwele ŵandu ŵa mu dini jenu mwakusaŵela ŵakulimba mtima pakulimanyikasya kuti ali ŵa Mboni sya Yehofa. . . . Ngumanyililasoni chenene ya yakusawusya yaŵasimene nayo mu ndaŵi ja ulamusi wa chipani cha Nazi.”

Mwakulandana ni yeleyi, achakulungwakulungwa ŵa boma ku German, ŵayamichile ŵa Mboni sya Yehofa ligongo lya kwalimbikasya ŵandu mundaŵi ja mlili wa COVID-19. Jemanjaji ŵatite, “Pakwalimbikasya ŵandu yikusakamuchisya kuti m’chilambo chetu ŵandu aŵeje ŵakamulana.”

M’chilambo cha Colombia, achakulungwakulungwa ŵa boma ŵalembile chikalata chakuyamichila ligongo lyakwapa magasini. Kutandila pandaŵi jelejo, jemanjaji ŵatandite kwasalila ŵane pa yaŵalijiganyisyeyo. Nduna jakulola yachilengedwe jalembile kuti, “Nguyamichila mnope pakumba magasiniji ligongo mwana utenga wakulupusya umi.”

Jwakwimila chilambo cha Ghana ku Japan, jwatite, “Magasiniji jili jakamuchisya mnope ligongo jikupeleka kwanga kwa yiwusyo yakusaliwusyaga ŵandu pakwamba yakusawusya yakusimana nayo.”

Nombe najo jwakwimila chilambo chine jwa ku Azerbaijan jwatite, “Nguyamichila mnope ligongo lyakumba magasini ga Sanja ja Mlonda ja pajikaji. Jili jakutesya chidwi kujiŵalanga.”

Tukukamulana ni yaŵaŵechete M’bale Amaro Teixeira jwakusalolela mu Dipatimenti Jakuwandisya Ngani ku nyambi ja Mozambique. Jwalakwe jwatite, “Kugaŵila kwa magasiniji kutendekasisye kuti paŵe yakuyichisya yambone yanganituyijembecheyaga. Kwa ŵandu ŵane yikaliji yakusawusya kwalalichila yakwamba Uchimwene wa Mlungu nambo yeleyi yikomboleche pandaŵi jeleji.”

Ngatukukayichila kuti chitupitilisye kupochela malipoti gakuyamichila kutyochela kwa achakulungwakulungwa ŵa boma soni ŵane. Sonitu yeleyi chitendekasye kuti utenga wa m’Baibulo wayichile ŵandu “wosope ŵakwete ulamusi.”—1 Timoteo 2:2.