Ligongo lyakuti ŵandu ŵachikulile ni ŵali pangosi mnope ni ulwele wa kolonafayilasi, jemanjaji akupikanila yakusala achakulungwakulungwa ŵa chipatala mwamti akutama pamlango. Nambope jemanjaji ngakwamba kutama, soni nganaŵa jikajikape. Mmalo mwakwe, akukamulichisya masengo yipangiso ya makono kuti atendeje misongano nambosoni kulalichila.

Ku Italy, mlongo jwine jwa yaka 94 jwaŵabatisidwe mu 1952, aŵele ali ngakutyoka panyumba ligongo lya yakusawusya yine ya m’chilu. Atamose kuti pandanda ŵapikanilaga misongano kupitila pa pologalamu ja JW Stream, nambope kwandaŵi jelewu yaliji yakusawusya kuti aloleleje misongano jajikutendekwa kumpingo wakwe wakusasongana. Nambo apano, achakulungwa ŵa mumpingo alinganyisye yakuti atendeje misongano pakamulichisya masengo mapulogalamu gane ga pa foni. Yeleyi yikumkamuchisya mlongoju kuti ŵawoneje abale ni alongo wosope soni kuti apikanileje misongano ja mumpingo wakwe.

Mlongo jwine jwakusalajilila kupikana jwa mu msinda wa Spanish Fork ku Utah m’chilambo cha U.S.A., lina lyakwe Stephanie Aitken, akusatama kumalo gakusunjila ŵandu ŵakalambale kwele apano akusakanya kuti ŵandu ŵane ajawulejeko. Jwamkulungwa jwa mumpingo jwine ni ŵamkwakwe ŵamkamuchisye mlongoju mwampaka aŵichile pologalamu jakutendela misongano mu foni jakwe. Jemanjaji ŵaŵechetanaga ni mlongoju ni makono ali ajimi chiŵandika pa ligalasi lya pamlango. Kaneko, Mlongo Aitken jwakombwele kuŵika pologalamu jila mu foni jakwe. Jwasangalele mnope mpaka kujikumbatila foni jakwe. Mlongoju akuyamichila mnope kuti akutendela yindu yalumo ni mpingo wakwe.

Yakutenda abale ni alongo pakukamulichisya masengo yipangiso ya makono mundaŵi ja kolonaji, yigamba kutukumbusya maloŵe ga Yehofa gakuti ŵandu ŵakwe ‘tachijonga mkaka wa mitundu jine.’ (Yesaya 60:16) Tukumanyilila kuti Yehofa chachapa ŵakutumichila ŵakwe yindu yakusosechela pandaŵi jakusawusya.