Pandaŵi ja mlili wa kolonafayilasi, ŵa Mboni sya Yehofa akupitilisya koposya ma Baibulo m’yiŵecheto yakulekanganalekangana. Pa Juni 28, 2020, Baibulo la Dziko Latsopano la Malemba Opatulika jakopweche m’yiŵecheto m’cheche. Yiŵecheto yakwe yili, Chiswati, Chitsonga, Chizulu soni Chitonga. Baibulo la Dziko Latsopano la Malemba Achigiliki jakopwechesoni mu Chikiliyo cha ku Belize, soni Chitotonaki. Atamose kuti abale ni alongo ngakusongana malo gamo ligongo lya mlili wa kolonafayilasi, nambope ŵaliji ŵakusangalala kupochela ma Baibulo payipangiso yamakono. Ŵandu ŵalolelaga pologalamu ja kukopoka kwa ma Baibuloga kupitila pa yipangiso yawo yamakono.

M’bale Geoffrey Jackson jwa mu Likuga Lyakulongolela, jwakopwesye Baibulo la Dziko Latsopano la Malemba Opatulika m’chiŵecheto cha Chiswati. Konjechesya pelepa jwakopwesyesoni Baibulo la Dziko Latsopano la Malemba Opatulika jelinganyesoni, m’chiŵecheto cha Chitsonga soni Chizulu. Ŵa Mboni sya Yehofa ŵa ku South Africa soni ku Eswatini ŵalolelaga pologalamuji kupitila payipangiso yawo yamakono.

Mu dela ja nyambi ja South Africa, chiŵandika ŵandu 18.5 miliyoni akusaŵechetaga Chiswati, Chitsonga soni Chizulu. Chiŵalanjilochi chikupwatikaposoni ŵa Mboni sya Yehofa ŵakwana 38,000.

M’bale Augustine Semo, jwa mu komiti ja nyambi ku Malaŵi, jwakopwesye Baibulo ja mtundu ja Dziko Latsopano la Malemba Opatulika mu Chitonga cha ku Malaŵi.

Kagulu ka ŵagapolela Baibuloji kakamwile masengo gagopolelaga kwa yaka yakupunda yiŵili. Jumo mwa ŵagopolelaŵa ŵasasile kuti, “Chiŵecheto cha Chitonga chikusaŵechetedwa mwakulekanganalekangana mwakamulana ni dela jakutama ŵandu. Ŵandu ŵa dela jine akusakamulichisyaga masengo maloŵe gakuti ŵandu ŵa ku dela jine ŵangagamanyilila chenene. Myoyo pagopolela twasagulaga maloŵe gakuti ŵandu ŵajinji agapikanichisye mwangasawusya. Konjechesya pelepa, Baibuloji jana maloŵe ga mwiŵanda gakwakamuchisya ŵandu kupikanichisya maloŵe gane.”

Jwagopolela jwine jwatite, “Ŵakulalichila gasalaga kujikamulichisya masengo Baibuloji mu utumiki atamosesoni pamisongano ja mpingo ligongo lyakuti chiŵecheto chakamulichisye masengo chili changasawusya soni chakupikanika chenene. Yeleyi yikulosya kuti Baibuloji jili jangasawusya kuŵalanga soni kujipikanichisya.”

M’bale Joshua Killgore jwa mu komiti ja nyambi ku Central America, jwakopwesye Baibulo ja Dziko Latsopano la Malemba Achigiliki mu Chikiliyo cha ku Belize. Ŵandu ŵakupunda 1,300 ŵalolele pologalamuji kupitila pa yipangiso yawo yamakono.

Kakugu ka ŵagopolela ŵakwana 6 kakamwile masengo gagopolelaga kwa chaka ni miyesi mcheche. Pakusala ya umbone wa Baibuloji, jumo mwa ŵagopolelaŵa jwatite, “Sambano abale ni alongo akwete Baibulo jegopoleledwe chenene soni jakudalilichika. Baibuloji chijakamuchisye ŵakulalichilawo kupikanichisya yindu mwangasawusya.”

Jwagopolela jwine jwaŵechete kuti, “Atamose kuti tuli mkati mwa mlili wa COVID-19, nambope abale ni alongo ŵakusaŵecheta Chikiliyo cha ku Belize chaŵalanjeje Baibulo m’chiŵecheto chawo. Yeleyi chiyalimbikasye soni kwakamuchisya kupilila yakusawusya yayikwisa kusogolo.”

M’chilambo cha Belize chikwete ŵakulalichila ŵakwana 867 soni mwana mipingo 19. Konjechesya pelepa ŵakulalichila ŵakwana 58 akusatumichila mu dela jajikusaŵecheta chiŵechetochi ku United States.

M’bale Jesse Pérez jwali mu komiti ja nyambi ku Central America, jwakopwesye Baibulo la Dziko Latsopano la Malemba Achigiliki mu Chitotonaki. Ŵandu chiŵandika 2,200 ŵa m’mipingo jakwana 50 m’dela ja nyambiji, ŵalolele pologalamuji kupitila pa yipangiso yawo yamakono.

Kagulu ka ŵagopolela kakamwile masengoga kwa yaka yakupunda yitatu. Baibuloji jiŵe jakamuchisya mnope pakulalichila ngani syambone kwa ŵandu ŵakupunda 250,000 ŵakusaŵecheta Chitotonaki ku Mexico.

Jwagopolela jwine jwatite, “Mwakulengana ni ma Baibulo gane ga m’Chitotaniki, Baibulo la Dziko Latsopano la Malemba Achigiliki jikwete maloŵe gakusagakamulichisya masengo ŵandu lisiku lililyose. Sambano ngatulagaga kulondesya chenene ngani sya m’Baibulo kwa ŵandu ŵa mu dela jetu.

Jwagopolela jwine jwaŵechetesoni kuti, “Abale ni alongo ŵetu aŵele ali mkusaka Baibulo mpelaga jeleji kwandaŵi jelewu. Ŵane mwa abaleŵa aŵele ali mkugopolela jika ndime sine sya M’Baibulo pakwete ngani mu misongano ja mkati mwa wiki. Abaleŵa aŵele ali mkugopolela kutyochela ku Baibulo ja Chisipanishi. Nambo yeleyi ngayitendekwagasoni naga lilemba lyakulisakalyo lili mbali ja Malemba ga Chigiliki.”

Chindu chakusangalasya mnope ni Baibuloji chili chakuti jikwete maloŵe gamwiŵanda gagakusalondesya kugopela kwa maloŵe gane gagali mu ndime. Maloŵe gamwiŵandaga gali gakamuchisya kwa ŵandu ŵakusaŵecheta mtundu wine wa Chitotonaki. Yeleyi chiyitendekasye kuti ŵandu wosope ŵakusaŵecheta Chitotonaki ajinonyeleje Baibuloji.

Tukusangalala yalumo ni abale ni alongo ŵapochele ma Baibulo gelega m’yiŵecheto yawo. Tukumanyilila kuti chikulupi chawo chichiŵe chakulimba pakukamulichisya masengo ‘upanga wa msimu’ mu utumiki soni pakulijiganya kwawo kwapajika.—Ahebeli 4:12.