Msongano Wachigawo wa 2020 wakuti, “Aŵeje Ŵakusangalala” watendekwe mulitala lyakuti nganilitendekweje chitandilile. Msonganowu wagopoleledwe m’yiŵecheto yakupunda 500 mwamti ŵandu ŵalolelaga msonganowu ali msimangwawo. Ŵagopolela nganakola yida yakwanila pamasengo gawo soni nganakola ndaŵi jakwanila jakutendela masengoga.

Mlongo jwine jwakusagopolela m’chiŵecheto cha Kikuyu ku Kenya jwasasile kuti, “Ligongo lyakuti abale ni alongo ngakwikasoni ku ofesi kuno soni m’weji ngatukukopoka pasa, yeleyi yitendekasisye kuti tukole ŵandu ŵamnono ŵakusosekwa kwajambula maloŵe. Nambo twamalene ni chakusawusyachi pakamulichisya masengo abale ni alongo wele ŵakamulaga ali msimangwawo. Yaliji yakusimonjesya mnope kuti msimu wa Yehofa ŵatukamuchisye.”

Nombe nawo ŵagopolela ŵa chiŵecheto chamakono cha ku Korea soni ŵagopolela ŵa m’chiŵecheto cha Chikorea ŵasimene ni chakusawusya chakulandanachi. Yaliji yakusawusya kuti abale ni alongo ŵakusakamulilaga masengo ali kumangwawo ajawule ku beteli kukwajambula maloŵe.

Pakusaka kumalana ni chakusawusyachi, abale ŵalinganyisye malo gakwambulila maloŵe msimangwawo. Abale ŵa mu delaji, ŵakamuchisye mwakupeleka yida yakwambulila kwa abaleŵa. Konjechesya pelepa, ligongo lyakuti misongano jekulungwakulungwa ŵaliji ali asasile kuti ngatutenda, ofesi ja nyambi jakamulichisyaga masengo yida yakwambulila yayatyochele m’malo gakutendela misongano. Yidayi yakamuchisye pakwambulila ngani sya mu chiŵecheto cha makono.

Ku Venezuela, yaliji yakusawusya kwa ŵagopolela kukamula masengoga ligongo lyakusawusya kwa Intaneti. Ŵane nganakola yida yakwambulila yakwanila. Nambo ŵagopolelaŵa ŵakamulichisye masengo yiliyose yakakombwele pakusaka kuti masengo gawo gakomboleche. Mwachisyasyo ŵagopolela ŵa mu dela jine ŵakamulichisyaga masengo matilesi nichakulinga chakunondiya masegwe pakwambula.

Ŵagopolela ŵa mu dela ja Juba ku South Sudan akusagopolelela mu chiŵecheto cha Chizande. Jwagopolela jwine jwasasile kuti, “Panapikene kuti chitujambule msongano wosope, nayiweni kuti yeleyi ngayikomboleka. Nganituŵa tukombwele kwambula msongano wosope wawukwete mafidiyo gakupunda 90 mkati mwa miyesi jiŵilipe.’ Myoyo pakuyiwona kuti masengoga gakomboleche, ngwete chikulupi chakuti pangali chilichose champaka chimlepelekasye Yehofa kwanilisya chakulinga chakwe. Yehofa akusatenda yindu mwakusimonjesya.”—Mateyu 19:26.

Msongano wachigawo wa 2020 waliji mtuka wakutyochela kwa Yehofa, “jwakusasaka kuti jwalijose akulupusidwe nambosoni kuti amanyilile chakuwona chisyesyene.”—1 Timoteo 2:4.