Ŵa Mboni sya Yehofa ngasaliŵalila masengo gakulalichila gaŵatesile m’mwesi wa Nofemba chaka cha 2020. Ulwele wa kolona utendekasisye kuti ŵajinji tukatyokaga panyumba. Yeleyi yitendekasisye kuti tujimichile kaje panandi matala gatuŵele kugakamulichisya masengo pakulalichila. Atamose yili myoyo, ŵandu ŵa Yehofa ŵakombwele kwalalichila ŵandu ŵajinji pachilambopa yakwamba Uchimwene wa Mlungu. Jemanjaji ŵaŵele ali mkwapa ŵa mabisinesi, achakulungwa ŵa boma, achitichala, ŵachibale ŵawo soni achimjawo Sanja ja Mlonda Na 2 ja 2020. Masengoga galimbikasisye ŵandu wosope ŵaŵakundile kwalalichila. Sonitu abale ni alongo ŵaŵakamwile nawo masengoga ŵasangalele mnope mwamti chikulupi chawo chalimbile.

Kwende tulole yaŵasimene nayo abale ni alongo ŵane paŵakamulaga masengoga:

Mlongo Lucinda Furkin akwete yaka 18. Jwalakwe akusatama ku Australia soni abatisidwe pamkaŵapa. Mlongoju jwalembile kuti, “Patwatandaga kukamula masengo gakulalichilaga naliji ndili mkulwala. Nambope nayiwonaga kuti Yehofa akungamuchisya. Yaliji mpela akamwile mkono ŵangu nikunimbikasyaga kuti ngombole kupilila.”

Mtati jwine jwa ku New Zealand jwasasile kuti masengoga gakamuchisye mnope liŵasa lyakwe. Jwalakwe jwatite, “Ngwete ŵanache ŵachakongwe ŵakwana mcheche. Jwine akwete yaka 7, jwine 9, jwine 11 soni jwine 13. Wosopewe twayiweni kuti Yehofa Mlungu jwetu jwachinonyelo atupele masengoga. Yeleyi yatutendekasisye kuti tugakamule mwakulipeleka mnope.”

M’bale Kagiso Marumo ni ŵamkwakwe Lydia ali ŵakulolela dela. Jemanjaji ŵatumichisye ŵachibale ŵawo ŵanganaŵa ŵamboni magasini kupitila pa foni. Ŵajinji mwa jemanjaji ŵayamichile mnope. Jwachibale jwine jwa M’bale Marumo jwalisoni dokotala, ŵasasile kuti magasiniga gayiche pandaŵi jakwe. Jwalakwe ŵasasile kuti ŵakulwala ŵane akwete yiwusyo yakwamba Mlungu soni Baibulo. Jwasasilesoni kuti ŵanache ŵakwe ŵane akujigalika mnope ni yamisimu. Kaneko M’bale Marumo ni ŵamkwakwe ŵatandite kumjiganya jwachibale jwawojo Baibulo kutandila chilo cha lisiku lyeleli. Sonitu apano akulijiganya kaŵili pa wiki.

Mlongo Soroya Thompson akusatama ku Ontario. Jwalakwe ali Mpayiniya mwamti jwalembile kuti, “Masengoga gangamuchisye kuŵika nganisyo syangu pa yindu yakusosekwa mnope. Nambosoni kumanyilila kuti pana ŵandu ŵajinji ŵatukusosekwa kwalalichila. Gangumbwisyesoni kuti Yehofa akusiŵanonyela mnope ŵandu. Sonitu yalosisye kuti yili yisyene kuti jwalakwe akusasaka kuti ŵandu wosope chakulupuche. Kukumbuchila yeleyi kwangamuchisye kuti ngamule masengoga mwakulipeleka mnope.”

Mlongo jwine jwa ku British Columbia jwasasile kuti, “Mu ndaŵi jakusawusyaji naganichisye yakutenda upayiniya wakamuchisya kuti ngagambaga kuganichisya ya yindu yatukusimana nayo. Yeleyi yandendekasisye kuti sangalaleje soni yakamuchisye liŵasa lyangu.”

Abale ŵa ku ofesi ja nyambi ja ku Canada, ŵasasile kuti masengoga gagamuchisye kuti maŵasa gaŵeje gakamulana. Nombe nawo ŵanache ŵaliji ŵakusangalala ligongo ŵakamwile nawo masengo gelega. Mwachisyasyo, jemanjaji ŵalembaga nawo yikalata, ŵakamuchisyaga ŵandu ŵa mwiŵasa mwawo kulemba pa inifolopi kwachikwawula chikalatacho soni ŵawungunyaga ma adilesi ga ŵandu.

M’bale ni Mlongo Tuomisto ali ŵakulolela dela. Jemanjaji ŵasasile kuti, “Mwesi wa Nofemba ulwelewu wasawisye mnope akuno ku Finland. Nambope masengo gakulalichilaga gakamuchisye abale ni alongo mnopemnope apayiniya kuŵa ŵakusangalala.”

Liŵasa line lyapochele chikalata kutyochela kwa mundu juŵampele magasini. Maloŵe gane ga mchikalatachi galiji gakuti, “Lelo, [mbalasile Baibulo m’buku] ja Yakobo. Jajikusaŵecheta kuti chikulupi changali yitendo chili chewe. Ŵa Mboni sya Yehofa aŵele ali mkwalalichila ŵandu soni kwajiganya Baibulo. Yeleyi yikusalosya kuti jemanjaji akwete chikulupi.”

Abale ŵa ku Ofesi ja Nyambi ja ku Greece ŵasasile kuti, “Ulwele wa kolona utendekasisye kuti ŵandu ŵajinji alajeje nganisyo. Sonitu jemanjaji apesile mnope ni lilamusi lyakuti agambeje kutama pa nyumba ngajendajenda. Nambo masengo gakulalichilaga galimbikasisye mnope. Ŵajinji ŵasasile kuti masengoga gakamuchisye kuti akalagasikaga mnope ni nganisyo.”

Mlongo Suzie Kontargiri ŵaganisisye yakutenda upayiniya wakamuchisya atamose kuti akusalaga ni ulwele soni kuti ŵamkwakwe nganaŵa ŵamboni. Jwalakwe ŵasasile kuti, “Masengo gakulalichilaga gandendekasisye kuti ngalagasikaga nganisyo. Pajimwiche nakamulaga masengo ga kundaŵi, kuteleka yakulya, kwasamalila ŵamkwangu soni kaneko natandaga kulalichila. Ndaŵi syejinji ŵamkwangu ŵambusyaga kuti, ‘Ana lelo ngamlalichila?’ Yaliji myoyo ligongo ndaŵi syejinji ŵambonaga ndili mkulalichila yimpepe ni achimjangu.”

Mlongo Tamaki Hirota juŵalembele achakulungwa ŵaboma yikalata jwatite, “Yehofa ali jwandanda kwalalichila ŵandu pakamulichisya masengo yikalata. Jwalakwe jwalembile yikalata yakwana 66 yele ŵandu aŵele mkuyiŵalanga kwa yaka yejinji kuti aŵe najo paunasi. Yehofa ŵamanyilile kuti lyeleli lili litala lyambone. Kusala yisyene masengo gatukamwilega gali gangaliŵalichika.”

Yatendekwe kuti Mlongo Meharaja Vijaya ni Imayanathan Amutha ŵamlembele mundu jumo yikalata mwangamanyilila. Mundujo paŵapochele chikalata chandanda nganachiŵalanga ŵagambile kuchijasa. Nambo paŵapochelesoni chikalata chaŵili ŵayiweni kuti yikalatayi yikwete utenga wakusosekwa. Myoyo jwaganisisye yakuchiŵalanga. Jwalakwe ŵaŵalasilesoni maganisi mwamti ŵamjimbile foni mlongo juŵatumisye chikalata chiŵili jula. Kaneko jwalakwe jwakundile kuti atande kulijiganya Baibulo.

Panyuma pakupochela Sanja ja Mlonda jwamkulungwa jwa boma jwine, jwajimbile foni ku ofesi ja nyambi ja ku Sri Lanka. Jwalakwe jwasasile kuti atamose ali jwa Chiklistu nambope nganasimanejepo ni Ŵa Mboni sya Yehofa. Panyumba pakuyamichila yindu yaŵaŵalasile m’magasiniji soni yindu yayili pa webusayiti jetu, jwalakwe ŵawusisye kuti, “Ana mpaka ndende chichi kuti mbe Jwa Mboni sya Yehofa?’ Ndaŵi jijojo abale ŵatesile yakuti munduju atande kulijiganya Baibulo.

Jwamboni jwine jwa yaka 13, jwasasile kuti masengo gakulalichila ga mwesi wa Nofemba gamkamuchisye mnope. Jwalakwe akusalijiganya pasukulu jele ŵandu akusanonyela kukambilana ya ndale. Jwalakwe jwatite, “Nasalile achitichala ŵangu yayikusatendekasya kuti ngajinjililaga nawo ya ndale. Yeleyi yilimbikasisye chikulupi changu.”

Nombe najo Mlongo Margit Haring jwasasilesoni mwaŵapikanile. Jwalakwe jwalembile kuti, “Nalijiganyisye kuŵa jwakulimba mtima. Pandanda natendaga woga kwalalichila achakulungwa ŵa boma soni ŵa mabisinesi. Nambo apano nalijiganyisye kwalalichila ŵandu mwakuwusimana mtima. Sonitu yeleyi yingamuchisye kukosechela yampaka ndendeje kusogoloku.”

Jwamkulungwa jwa mumpingo jwine jwasasile kuti, “Yalimbikasisye mnope kwawona ŵandu ŵajinji ali mkutenda upayiniya atamose kuti akulagasika ni yilwele yakulekanganalekangana. Yikakomboleche jemanjaji kuyiwona kuti nganakola machili gakwanila. Nambope ŵawuweni welewu kuŵa upile wawo kuti akamule nawo masengo gapajikaga. Kumanyilila kuti Yehofa soni abale ni alongo akusayamichila soni kusangalala ni masengo gaŵakamwile kukusagamba kututendekasya kuti tukoposyeje misosi.”

Pana yindu yejinji yakusangalasya yaŵasimene nayo abale ni alongo. Nambope nganituŵa tukombwele kuyilondesya yosope. Kusala yisyene tukusaŵa ŵakusangalala mnope kwalalichila ŵandu ŵajinji ngani syambone.—Yoh. 15:11.