MEYI 9, 2022
NGANI SYA PACHILAMBO CHOSOPE

Yehofa Akugakamuchisya Maŵasa ga mu Dela ja Crimea Kupilila Yakusawusya

ALOLELE

Luŵala lwa magambo mu boma ja Nakhimovskiy ku Sevastopol pachangakaŵa chilulamule magambo ga abale aŵa: Vladimir Maladyka, Vladimir Sakada, soni Yevgeniy Zhukov. Nambo ŵakwimila boma pa magambo nganasala chilango chakusaka kuti ŵanduŵa apochele.

Mwajijendele nganiji

Okotoba 1, 2020

Kagulu kane ka asilikali ka FSB kakasile ni kwinjila m’nyumba sya ŵa Mboni sya Yehofa ku Sevastopol kupwatikasoni nyumba ja M’bale Maladyka, Sakada soni Zhukov. Asilikali paŵatendaga chipikisheni mu nyumba ja m’bale Maladyka, ŵakasimene kabigili ka mkaka. Ni jemanjaji ŵatiga mkakawo wawonekaga mpela mitela jijikusalekasya boma, mwamti asilikaliŵa ŵamtumisye M’bale Maladyka ni ŵamkwakwe ku chipatala chakuwungunya naga mtwe ukukamula chenene masengo gakwe. Nambo mlongo jula ŵamkopwesye lisiku lilyolyo. Nambo M’bale Maladyka, yalumo ni M’bale Sakada soni Zhukov ŵataŵile nikwasunga mu chitolokosi kwakandaŵi. Mwamti lisiku lyakuyichisya lyakwe, ŵasamichisye ku ndende kuti akajembecheye lisiku lyakwajimba magambo
Malichi 23, 2021

M’bale Sakada ŵamkopwesye mundende ni ŵam’ŵisile pa ukayidi ŵangatyoka panyumba. Jwalakwe ŵampele kachipangiso kane, kuti awaleje ni chakulinga chakuti kamanyisyeje naga m’baleju akukamulichisya masengo Intaneti, kwimba foni kapena naga akulumbikana ni abale ŵane ŵaŵaliji najo yalumo pamagambogo
Malichi 30, 2021

M’bale Maladyka ŵamkopwesye kundende soni ŵamlamwile kuti aŵe pa ukayidi wangatyoka panyumba
Meyi 17, 2021

Pali pamasile miyesi 7 M’bale Zhukov ŵamkopwesye kundende kula ni ŵamlamwile kuti aŵe paukayidi ŵangatyoka pa nyumba
Sepitemba 30, 2021

Lisiku lyagatandite magambo

Mbili ja Ŵanduŵa

Vladimir Maladyka

Chaka chakupagwa: 1963 (Mu dela ja Yenakievo ku Ukraine)

Mbili ja umi wakwe: Ŵakamulaga masengo gakulinganya ndeje kwa yaka yejinji. Ŵalombele Nataliya mu 1986

Liŵasa lyaŵapagwile Maladyka palyasimene ni yakusawusya, jwalakwe jwatandite kusaka kuŵa paunasi ni Mlungu. M’pwakwe ni juŵamkamuchisye kuti amanyigane ni ŵa Mboni sya Yehofa. Jwalakwe yalumo ni ŵamkwakwe ŵabatisidwe mu 1997

Yaŵaŵechete M’baleju

Ana Yehofa akamuchisye chamtuli liŵasa lyawo kupitila mwa abale ni alongo?

Panaliji kundende, abale ni alongo ŵakamuchisyaga ŵamkwangu mwakwapa yakusosechela ya paumi, kwakamuchisya kuti akalagaga nganisyo soni ŵakamuchisyaga mwausimu. Mwamti ndaŵi syosopeŵatumichisyaga utenga pafoni soni kwatumichisya ma kadi ni chakulinga chakuti amanyilile mwayiŵelele yindu pa umi wawo. Ŵane ŵajawulaga kunyumbako kukwalimbikasya meso ni meso.

Ŵajinji mu mpingo wawuwonaga kuŵa upile wawo kutenda yiliyose yampaka akombole kuti akamuchisye. Mwamti abale ni alongo wosope mumpingo ŵapelekaga chikamuchisyo chawo mwachitema. Soni abaleŵa ŵatendaga yindu mwakamulana mnope pakupeleka chikamuchisyochi.

Vladimir Sakada

Chaka Chakupagwa: 1970 (Kyiv, Ukraine)

Mbili ja umi wakwe: Ŵalijiganyisye kukamulichisya masengo mtundu wa machini gane soni pakwete pakamwile masengo ga usilikali. Apano akusakamulaga masengo gayakutaŵataŵa. Jwalakwe ŵalombele Svetlana mu 2005

Vladimir ŵapagwile mu liŵasa lyangakulupilila Mlungu. Nambo jwatandite kola lung’wanu ni Baibulo panyuma pakuti mjakwe amlosisye lina lya Mlungu. Jwalakwe jwalijiganyisye kuti Maloŵe ga Mlungu gali gakamuchisya paumi. Soni m’chaka cha 1991 jwalakwe jwabatisidwe

Yaŵaŵechete M’baleju

Ana wawojo ni ŵamkwawo alijiganyisye yamtuli yakusosekwa kwa kumlambila Mlungu mwakutamilichika?

Mbali syosope syakwayana ni kulambila Mlungu sikusaŵaga syakamulana. Soni sikusakamulaga masengo mwakamulana mpela minowu ja m’chilu. Mpela mwayikusaŵelaga kuti minowo ja m’chilu jikusaŵaga jakulimba patukutenda masewela gakulimbisya chilu, nombe m’weji tukusaŵagasoni ŵakulimba patukukosechela soni kujigala nawo mbali pamisongano ja mpingo, kulalichila, kupopela, kulijiganya Baibulo lisiku lililyose soni kukunguluka ni abale ni alongo ŵetu . . . Atamose kuti masengo getu ŵagalekasisye, nambope tukusalinga kupata matala gakutukamuchisya kuŵa paunasi wambone ni Mlungu.

Yevgeniy Zhukov

Chaka Chakupagwa: 1969 (Sevastopol, ku Crimea)

Mbili ja umi wakwe: Ŵapali muliŵasa lya ŵandu ŵajinji. Ali akwete yaka 14 baba ŵakwe ŵajasiche

Jwalijiganyisye kwimba piyano kusukulu jakwiganya ya nyimbo. Jwalijiganyisyesoni masengo gakulumbikanya ma payipi kaneko jwakamulaga masengo mu kampani jine

Paŵakamulaga masengo ga usilikali ŵatandite kusaka kumanyilila chakulinga cha umi. Mama ŵakwe ŵamkamuchisye kumanyilila ngani sya m’Baibulo soni ŵapatile kwanga kwa yiwusyo yakwe. Kaneko jwabatisidwe mu 1997

Yaŵaŵechete M’baleju

Ana Yehofa ŵakamuchisye chamtuli paŵaliji kundende?

Cha kundanda kwa chaka cha 2021, nadandaŵile naga chiyiŵe yakomboleka kusimanikwa nawo pa Chikumbuchilo. Kwaliji kutanda ngatenda Chikumbuchilo ni mpingo. Ni napopesile kwa Yehofa, mwamti ŵajanjile lipopelo lyangu mwakumba machili soni lunda. Ni chikamuchisyo cha Yehofa naŵechete ngani jaChikumbuchilo kwa achimjangu ŵaŵili ŵanaliji nawo yalumo mundendemo. Awutu waliji upile wangu wakuti nalalichile ŵanduwo.

Ngatukukayichila kuti Yehofa chiŵalimbikasye abaleŵa soni wosope ŵakulagasidwa ku Crimea.—1 Atesalonika 3:12, 13.

NGANI SYASIKOPWECHE