Konjechesya pa kulaga ni mlili wa kolonafayilasi, abale ni alongo ŵetu ŵa ku Democratic Republic of the Congo soni ku Republic of Congo akusosekwa kupilila yakusawusya yine mpela kusewuchila kwa mesi soni ngondo. Ofesi ja Mboni sya Yehofa ku Congo (Kinshasa) jajikusalolela masengo gakulalichila m’yilambo yiŵiliyi, jalinganyisye yakamuchisya mwakupeleka yindu yakusosechela paumi soni kwalimbikasya ŵandu ni maloŵe ga Mlungu. Pakusaka kwakamuchisya abale mu delaji, ofesiji jipanganyisye yakuti paŵe magulu gakamuchisya ŵane pajitendekwe ngosi. Maguluga gapali 57. Pakwikanaga apano maguluga gakombwele kwakamuchisya abale ni alongo ŵakwana 90,000 mwakwapa yakulya.

Pa Epulo 16 soni 17, 2020, kwagwile wula jamachili m’madela ga kungopoko lyuŵa m’chilambo cha Democratic Republic of the Congo. Yeleyi yatendekasisye kuti mesi gasewuchile, mwamti abale ni alongo ŵakwana 139 ŵasamile. Abale ni alongoŵa apano akutama m’nyumba sya abale ni alongo achimjawo. Magulu gakwakamuchisya ŵane pajitendekwe ngosi gakwataŵila manyumba ŵandu ŵakusoŵa pakutamaŵa.

Abale ni alongo apeleche mwakoloŵa magasa yikamuchisyo ku magulu gakamuchisya ŵanega. Mu dela jine, abale ŵapeleche magombo gakwana makilogalamu 700, yimanga yakwana makilogalamu 400 soni yinangwa yakwana makilogalamu 220.

Konjechesya pelepa, mpingo wine ŵakamuchisye abale ni alongo ŵaŵatisile ngondo mwakwapa malo gakutama. Abaleŵa ŵakamuchisyaga achimjawoŵa mwakwagaŵila chakulya chilichose chiŵapataga. Yeleyi ŵayitesile mpaka pandaŵi jele magulu gakamuchisya ŵane pangosi gayiche kukukamuchisya.

Jwamlume jwine jwa peŵasa jwa mu msinda wa Brazzaville m’chilambo cha Republic of Congo, jwaŵechete maloŵe aga panyuma pakupochela chikamuchisyo: “Yindu pachilambopa mpaka yigalawuche mwachitema mnope. Une ni ŵamkwangu twakamulaga masengo soni twapochelaga mbiya syasyatukamuchisyaga kupata yakusosechela ya pa umi. Nambo ulwele wa COVID-19 utendekasisye kuti tuŵe ŵakulaga. Atamose kuti yeleyi yitutendechele nambope tukumdalila Yehofa kuti chatukamuchisye. Lisiku line patwakambilanaga yampaka tutende pakuyiwona kuti mbiya sikutumalila, mwangajembecheya Yehofa ŵatukamuchisye.”

Mlongo jwine lina lyakwe Mbuyi Ester, jwakusatama mu msinda wa Kinshasa jwasasile kuti, “Ŵamkwangu ajasiche mwesi upitewo, mwamti twalajililaga kuti tupate yakusosechela ya pa umi. Une nganimba pa masengo konjechesya pelepa ngwete ŵanache ŵatatu ŵakusadalila une. Nambo kaneko twapochele chikamuchisyo chakuti atamose ŵachibale ŵangu ngamkanakombola kutupa. Abale ŵatupele yakulya yejinji yayatukamuchisye kwa masiku gejinji. Sikomo kwejinji Yehofa.”

Lili lipopelo lyetu kuti Yehofa apitilisye kusamalila abale ni alongo ŵetu soni kuti alongoleleje masengo gakwakamuchisya ŵane. Tukwembecheya ndaŵi jele jwalijose chachipataga yakulya yakwanila.—Salimo 72:16.