Lyamlungu pa Okotoba 25 2020, Baibulo ja Dziko Latsopano la Malemba Opatulika jakopweche m’yiŵecheto yitatu ya ku India. Yiŵecheto yakwe yili Chigujarati, Chikannada soni Chipunjabi payipangiso yamakono. Mabaibuloga ŵagakopwesye pangani jiŵatesile kwambula. Abale ni alongo ŵapikanilaga pologalamuji ali msimangwawo. Abaleŵa ŵatesile dawonilodi ma Baibulo m’yiŵecheto yawo panyuma pa pologalamu.

Chiŵandika ŵandu 61 miliyoni pachilambo chosope, akusaŵecheta Chigujarati.

Masengo gagopolela Baibuloji gajigele yaka yakwana 7 soni gakamulidwe ni abale ŵaŵili ni alongo mcheche. Jumo mwa ŵagopolelaŵa jwaŵechete kuti, “Tuli ŵakusangalala mnope ni kukopoka kwa Baibuloji. Kagopolele kakwe kali kangasawusya kuŵalanga mwamti atamose ŵachinandipile mpaka apikanichisye utengawo mwangasawusya.”

Jwagopolela jwine jwaŵechete kuti, “Baibuloji jikamulichisye masengo lina lya Yehofa mmalo gosope galyasimanikwaga mu yakulemba ya pandanda. Tukumanyilila kuti chikulupi cha abale ni alongo chichilimbe mnope pakukamulichisya masengo Baibuloji pakulijiganya pajika.”

Ligongo lyakuti kagopolele ga Baibuloji kali kangasawusya kuŵalanga, tukukulupilila kuti ŵakuŵalanga chanonyeleje kukamulichisya masengo Baibuloji. Chijakamuchisyesoni ŵandu “ŵakulinondiya” kuti ammanyilile Yehofa.—Salimo 25:9.

Kalembe ka chiŵechetochi kakusaŵa kelekangane mnope ni kaŵechete. Chiŵechetochi chikusaŵechetedwa mwakulekanganalekangana pakujigalila ni dela. Myoyo yaliji yakusawusya kwa ŵagopolela kuti akamulichisye masengo maloŵe gangasawusya soni gakusaŵecheta ŵandu wosope. Soni yaliji yakusawusya kuti utenga wa m’Baibulo ulembedwe mu litala lyakupikanika chenene kwa jwalijose.

Masengo gagopolelaga gajigele yaka yakupunda 7. Masegoga gakamulidwe ni ŵagopolela ŵakwana 10. Jumo mwa ŵagopolelaŵa jwaŵechete kuti, “Naganisyaga kuti ligongo lya COVID-19, Baibuloji chijikopoche mu 2021. Nambo kopoka kwa Baibuloji kukulosya kuti pangali champaka chilepelekasya masengo ga Yehofa.”

Jwagopolela jwine jwatite, “Yili yakusangalasya kuti ŵandu ŵakuŵecheta Chikannada chakomboleje kuŵalanga maloŵe ga Yehofa m’chiŵecheto chawo soni kuti lina lya Yehofa chalipateje pa malo gakwe gakuŵajilwa.”

Tukukulupilila kuti Baibuloji chijikamuchisye ŵandu ŵakupunda 2,800 ŵakusaŵecheta Chikannada mu nyambi jetu jino. Baibuloji chijakamuchisyesoni ŵandu chiŵandika 46 miliyoni ŵakusaŵecheta chiŵechetochi pachilambo chosope kupikanichisya kuti, “Chipanje cha Mlungu chili chekulungwa nditu. Lunda ni umanyilisi wakwe yili yakusokoka mnope.”—Aloma 11:33.

Baibulo ja Dziko Latsopano ja Chipunjabi jagopoleledwe ni ŵandu ŵakwana 6. Jemanjaji ŵakamwile masengoga kwa yaka 12. Gopoleledwa kwa Baibuloji, chikukamuchisye kwa ŵandu ŵakupunda 100 miliyoni ŵakusaŵecheta chiŵechetochi ku India soni ŵali m’yilambo yine.

Jumo mwa ŵagopolelaŵa jwaŵechete kuti, “Atamose kuti twakwete yipangiso yangakwanila, nambope twakombwele kukamula masengoga. Yehofa ŵatukamuchisye kuti tukombole kukamula masengoga. Baibuloji chijakamuchisye abale ni alongo kulimbisya chikulupi chawo, kwatamika mtima pasi pa yindu yakulagasya nganisyo soni kwakamuchisya kuti apilile yakusawusya yachasimaneje nayo kusogoloku.”

Jwagopolela jwine jwaŵechete kuti, “Kwa ŵandu ŵamtima wambone, Baibuloji chijakamuchisye mnope ligongo mabuku gane gagalembedwe mwa ndakatulo. Baibuloji chijakamuchisyesoni wosope ligongo jana yindu yakwakamuchisya kuwungunya ngani.”

Mpela mwakupikanila abale ni alongo ŵetuŵa, m’wejisoni tukumyamichila Yehofa payindu “yakusimonjesya” yakutenda, pakuŵa ngatuŵa tukombwele “kuyiŵalanga ligongo lya winji wakwe.”—Salimo 40:5.