Pa Nofemba 28, 2020, Baibulo ja Dziko Latsopano la Malemba Opatulika jakopweche ja payala soni pa yipangiso yamakono. Baibuloji jakopweche m’yiŵecheto mcheche ya ku Indonesia. Yiŵecheto yakwe yili, Chibataki Karo, Chibataki Toba, Chijavanisi, soni Chiniasi. M’bale Geoffrey Jackson jwa mu Likuga Lyakulongolela ni juŵakopwesye ma Baibuloga pa ngani jakwambula. Mwamti mipingo josope ku Indonesia japikanilaga pologalamuji kupitila pa yipangiso yawo yamakono. Ŵandu ŵakwana 41,265 ŵapikanile pologalamuji. M’bale Geoffrey Jackson jwasasilesoni kuti Baibulo ja Dziko Latsopano la Malemba Achigiliki m’chiŵecheto cha Chisunda chijikopoche pachangakaŵa pa yipangiso yamakono.

Ŵagopolelaŵa ŵakamwile masengo gawo mwakulipeleka mwamti masengoga ŵagakamwile kwa yaka yakupunda yitatu ni hafu. Ŵandu ŵakupunda 100 miliyoni akusaŵecheta yiŵecheto mcheche yayikopwecheyi. Konjechesya pelepa ŵakulalichila ŵakupunda 2,600 akusakamulichisya masengo yiŵecheto yeleyi pali mu utumiki soni pamisongano jampingo.

Masiku agano ŵandu ŵanganonyelaga kukamulichisya masengo maloŵe gachikala mpela gaŵagakamulichisye masengo m’ma Baibulo gane. Jwagopolela jwine jwaŵechete kuti, “Kola Baibulo ja Dziko Latsopano la Malemba Achigiliki kundendekasisye kuyiwona kuti Yehofa akusasaka kuti jwalijose apikane Maloŵe gakwe mwangasawusya soni gamyicheje pamtima.”

Daniel Purnomo, jwa mu komiti ja nyambi ku Indonesia jwaŵechete kuti, “Tukutama m’masiku gakusawusya mnopemnope ligongo lya mlili wa COVID-19. Abale ni alongo ŵakusaŵecheta yiŵecheto yeleyi, chasangalale mnope ligongo lyakopoka kwa ma Baibuloga pandaŵi jakwe.”

Tukuyamichila mnope kuti Yehofa atendekasisye kuti Maloŵe gakwe Baibulo gasimanikwe kwa ŵandu ŵajinji. Ngatukukayichila kuti ma Baibuloga chigakamuchisye ŵandu ŵakusaŵecheta yiŵecheto yeleyi.—Yakobo 1:17.