Pachangakaŵapa, Luŵala lwekulungwa lwa magambo ku Milan m’chilambo cha Italy, lulamwile kuti liŵasa line lya Mboni sya Yehofa nganililemwa pamagambo gakwayana ni chikamuchisyo cha mtela cha mwanache jwawo. Yalulamwile luŵalalu, chiyikamuchisye kuti maluŵala gane ga magambo gakawonaga achinangolo mwakulemwecheka, naga achinangolowo akuŵenda kuti mwanache jwawo apochele chikamuchisyo chine changasaka kumtaga mundu miyasi. Luŵalalu lulamwilesoni kuti achinangolo akwete ufulu wakukana kupeleka miyasi kwa ŵanache ŵawo pakujigalila yikulupi ya dini jawo.

Mwesi wa Sepetemba 2019, liŵasa line lya Mboni lyapite kuchipatala ni mwanache jwawo jwamkongwe, juŵawulele ligongo lyakuti jwagwile. Madokotala gayiweni kuti mwanacheju jwasosekwaga kumtenda opaleshoni ni chakulinga kuti amalane ni chakusawusya chaŵakwete mu mtwe. Madokotalaga gamtesile mwanachejo opaleshoni chenenepe, mwamti pandaŵi jiŵamtendaga opaleshinijo nganipasosekwaga kumtaga miyasi.

Mkupita kwandaŵi, mwanache jula jwatandite kupola, kaneko dokotala jwine jwaŵendile achinangolo kuti akunde kuti mwanache jula amtaje miyasi ni chakulinga chakuti apole mwachitema. Achinangoloŵa ŵakanile yakuti mwanache jwawojo amtaje miyasi, nambo agambe kumpa chikamuchisyo chine changakwayana ni miyasi.

Mmalo mwakuti dokotalaju apikanile yaŵaŵendile achinangoloŵa, jwalakwe jwagambile kwajimbila ŵapolisi soni ŵa ku ofesi jakwimila boma pa magambo. Ŵa ku ofesi jakwimila boma pamagambo ŵaluŵendile luŵala lwine lwa magambo kuti lulamule kuti mwanacheju apochele miyasi. Luŵalalu lwakundile, mwamti yeleyi yatendekasisye kuti achinangolowo akakolasoni ulamusi pa mwanache jwawo. Mmalomwakwe ulamusi wosope wakwayana ni chikamuchisyo cha kuchipatala, waupeleche kwa jwamkulungwa jwakusalolela pa chipatalapo. Atamose kuti yaliji myoyo, nambope mwanache jula nganamtaga miyasi. Yeleyi yaliji myoyo ligongo lyakuti madokotala gayiweni kuti mwanacheju ngakusosekwa kumtaga miyasi.

Yeleyi yatendekasisye kuti nganiji jiwande mnope pa mawailesi ga TV. Nombe nawo ŵakulokota ngani ŵajinji ŵalembile yindu yakulemwecheka yakuti luŵala lwa magambo lukulupwisye umi wamsikana jwine pakulamula kuti ampe chikamuchisyo cha miyasi.

Pa Sepetemba 10, 2020, luŵala lwekulungwa mnope lwalamwile kuti yalyatesile luŵala lwine lula yakuti achinangolo ŵangali ulamusi pa mwanache jwawo yaliji yakulemwecheka. Luŵala lwekulungwali, lwasasile kuti luŵala lwine lula nganilusosekwa kulamula kuti mwanacheju apochele miyasi soni kuti lwangali machili gakulamula ngani jeleji.

Luŵala lwekulungwalu lwasasilesoni kuti, “Atamose kuti achinangoloŵa ŵakanile kuti mwanache jwawo akapochela miyasi pakujigalila yikulupi ya dini jawo, nambo yeleyi ngayikugopolela kuti achinangoloŵa ali ŵakusakala soni kuti nganakola ulamusi pa ŵanache ŵawo.” Mu chaka chimasilepechi, ma luŵala ga magambo gatatu gekulungwa mnope ku Italy gajitichisye kuti achinangolo ŵa Mboni akwete ufulu wakwasagulila ŵanache ŵawo chikamuchisyo cha chipatala changasaka kumtaga mundu miyasi.

Ŵakulamula magambo soni ŵachipatala akusosekwa kumanyilila kuti ŵa Mboni sya Yehofa ŵangakulupilila kuti ŵakulwala akusapolaga m’matala gane gakusimonjesya. Ŵa Mboni palwasile, akusapochelaga chikamuchisyo cha mtela. Jemanjaji akusalinjilila kupata chikamuchisyo chambone mnope m’yipatala yayikwete umanyilisi soni yida yakuŵajilwa yampaka ayikamulichisye masengo pakuchimbisyasoni yikulupi ya dini jawo. Ŵa Mboniŵa akusiŵaŵendaga madokotala kuti pakwapa chikamuchisyo chamtela, akataga miyasi. Madokola gakuchimbichikwa m’yipatala yekulungwakulungwa pachilambo chosope, gali gakusachilila kupeleka chikamuchisyo chambone changasaka kumtaga mundu miyasi.

Kusala yisyene tukuyamichila yalulamwile luŵalu. Yeleyi chiyikamuchisye abale ni alongo ŵetu kuti apitilisye kwasagulila ŵanache ŵawo yikamuchisyo yambone yachipatala.—Masengo 15:29.