Pa Epulo 24, 2022, M’bale Frank Madsen, jwa Mukomiti ja Nyambi ja ku Malawi, jwakopwesye Baibulo ja Chilambo Chasambano ja Malemba Gachigiliki ja Chiyao jakamulichisya masengo payipangiso yamakono. Pologalamu jakopoka kwa Baibuloji, japali pa TV kupwatikasoni JW Box ni JW Stream. Mwamti ŵandu ŵakupunda 148,000 ŵalolele pologalamuji. Baibuloji chijipulimtidwe kusogoloku.

Baibulo josope jatandite kusimanikwa mu Chiyao mu 2014. Nambope Baibuloji jikwete yakulemwecheka yine. Mwamti ŵatyosisyemo lina lya Mlungu lyakuti Yehofa. Ŵatesile yeleyi atamose kuti m’malemba gandanda, linali lyasimanikwaga mmalo gejinji.

Yakuyichisya yakwe yaliji yakuti abale ni alongo yasawusyaga kujikamulichisya masengo Baibuloji pakulalichila. Panganiji jwagopolela jwine jwatite: “Mmalo mwakuti twasalileje ŵandu kusosekwa kwa lina lya Mlungu, twagambaga kumalila ndaŵi kwasalila ligongo lyakwe m’Baibuloji mwangalimo lina lya Mlungu.” Mwachisyasyo, Baibulo jaŵele ali mkukamulichisya masengo ja Chiyao pa lilemba lya Mateyu 22:44 ŵagopolele chamti myi: “Ambuje ŵasalile Ambuje ŵangu.” Pele Baibulo ja Chilambo Chasambano jagopoleledwe mwakupikanika chenene kuti “Yehofa ŵasalile Ambuje ŵangu.”

Pakuŵechetasoni ya umbone wa Baibulo jasambanoji, jwagopolela jwine jwasasile kuti: “Pakuŵa Baibulo ja Chilambo Chasambano ja Malemba Gachigiliki jili jakupikanika soni jangasawusya kujiŵalanga, nikuti yeleyi chiyakamuchisye ŵandu kuti ajipikanichisyeje mwachitema soni kuŵa ŵakusachilila kutenda yakulijiganyayo.”

Tukusangalala kuti Baibuloji chijakamuchisye ŵandu ŵajinji ŵakusaŵecheta Chiyao kumanyilila lina lya Mlungu lyakuti Yehofa, jwali Mlungu ‘Jwakwinani Mnope jwakulamulila jwa pachilambo chosope chapasi.’ Chijakamuchisyesoni kuŵa paunasi ni jwalakwe.—Salimo 83:18.

Yakwayana ni Masengo Gagopolelaga

● Ŵandu chiŵandika 2,800,000 akusaŵecheta Chiyao ku Malawi. Soni ŵandu chiŵandika 928,000 akusaŵecheta chiŵechetochi ku Mozambique ni ku Tanzania.

● Ŵakulalichila ŵakwana 2,203 akusatumichila m’mipingo jakwana 45 ja Chiyao.