Pa Ogasiti 15 ni 16, 2020, Baibulo ja Dziko Latsopano la Malemba a Chigiliki ŵajikopwesye kwa ŵakulalichila ŵa ku Mozambique ŵakusaŵecheta chiŵecheto cha Chichangana soni Chimakuwa. Baibuloji jikusimanikwa pa Intaneti. Ŵa Mboni ŵakupunda 8,000 akusaŵecheta Chichangana soni ŵakupunda 1,700 akusaŵecheta Chimakuwa.

M’bale David Amorim jwa mukomiti ja nyambi ku Mozambique, ni juŵakopwesye ma Baibuloga pangani jakutenda kwambula. Abale ni alongo ŵapikanilaga pologalamuji kupitila pa webusayiti jetu. Konjechesya pelepa, ofesi ja nyambi ŵajikundile kuti mpaka jigulusye pologalamuji pa TV soni pa ma wailesi gakupunda 30.

Chichangana chikusaŵechetedwa mnopemnope mu dela ja kummwela kwa chilambo cha Mozambique. Pana ŵandu chiŵandika 1.9 miliyoni ŵakusaŵechetega chiŵechetochi. Chiŵechetochi chikusalandana mnope ni chiŵecheto cha Chitsonga chakusaŵecheta ŵandu ŵa ku South Africa.

Nambo chiŵecheto cha Chimakuwa chikusaŵechedwa mnope mu dela ja kumpoto kwa chilambo cha Mozambique. Ŵandu chiŵandika 5.8 miliyoni akusaŵecheta chiŵechetochi soni chili chiŵecheto chakusaŵecheta ŵandu ŵajinji ku Mozambique.

Kwa yaka yejinji yiŵele yakusawusya kuti ŵakulalichila ŵakusaŵecheta yiŵechetoyi apateje ma Baibulo. Ma Baibulo gali gakatala, soni malo gane gakusumichisya mabuku, nganasakaga kwasumisya ŵa Mboni sya Yehofa ma Baibulo. Jwagopolela jwine jwatite, “Najiweni mipingo jili jigambile kola Baibulo jimo jele ŵagambaga kamulichisya masengo ŵakwete mbali pa misongano.”

Tuli ŵakusangalala yalumo ni abale ni alongo ŵapochele Baibulo ja Dziko Latsopano la Malemba a Chigiliki mu Chichangana soni Chimakuwa. Tukumanyilila kuti ma Baibuloga chigakamuchisye ŵandu ‘kumanyilila chakuwona chisyesyene.”—1 Timoteo 2:3, 4.