Achakulungwakulungwa ŵaŵili ŵa ku nyumba ja malamusi ja ku United States, alembile chikalata chakujijamuka boma ja Russia ligongo lyakumtaŵa M’bale Dennis Christensen pali pangali magongo gakupikanika. M’chikalata chasambanochi achakulungwakulungwa ŵa boma akuchijamuka chilambo cha Russia ligongo lyakwalagasya abale ni alongo ŵetu ligongo lya chikulupi chawo.

M’bale Christensen ŵamtaŵile ni kumwugalila m’ndende mu Meyi 2017. M’baleju ŵamtaŵile ligongo lyakusimanikwa pamisongano ja Chiklistu ja ŵa Mboni sya Yehofa. Chikalata chaŵachilembile pa 8 Meyi, 2020, Eliot L. Engel soni Michael T. McCaul, ŵa ku nyumba ja malamusi, ŵajiŵendile boma ja Russia kuti jimkoposye mwachitema m’ndende M’bale Christensen.

M’chikalatamo ŵalembelemo kuti, “Pa 6 Febuluwale, 2019 Che Dannis Christensen ŵali ŵa Mboni sya Yehofa ŵele kumangwawo kuli ku Denmark. Ŵalamwile kuti akatame mu ukayidi kwa yaka 6. Bungwe jine jakulola ya ufulu wa ŵandu pangani sya dini ja ku United States (United States Commission on International Religious Freedom) jajijamwiche boma ja Russia ligongo kalamule ka magambo keleka.” Chikalatacho chajendelechele kuti, “Welewu uli umboni wamachili wakulosya kuti Boma ja Russia jiŵele jili mkonanga ufulu wa ŵandu pangani ja dini.”

Pakwika pa 25 Meyi, 2020, nikuti M’bale Christensen atemi m’ndende yaka yitatu. Jwalakwe ali jumo mwa abale ni alongo ŵetu 32 ŵataŵidwe ku Russia. Ŵandu 9 mwa jemanjaji ŵalamwile kuti ali ŵakulemwa soni ŵandu 23 akwasunga mundende kwembecheya kuti ŵajimbe magambo. Kupwatika pelepa, ŵakulupilila achimjetu ŵane ŵakwana 18 ali pa ukayidi wa panyumba. Kutandila mu 2017, boma ja Russia jiwungunyisye nyumba chiŵandika 900 sya abale ŵetu. Yeleyi yitendekasisye kuti boma ja Russia jajimbe magambo ŵa Mboni ŵakwana 331.

Achakulungwakulungwa ŵa boma ku United States soni ku Europe achijamwiche mwamachili chilambo cha Russia ligongo lyakwalagasya ŵa Mboni sya Yehofa.

Chinga yalembile achakulungwa ŵa nyumba ja malamusiyi chiyikamule masengo pakuchenga yindu ku Russia kapena iyayi, tukumanyilila kuti Yehofa chapitilisye kwakamuchisya abale ni alongo ŵetu ku Russia kuti apitilisye kupilila. Tukwembecheya ndaŵi jele Yehofa chachityosya ŵandu ŵakusatandikasya yakusawusya.—Salimo 94:20-23.