Pa Juni 26, 2020, achakulungwakulungwa ŵa pa ndende ja ku Lgov, ŵamŵisile M’bale Dennis Christensen mu kachipinda kele chakulinga chakwe chili kulagasya yigaŵenga. Pakujigalila kuti umi wa M’baleju nganuŵa chenene, achakulungwakulungwaŵa ŵamŵisile m’baleju m’kachipindaka ni chakulinga chakuti akapitilisya kuŵa jwakulupichika kwa Mlungu. Pakusaka kuti atende apilo, ŵakwimila boma pa magambo yikuwoneka kuti apatilesoni magongo gane gawunami gakuti amlambuchisye m’baleju. Chakulinga chawo chili chakuti m’baleju akakopoka mu ndende. Jemanjaji akutenda yeleyi atamose kuti luŵala lwa magambo lwajitichisye yakuti m’baleju akopoche.

M’bale Christensen ŵamlamwile kuti atame mu ukayidimu kwa yaka 6. Pakwikanaga apano jwalakwe atemi mu ukayidimu yaka yakupunda yitatu. M’baleju akuŵajilwa kumkoposya mu ukayidi atamose mkanaŵe kumalisya ukayidi ŵakwe. Nambo sambano chaka chimasile yeleyi mkaniyitendekwe. Jwalakwe aŵele ali mkuŵenda kwa maulendo gatatu kuti akopoche, nambo madandausi gakwega nganigapikanika. Nambo ali aŵendile ka mcheche, ngani jakweji ŵajijawisye ku luŵala lwa magambo. Pa Juni 23, 2020 Luŵala lwa Magambo lwa ku Lgov lwalamwile kuti mmalo mwakumalisya kutama mu ukayidimo jwalakwe agambe kulipila mbiya kuti akopoche. Ŵakwimila boma pa magamboga, Che. Artem Kafonov, ŵajitichisye yakuti m’baleju amnandiye ukayidi wakwe.

Pali pamasile masiku gaŵili, jwakwimila boma pa magambo jwine, Che. Aleksei Shatunov ŵasasile kuti yalwalamwile luŵala lwa magambolu, nganiyiŵa yakuŵajilwa. Mwamti ŵaŵendile kuti nganiji jijinjilesoni mu luŵala lwa magambo nambosoni kuti jwakulamula jwakwe aŵe jwine. Jwakwimila bomaju, jwaŵechete yeleyi, pakujigalila yaunami yaŵasasile ŵakulolela akayidi ŵa pa ndende ja Lgov. Ŵakulolela Akayidiŵa ŵasasile kuti M’bale Christensen “nganakamulaga masengo mwakulimbichila soni jwangali mbili jambone.”

Pa Juni 23, achakulungwakulungwa ŵakulolela akayidi, ŵasasilesoni kuti M’bale Christensen’s jwangali mbili jambone. Nambo jwakulamula magambo jwayiweni kuti yaŵasalaga ŵanduŵa yaliji yaunami. Loya jwakumjimila M’bale Christensen pamagambo gakwe jwalosisye yikalata yakuchipatala yakusimichisya kuti m’baleju ŵalwalaga, mwamti yeleyi yatendekasisye kuti akakamulaga masengo ga kundendeko. Pajakwanile ndaŵi jakuti achakulungwakulungwa ŵa kundende ŵala aŵechetepo, jumo jwa jemanjaji, ŵajitichitichisye kuti yaliji yakusawusya kuti ampe M’bale Christensen masengo pakujigalila kuti jwaliji jwakulwala.

Nambo yakusimonjesyasoni yaliji yakuti, achakulungwakulungwa ŵa ku ofesi jakwimila boma pa magambo ali atandite kulinganya yakuti akatende apilo ya nganiji, nombe nawo ŵakulolela akayidi ŵala ŵalilembile luŵalalu yikalata yiŵili yakumsakachisya mbili M’bale Christensen. M’chikalata chandanda ŵasasilemo kuti M’bale Christensen ŵasimanikwe m’chipinda chakulila yakulya pandaŵi jakulemwecheka. M’chikalata chaŵili, ŵasasile kuti m’baleju ŵasimanikwe pa malo gane ali agambile kuwala tisheti soni ngawala jeketi. Ligongo lya yeleyi, achakulungwakulungwa ŵakulolela akayidi ŵam’ŵisile M’bale Christensen m’kachipinda kane kakulagachisya ŵandu. Ŵamŵisile m’kachipindaka kwa masiku 10. Nambo mwakamulana ni malamusi ga chilambo cha Russia, yeleyi mpaka yitendekwe naga mkayidi akusakasaga malamusi ga ku ndende mwakuwilisyawilisya. Nambosoni mpaka aŵichidwe m’kachipindako, naga ŵachipatala ali awungunyisye kaje mwawuŵelele umi ŵa mkayidijo. Nambo pakuŵa kuti M’bale Christensen nganakasaga mnope malamusiga soni kuti pangali ŵachipatala ŵaŵawungunyisye ya umi wakwe, nikuti paliji pangali ligongo lyamŵika m’kachipinda kakulagachisya ŵanduko.

M’bale Christensen ŵamŵisile mkachipinda ni mkayidi jwine. Kachipindako kaliji kamwana soni nganikakola mawindo gakwanila. Mkachipindamo mwaliji mwausakwa, mwamti yeleyi yatendekasisye kuti umi wa m’bale jwakulwalaju uŵe pangosi. Jwalakwe jwalasile ni ulwele wa mbumu miyesi jipitejo. Konjechesya pelepa amsimenesoni ni ulwele wakogoya wa mu mgongo. Loya jwakumjimila M’bale Christensen pa magambo, ŵasasile kuti “ŵakulolela akayidiŵa akumanyilila yeleyi, nambope jemanjaji akumŵikape mkachipinda mpela keleko soni akusagonaga bedi jangali matilesi, yayikusatendekasya kuti apikaneje mnope kupweteka.”

M’bale Christensen ŵamsalile loya jwakwe kuti pamagambo gakumjimba gakuti ŵakasile malamusi ga ku ndende ŵaliji yalumo ni achimjakwe ŵane, nambo yakusimonjesya niyakuti jwalakwe jika ni juŵamŵisile mu kachindako. Loya jwa M’bale Christensen jwasasile kuti, “Yeleyi yikututendekasya kuti tukakayichilaga yakuti ŵanduŵa ŵatesile kulinganya mwamele yakuti Dennis akopoka atamose kuti luŵala lwamagambo lwalamwile yeleyi.”

Achakulungwalukulungwa ŵa Boma ja Russia akwendelechela kupata matala gakogoya gakwalagachisya abale ŵetu ku Russia. Nambope ngatukayichila kuti Yehofa chiŵakamuchisye abaleŵa. Kwende wosope tujendelechela kumŵenda Yehofa kuti amkamuchisye M’bale Christensen yalumo ni ŵamkwakwe mu litala lililyose ni chakulinga chakuti ajendelechele kuŵa ŵakulupichika.—Salimo 94:13, 21, 22.