M’bale Ivan Puyda akusakumbuchila yindu yakusangalasya yaŵatendaga baba ŵakwe paŵelwiche kumasengo. Payiche panyumba ŵaŵamlanjilaga jwalakwe yalumo ni achapwakwe ŵakwana 7 Buku Jangu ja Ngani sya m’Baibulo. Jwalakwe akusakumbuchilasoni chenene ali mkulalichila mkamusi kawo kakolanjikwa kuti Kvitok yalumo ni baba ŵakwe Che Grigoriy. Jwalakwe yalumo ni babagweŵa, ndaŵi ni katema ŵajawulilaga msimangwawo achimjakwe ŵa kusukulu yalumo ni achitichala ŵakwe. Paŵaliji jwachinyamata, M’bale Puyda jwalalichilaga yalumo ni anganga ŵakwe (ŵakuchikongwe). Jemanjaji ŵalalichilaga mu dela jele nganijipelechedwa kwa jwakulalichila jwalijose. Pandaŵi jeleji, M’bale Puyda ni paŵamanyilile kuti anganga ŵakwe ŵaliji ŵakulipeleka mnope pamasengo gakulalichila.

Ndaŵi syosope M’bale Puyda akusambuchila kuti babagwe soni angangagwe ŵanonyelaga kuŵalanga Baibulo soni mabuku gane gakusala ya m’Baibulo. Myoyo jwalakwe jwatesile yakomboleka pakusaka kuti akuyeje yiŵatendaga achinangologweŵa.

Apano M’bale Puyda akwete yaka 41. Nambo mwangajembecheya jwalakwe akusimana ni yindu yakusawusya yaŵasimanaga nayo achinangologweŵa. Jwalakwe aŵele ali mkutaŵa soni kumŵika mu ukayidi ligongo lyakuti ali jwa Mboni sya Yehofa. Pa Meyi 30, 2018, kagulu ka asilikali ŵa FSB ŵayiche kukumtaŵa M’bale Puyda. Jwalakwe jwatemi mu ukayidi kwa miyesi mcheche. Ali amkopwesye, jwalakwe ŵamŵisilesoni pa ukayidi wa panyumba kwa miyesi 6. Mu ulamusi wa Nazi soni Soviet, nombe nawo anganga ŵakwe ŵala, ŵataŵile ni kwaŵika mu ukayidi. Yakulandana ni yeleyi yatendechelesoni baba ŵakwe. Babaŵa ŵataŵile mu ulamusi wa Soviet Union.

M’bale Ivan Puyda jwaŵechete kuti, “Ndumetume Paulo jwalembile maloŵe gagali pa 2 Timoteo 3:14 gakuti, ‘Mpitilisye kuyikulupilila yele yimwalijiganyisye nipo myiweni kuti yili yisyesyene, pakuti mwamanyilile ŵele ŵiŵamjiganyisye.’ Kumanyilila ŵandu ŵaŵanjiganyisye usyesyene, kukusangamuchisya kuŵa jwakupilila. Boma soni yakusawusya ya mu ukayidi nganiyalekasya achinangolo ŵangu kumtumichila Yehofa. Soni ngalwe syakututendelasi chisikole mbesi jakwe. Apano ngusakuyaga yaŵanjiganyisyeyo soni chimbitilisye kutenda yeleyi. Pangupitilisya kuŵa jwakulupichika, ngumanyilila kuti Yehofa chachimba majali.” M’bale Puyda akwembecheya yachilulamule luŵala lwa magambo pangani jakwe.

Jwalakwe jwasasile kuti ndaŵi syosope baba ni anganga ŵakwe pakusala ngani syakwayana ni ku ukayidi, nganasalaga mwawukusaŵela umi wa kweleko. Jemanjanji ŵasalaga yaŵasimanaga nayo pakulalichila ngani syambone.

Apano baba ŵakwe ŵa Puyda (Grigoriy), akwete yaka 64. Babaŵa ŵabatisidwe mu 1975 panyuma pakutama mu ukayidi kwa chaka chimo mu ulamusi wa Soviet. Ŵatemi mu ukayidimu ligongo lyakana kwinjila usilikali. Ŵakopwesye mu 1977. Kaneko mu 1986 ŵaŵisilesoni mu ukayidi ligongo lyakuti ŵasimene ni mabuku getu. Nombe angangagwe Puyda, ŵakamwile nawo masengo ga ukayidiga kutandila m’chaka cha 1944 mpaka 1950 ligongo lyakukana kwinjilila ya ndale.

Babagwe Puyda, Che Grigoriy ŵasasile kuti, “Nakombwele kupilila yakusawusyayi ligongo lyakuti nakwete chikulupi chakulimba. Nganingayichilaga ata panandi kuti najendaga mu usyesyene soni kuti Yehofa ali Mlungu jusyesyene.”

Apano sambano mwanache jwawo jwali Ivan, akusimana ni yindu yakulandanayo. Babagwe Puyda, Che Grigory, ŵaŵechete kuti, “Ngukumbuchila yayatendekwaga mu ulamusi wa Soviet, mwamti yikwamba kulandana ni yayikutendekwa apano.” Che Grigoriy ŵasasile kuti, “Ngumŵenda Mlungu kuti Ivan apitilisye kuŵa jwakulupichika pandaŵi ja magamboga soni mwakupilila achimbichisye lina lya Yehofa.”

Angangagwe Ivan, M’bale Partsey ŵajasiche pakandaŵi. Nambo mkanajasiche ŵatumisye kukamula masengo ga ukayidi ku Majdanek. Kaneko ŵa chipani cha Nazi ŵatumisyesoni ku Ravensbrück ligongo lyakukana kusayinila chikalata chakuti aleche kutumichila Mlungu. M’baleju ŵagopweche pawamasile ulamusi wa Nazi m’chaka cha 1945. Nambo mu 1952 ŵamtaŵilesoni soni ŵamsalile kuti chilango chakwe chichiŵe chiwa. Nambo chilangochi chachenjile mwamti ŵamkopwesye mu 1956. Mu 1958 m’baleju ŵamtaŵilesoni ligongo lya chikulupi chakwe, nambo kaneko ŵamkopwesye mu 1964.

Ivan ŵatite, “Kulupichika kwa anganga ŵangu kukusalimbikasya. Pachachijimuka, chinjasalila kuti nasimene ni yakusawusya yakulandana ni yaŵasimene nayo, soni chisyasyo chawo chalimbikasisye kuti mbitilisye kuŵa jwakulupichika soni jwakulimba mtima.”

Ivan ŵaŵechetesoni kuti, “Pangali jwampaka andendekasye kuti ngamnonyela Mlungu soni kuti ngaŵa jwakulupichika kwa jwalakwe. Mbele ndili mkwasalila ŵakuwungunya ya magambo gangu kuti, chindu champaka akombole kutenda chili kundaŵa ni kumbika mu ukayidi, nambo ŵangali machili gakundendekasya kuchenga nganisyo soni mtima wangu.”

Ana ni chichi chachakamuchisye abale ŵetuŵa kupilila pandaŵi jakusawusyaji?

Ivan jwatite, “Pa Masengo 14:22 tukusaŵalanga kuti, ‘Kuti tukajinjile mu Uchimwene wa Mlungu tukwenela kupilila yisawusyo yejinji.’ Mklistu jwalijose akusasosekwa kupilila yakusawusya. Yeleyi ngayikugopolela kuŵa mu ukayidi. Komboleka kuŵa chilwele kapena chiwa cha mundu jwatwamnonyelaga. Nambo kuti tupilile, yikudalila mwatukuyiwonela yindu soni mwawuŵelele unasi wetu ni Mlungu. Ndaŵi syosope Yehofa akusaŵaga jwakoseka kwakamuchisya ŵandu ŵakwe.”

Babagwe Ivan, Che Grigoriy ŵasasile kuti, “Alolechesye kuti unasi wawo ni Yehofa uŵeje wakulimba. Aŵe mjakwe jusyesyene jwa Mlungu. Chakusosekwa chili chakuti, akoleje maumboni gamachili gakuti ali mu usyesyene soni atendeje yiliyose yampaka akombole kuti apitilisye kutumichila Yehofa. Yehofa chachapa majali ligongo lyakulingalinga kwawo.”

Yili yakulimbikasya kuŵalanga yakutenda Yehofa pakwakamuchisya abale ni alongo ŵetu ŵakwalagasya ligongo lya chikulupi chawo. M’weji ngatuleka kwapopelela abale ni alongo ŵetu ku Russia kuti apitilisye kuŵa ŵakulimba mtima soni kuti apateje machili pa maloŵe gakuti, “Mkasimjogopa . . . tinampesoni mmwejo mbote jajikulungwa.”—Genesesi 15:1.