Pa Sepetemba 3, 2020, Luŵala lwa magambo mu tawoni ja Novozybkov mu dera ja Bryansk lulamwile kuti M’bale Vladimir Khokhlov, Mlongo Tatyana Shamsheva soni Mlongo Olga Silaeva, yalumo ni M’bale Eduard Zhinzhiko ali ŵakulemwa. Luŵalalu, lulamwile kuti jemanjaji akatame mu ukayidi kwa chaka chimo ni miyesi jitatu. Nambo jemanjaji ŵagopwele ligongo lyakuti atemi kala mu ukayidimu pakwembecheya kwimbidwa magambo.

Vladimir Khokhlov

• Ŵapali mu: 1977 (Ku Novozybkov, mu dela ja Bryansk)

• Yatesile paumi: Akusakamulaga masengo gakulinganya magalimoto. Mkanaŵe jwa Mboni sya Yehofa jwakamulaga masengo ga usilikali. Akusanonyela mpila kuŵalanga, kuwulaga somba, soni kwimba gitala

• Mjakwe ŵamlimbikasisye kuti alijiganye Baibulo. Jwalombele msikana jwine lina lyakwe Olga. Ŵalombene mu 2007. Jemanjaji akwete mwanache jwamkongwe lina lyakwe Anastasia. Liŵasali likusatumichila yalumo Yehofa

Tatyana Shamsheva

• Ŵapali mu: 1977 (Ku Cherepovets, mu dela ja Vologda)

• Yatesile paumi: Akusakamula masengo gakusamalila yipanje. Pakwete pakamwile masengo gakwajiganya ŵane kasamalile ka yipanje, malamusi soni kuŵalanjila mbiya. Jwakamwile masengoga kwa yaka yejinji. Jwabatisidwe m’chaka cha 1995. Akusanonyela kwasalila ŵane malangiso gakamuchisya gagakusasimanikwa m’Baibulo

Olga Silaeva

• Ŵapali mu: 1988 (ku Davydovo, mu dela ja Moscow)

• Yatesile pa umi: Ali jwamnondi pa ŵanache ŵatatu mu liŵasa lyawo. Jwalijiganyisye masengo gakupanganya ma injini pa koleji jine. Akusanonyelasoni kutota yakuwala. Kupwatika pelepa akusanonyelasoni kuŵalanga mabuku soni maseŵela ga mpila wa makono. Ŵatandite kunonyela Baibulo ligongo lya chisyasyo chambone cha mamagwe

Eduard Zhinzhikov

• Ŵapali mu: 1971 (ku Novozybkov, mu dela ja Bryanks)

• Yatesile paumi: Pakwete pakamwile masengo gakochelela yisyano soni kusamalila malo. Jwalakwe jwakamulilaga masengo kwa ŵapolisi. Jwajimbagasoni mu bandi jine mwamti ŵalombene ni msikana jwine jwa mu bandijo. Msikanaju lina lyakwe ali Tatyana. Jemanjaji ŵalombene mu 1993. Akusanonyela kulemba ndakatulo soni kwimba gitala

• Jwatandite kulijiganya Baibulo cha m’ma 1990, mwamti jwapatile kwanga kwa yiwusyo yaŵakwete. Yeleyi yamkamuchisye kuti achenje ndamo syakwe soni kola liŵasa lyambone. Ŵamkwakwe ŵatesile chidwi ni yaŵatite kuchenga ŵamkwawoŵa. Kaneko nombe nawo ŵaŵelesoni ŵa Mboni sya Yehofa

Pa Juni 11, 2019, achakulungwakulungwa ŵa boma ŵakasile nyumba 22 sya Mboni sya Yehofa mu dela jakolanjidwa kuti Bryansk ku Russia ni chakulinga chakuti akawunyunje yindu. Kaneko Mlongo Tatyana Shamsheva soni Olga Silaeva ŵataŵile. Jemanjaji ŵatemi masiku 245 mu ukayidi ali mkwembecheya lisiku lyakwajimba magambo. Mu Meyi 2020 ŵakopwesye jemanjaji mu ukayidi ni ŵawujile msimangwawo ali mkwembecheya lisiku lyakwajimba magambo.

Pa Okotoba 16, 2019, achakulungwakulungwa ŵa boma ŵatandite kumjimba magambo ga M’bale Vladimir Khokhlov soni Eduard Zhinzhikov. Magambo ga jemanjaji ŵagapwatikenye pamo ni ga Mlongo Shamsheva soni Silaeva. Pali pamasile masiku 7 abaleŵa ŵalamwile kuti akatame mu ukayidi kwembecheya lisiku lyakwajimba magambo. Jemanjaji ali chiŵela mu ukayidimu mpaka lelo.

Mu Lipoti Lyasambano Kutyochela ku Likuga Lyakulongolela Na.5, alongoŵa ŵaŵechetemo yayatendechele. Mlongo Silaeva jwatite kutama kwakwe mu ukayidi kwa miyesi 8 kumkamuchisye kuti akulupilileje mnope yakuti “atamose yindu yili yiyiche pakusawusya mnope, nambope Yehofa akusapeleka msimu wakwe weswela ni chakulinga chakuti tupilile chakusawusya chilichose.” Mlongo Shamsheva jwaŵechete mwakusimichisya kuti, “Ndaŵi syosope Yehofa akusatukamuchisya soni kutulimbikasya.”

Ngatukukayichila kuti Yehofa chapitilisye kwakamuchisya abale ni alongo ŵetu wosope ŵachiŵataŵeje soni ŵali mu ukuyidi. Jwalakwe chiŵakamuchisye abaleŵa kuti apilile yakusawusya mwakusangalala.—1 Akolinto 10:13.