Chilambo cha United States soni yilambo yine 30 ya ku Europe yijamwiche mwamachili mnope chilambo cha Russia ligongo lya ngalwe soni kwalagasya Abale ni alongo ŵetu ku Russia. Chilambo cha Russiachi achijamwiche pa msongano wine wawatendekwe pa Julayi 23, 2020. Msonganowu ŵatendesye ŵa bungwe jakulola ya chiteteyo soni kuti yilambo yitamaje mwakamulana ku Europe (Organization for Security and Co-operation in Europe OSCE). *

Pakuŵecheta kwa achakulungwakulungwa ŵaŵayiche ku msonganowu, jwamkulungwa jwakusajikamuchisya bungweji pangani sya ndale Ms.  Lane Darnell Bahl, ŵatite, “Chilambo cha United States soni yilambo yine yejinji yiŵechete soni chiyipitilisye kuŵecheta pa ngani syakutenda ŵa boma ja Russia pakutenda chipikisheni m’nyumba sya ŵa Mboni, kwataŵa, kwalamula kuti akatame mu ukayidi kwa yaka 6 soni kwalagasya.”

Achakulungwakulungwaŵa, ŵadandawilesoni ni ngani jajipikaniche pachangakaŵapa kuti achakulungwa ŵane mu dela ja Voronezh atesile chipikisheni nyumba syakupunda 100 sya ŵa Mboni sya Yehofa. Ms. Bahl. ŵasasilesoni kuti, “Yajikutenda boma ja Russia pakwalagasya mnope ŵandu ŵa mu dini jajikusatenda yindu mwa mtendele, yili yakutesya chanasa.

Jwaŵili kwa mlongola juŵachijimilaga chilambo cha United Kingdom (UK) pa msonganowu, Ms. Nicola Murray, adandawilesoni kuti “kutupa kwa ngani syakuti achakulungwa ŵa ku Russia akutenda yipikisheni soni kasa nyumba, kukwamba kulosya kuti bomaji jilinganyisye mwa mele yakuti jilagasye ŵa Mboni sya Yehofa.” Ms. Murray ŵapitilisye kuŵecheta kuti: “Achakulungwakulungwa ŵa boma ja Russia akutenda yipikisheni soni kwalagasya ŵa Mboni paligongo lyakuti akutenda yindu yakwayana ni dini jawo mwakutamilichika.”

Konjechesya pelepa, Ms. Bahl akanile yaŵechete achakulungwakulungwa ŵa mu dela ja Voronezh, pakusala kuti ŵa Mboni ŵasimene ŵakulemwa pa ngani jakuti “akutenda yindu yakogoya.” Mwakamulana ni achakulungwaŵa, akuti yeleyi yikupwatikapo kusunga malipoti soni yikalata yine mu mafoni gawo, kuŵa mtumagulu soni kamulichisyaga masengo mapologalamu ga pakompyuta pakutenda misongano ja mpingo. Ms. Bahl asasile kuti yajikutenda boma ja Russia yili “yangapikanika soni yakutesya chanasa.” Mayiŵa ŵatite, “Une ngusatendaga nawo yakuyisala kuti “yakogoyayi” lisiku lililyose.” Mayiŵa ŵasasile mwangapita mumbali kuti ŵakwimila boma ja Russia ŵaŵatesile nawo msongawo mwakulumbikana kupitila m’makumpyuta, nikuti nombe nawo “ali ŵakulemwa ligongo akutenda yakogoya.”

Mu chikalata * chele chalembedwe ni yilambo, 27 yayili mu mkamulano wa yilambo ya ku Europe (European Union (EU), yalumo ni yilambo yine 8 yanganiŵa mu mkamulano wa yilamboyi, ŵasasilemo kuti, “Tupikene ŵakwimila boma ja Russia ali mkuŵecheta kejinji pamsongano uno kuti ŵa Mboni sya Yehofa akupopela mwagopoka soni chapitilisye kutenda yeleyi, soni kuti chilambo cha Russia chikusichapa ŵandu ŵakwe ufulu ŵakupopela. Nambope, tukupitilisya kupikana ngani syakwakasila nyumba ŵa Mboniŵa, kwataŵa, soni kwapatila magambo. Yakutendayi yili yakulekangana ni yakutusalila ŵakwimila boma ja Russia.”

Ŵakwimila bungwe ja EU ŵatite, “Ŵandu wosope ni ŵa Mboni ŵakwe, akusosekwa kola ufulu kupwatikapo ufulu wakupopela, ufulu ŵakwinjila mu bungwe jakusaka, kusonganaga mwa mtendele, ufulu ŵakuŵecheta, soni yeleyi yitendekweje mwangali lusagu mwakamulana ni yayili mu malamusi ga boma ja Russia [soni] malamusi ga bungwe jakulola ya chiteteyo soni kuti yilambo yitamaje mwakamulana ku Europe (OSCE) gele boma ja Russia jajitichisyesye kuti chijikuyeje.”

Murray ŵamalisisye mwakujiŵenda boma ja Russia kuti jileche kwalagasya ŵa Mboni sya Yehofa.

Bahl ŵasasile kuti boma ja Russia: (1) jileche kwapatila magambo ŵa Mboni sya Yehofa, (2) Jiwuchisye ma ofesi gele jasumwile ŵa Mboni sya Yehofa ku Russia, soni (3) mwachitema jagopole ŵa Mboni wosope ŵali mu ukayidi.

Kelekatu nganikaŵa kandanda yilambo yine kujijamuka boma ja Russia ligongo lyakwalagasya abale ŵetu. Yajikutenda boma ja Russia, ŵandu akuyiwona. Kupwatika pelepa yilambo yine nombe nayo yikumanyilila chenene ngalwe syajikutenda boma ja Russia pakwalagasya abale ni alongo ŵetu. Chakupunda yosope, ngatukukayichila kuti nombe najo Yehofa akuyiwona yiyikwatendechela abale ni alongo ŵetu ku Russia. (Salimo 37:18) Ngatukukayichila kuti Atati ŵetu ŵachinonyeloŵa chiŵape majali abaleŵa ligongo lya kulupichika, kulimba mtima soni kupilila kwawo.—Salimo 37:5, 28, 34.