Pa 12 Malichi, 2020, achakulungwakulungwa ŵa m’yilambo ya ku Europe yakupunda 30 ŵajijamwiche Boma ja Russia ligongo lyakwatendela ngasa abale ni alongo ŵetu ku Russiako. Boma ja Russia jeleji wajijamwiche pa msongano wajaŵilasisye bungwe jine ja ku Europe (Organization for Security and Co-operation in Europe.) Bungweji jikwete machili gakuchenjela ufulu wa ŵandu.

Paŵaŵechetaga pa msongawu, achakulungwalungwa ŵa m’yilambo 27 ya m’bungwe ja European Union (EU) pampepe ni ŵane ŵa m’yilambo 6 yanganiyiŵa mu bungweji, ŵasasile kuti, “Bungwe ja European Union jikudandawula mnope ni yajikutenda boma ja Russia pakupitilisya kulagasya ŵa Mboni sya Yehofa. Boma ja Russia jikwalagasya ŵa Mboni sya Yehofa mwakutenda yipikicheni m’nyumba syawo, kwataŵa pali pangali magongo gakupikanika, kwawungunya kuti ŵapate magongo gakwajimbila magambo, atamosesoni kwapa chilango chakuti akakamule ukayidi yaka 7. Kupwatika pelepa, tukudandawulasoni mnope ni malipoti gane gatugambile kupochela kwene gakulosya ngasa syakwatenda ŵa Mboni sya Yehofa mkanaŵe kwaŵika m’nyumba syakunjila akayidi.”

Pakuŵecheta pamsongano wajatendesye bungweji, Che Neli Bush ŵali ŵakukwimila chilambo cha United Kingdom m’bungweji, ŵasasile kuti, “Yalyatesile luŵala lwamagambo lyekulungwa ku Russia mu Julayi 2017, pakwitichisya yalwalamwile luŵala lwine lwamagambo yakuti ŵa Mboni sya Yehofa ali kagulu kakwimuchila, yitendekasisye kuti kuŵe kulemwa kulambila Mlungu kwa ŵa Mboni sya Yehofa ŵakwana 175,000 m’chilambo cha Russia. Boma ja Russia jikasile malamusi ga m’chilambo chawo soni malamusi gane ga m’bungwe jetu gagakusasala kuti mundu akwete ufulu wakulambila. Che Bush ŵasasilesoni kuti, “Kutandila paŵalamwile ŵa Mboniŵa kuti ali ŵakwimuchila boma, tukuweni kutupa kwa ŵa Mboni ŵakwataŵa soni kwajimba magambo m’chilambo cha Russia. Myoyo mwakamulana ni bungwe ja OSCE m’wejisoni tukudandawula mnope ni yindu yangali chilungamo soni yangasa yakwatendela ŵa Mboni sya Yehofaŵa.”

Ngani jine jaŵasasile achakulungwakulungwa ŵa mu bungweji, jatendekwe pa 6 Febuluwale, 2020. Nganiji jaliji jakwamba kuputidwa kwa ŵa Mboni ŵakwana 5. Ŵakwalolela akayidi pandende jine ku Russia, (Russia’s Penal Colony No. 1) ŵaputile soni kwawulasya abale ŵakuyichisyaŵa; Aleksey Budenchuk, Gennadiy German, Roman Gridasov, Feliks Makhammadiyev, soni M’bale Aleksey Miretskiy. Ŵakwimila bungwe ja European Union ŵasasile kuti, “Wosopeŵa ŵawulele mnope soni jumo [Feliks Makhammadiyev] jwasosekwaga kumgoneka m’chipatala. Kupwatika pelepa, pa 10 Febuluwale, 2020, Vadim Kutsenko ŵamputile mnope soni kumlagasya mkanaŵe kumjimba magambo. Ŵapolisi ŵamputile soni kumjocha ni moto wa magesi, kwineku ali mkumkanganichisya kuti asale yakwamba ŵa Mboni ŵane.”

Ŵakwimila bungwe ja European Union, ŵasasilesoni kuti “kumlagasya mundu soni kumtendelangasa, kuli kasa ufulu wa ŵandu soni kuli kulepela kumanyilila kuti mundu jwalijose akusasosekwa kum’chimbichisya. Yindu yosope yachikutenda chilambo cha Russia pakwalagasya soni kwatendela ngasa ŵandu, kuli kasa lilamusi lya pachilambo chosope lyalikusalimbikasya ufulu wa ŵandu.”

Konjechesa pelepa, achakulungwakulungwa ŵa ku Europe ŵeleŵa ŵayiweni kuti ngasa syakwatendela ŵa Mboni sya Yehofa ku Russia, sikulosya kuti chilambochi chikulepela kukuya yindu yachajitichisye, yakuti abale ni alongo ŵetuŵa akwete ufulu wakutenda ya dini m’chilambocho.

Ŵakwimila bungwe ja European Union ŵasasile kuti, “Pa 20 Epulo, 2017, luŵala lwamagambo lwekulungwa mnope ku Russia lwalekasisye masengo ga ofesi jekulungwa jakulolela masengo ga Mboni sya Yehofa ku Russsia kupwatikasoni masengo gane ga Mboni sya Yehofa m’chilambochi. Luŵalalu lwalamwile yeleyi ligongo lyakuti ŵa Mboniŵa ali ‘ŵakwimuchila boma.’ Panyuma pa yeleyi, tuŵele tuli mkwapikana ŵakwimila chilambo cha Russia ali mkuŵecheta peswela kuti ŵa Mboni sya Yehofa akwete ufulu soni chapitilisye kola ufulu wakutenda ya dini soni kuti ufulu wakulambila upali m’chilambocho. Nambope, tukupitilisya kupikana yindu yejinji yakwamba kulagasidwa kwa ŵa Mboniŵa. Yindu yakwe yili mpela, kutenda chipikicheni m’nyumba syawo, kŵataŵa pali pangali magongo gakupikanika soni kwapatila magango gakwajimbila magambo.”

Achakulungwakulungwa ŵa European Union, ŵasasile kuti “kutandila pandaŵi jawugele dini ja Mboni sya Yehofa ku Russia, tupochele malipoti gakuti nyumba 869 sya ŵa Mboni asitesile chipikicheni, ŵandu 26 ŵataŵile mkanaŵe kwajimba magambo, ŵandu 23 ali pa ukayidi wa panyumba, ŵandu 316 ajimbidwe magambo gawo, soni ŵandu 29 ŵasimene kuti ali ŵakulemwa.”

Che Bush ŵatite, “Yeleyi yikulosya kuti naga ŵa Mboni sya Yehofa chajendelechele kutenda yindu yakwayana ni dini jawo, nikuti yipikicheni m’misinda chiyitupe, mwamti mwine mpaka yitendekweje kejinji palisiku. Yeleyi yikukulosa kuti chilambochi chichikamulichisyeje masengo litalali pakwalagasya ŵa Mboni sya Yehofa.

Nombe ŵalijiganye ya ufulu wa dini ngakukamulana ni yindu yakwatendela abale ŵetu ku Russia. Pakutajila ndemanga yaŵaŵechete ŵakwimila bungwe ja European Union, Loya jwine jwa ku Austrian, Dr. Gudrun Kugler jwatite, “Kutandila paŵalekasisye masengo ga ŵa Mboni sya Yehofa mu Epulo 2017, yindu yiŵele yili mkusakalape. . . Yikuwoneka kuti boma ja Russia jikukamulisya masengo lilamusi line lyelye chakulinga chakwe chili kumalana ni ŵandu ŵakwimuchila. Mwakamulana ni mabungwe gakuwona ya ufulu wa ŵandu, akusaliwona lilamusili kuŵa lyangapikanika chenene. Ku Russia mundu akusajimbidwa magambo pagambile kumanyikwa kuti ali jwa Mboni sya Yehofa soni atamose pamsimene jwa Mboni ali mkutenda yiliyose yakwana ni dini . . . Yindu yangasa yakwatenda ŵa Mboni sya Yehofa soni ŵa dini sine ku Russia yikusosekwa yimale.”

Ŵakwimila bungwe ja EU ŵasasile kuti chilambo cha Russia soni wosope ŵali mu bungwe ja OSCE “akusosekwa kutenda yakomboleka kuti amasye kwalagasya ŵandu kwa mtundu wuliwose, kwajimba magambo wosope ŵakutenda ngalwesi soni kulolelechesya kuti ŵatendeledwe ngalwe apochele chikamuchisyo mwakwalipila. Myoyo tukuchiŵenda chilambo cha Russia kuti chilolechesye kuti chiwungunyisye chenene soni mwachitema malipoti gatupikenega ni chakulinga chakuti mundu jwalijose jwakutenda yangalweyi apochele chilango.. . .Tukwaŵendasoni achakulungwakulungwa ŵa ku Russia kuti amasye magambo gakwajimba ŵandu mwangali chilungamo soni kwataŵa ligongo lyakuti akutenda yindu pakuya ufulu wawo wa dini. Tukuŵendasoni chilambochi kuti chikuyeje mfundo syachajitichisye pangani ja maufulu ga ŵandu mwakamulana ni yilambo yine, mpela ufulu wakuŵecheta, ufulu wakutenda yindu ni ŵane, kusongana mwamtendele, ufulu wa dini, soni yindu yine.”

Chinga chilambo cha Russia chichikuye yachisalilidweyi kuti chichimbichisyeje ufulu wakwete ŵandu pangani ja dini, chinga ngachikuya, tukumanyilila kuti Yehofa chapitilisye kwakamuchisya abale ni alongo ŵetu ku Russia kuti akombole kupilila mwakuwusimana mtima mpaka chilungamo chisyesyene chili chitendekwe.—Salimo 10:18.