Pakwikaga apano, M’bale Dennis Christensen atemi mwakupilila mu ukayidi kwa yaka yitatu m’chilambo cha Russia. Jwalakwe ŵamtaŵile pali pangali magongo gakupikanika. Kutandila paŵamtaŵile, pa 25 Meyi, 2017, ŵandu ŵane aŵele ali mkumwusya M’bale Christensen kuti yakusawusyayo yikwayiye chamtuli chikulupi chakwe. Ndaŵi syosope jwalakwe akusajanga kuti: “Yeleyi yikamuchisya kuti chikulupi changu chiŵe chakulimba mnope.”

M’bale Christensen jwaŵechete kuti: “Nayiweni kuti yajikusasala Baibulo pa Yakobo 1 ndime ja 2 mpaka 3 yili yisyene. Lilembali likusati, ‘Achalongo achimjangu mŵeje ŵakusengwa pimkusimangana ni yakumlinga yejinji, ligongo mkumanyilila kuti kulinjikwa kwa chikulupi chenu kukusamtendekasya kuŵa ŵakupilila.’”

Kusala yisyene, chikulupi cha M’bale Christensen chiŵele chakulimba mnope. Kupwatika pelepa, jwalakwe akusasangalala atamose kuti akusimana ni yakusawusya soni yakutengusya yejinji.

Ali agambile kumtaŵa kwene, M’bale Christensen ŵamŵisile kumalo gane pakwembecheya kuti amjimbe magambo. Maloga galiji chiŵandika ni kumangwakwe ku Oryol. Pandaŵijo ŵamkwakwe m’baleju lina lyawo Irina ŵakundaga kuja kukumlola m’baleju. M’bale Christensen jwatemi ku malo gelego kwa yaka yiŵili. Nambo mu Febuluwale 2019, ŵamlamwile kuti akatame mu ukayidi kwa yaka 6. Pali pagambile kupita miyesi jitatu ŵakhoti ŵakanile apilo jaŵatesile m’baleju. Myoyo ŵamsamichisye ku ndende jine jajili kwakutalika mnope ni kumangwawo. Kutyochela kumangwawo kuja kwika kumuloga pana makilomita chiŵandika 200 (124 mi). Yeleyi yatendekasisye kuti atalikangane mnope ni ŵamkwakwe ŵala.

Apano chikwanile chaka sano, mwamti m’baleju akwete upile wakuŵenda kuti amkoposye m’ndende. Nambo achakulungwakulungwa akusamkanya kukopoka mu ukayidi atamose kuti jwalakwe alembile yikalata mcheche yakuŵenda kuti amkoposye. Atamose kuti M’bale Christensen asimene ni yakusawusya yosopeyi, jwalakwe ngakuwujila munyuma.

Mwakulinandiya M’bale Christensen jwatite: “Uneji ni ŵamkwangu Irina nganituŵa ŵamlama. Nambo tulijiganyisye kupilila soni kuŵa ŵakusangalala atamose kuti tukusimana ni yakusawusya. Soni chakusosekwa mnope chili chakuti unasi wetu ni Atati ŵetu Yehofa uli wakulimba mnope kupunda kala.”

Tupitilisye kumŵenda Yehofa kuti apitilisye kwakamuchisya abale ni alongo ŵetu ku Russia kuti akombole kuyipilila yakusawusya yakusimana nayo.—Mateyu 5:11, 12.