Kagulu ka achakulungwakulungwa ŵakulola ya ufulu wa ŵandu mu bungwe jajikusalimbikasya kuti yilambo yiŵeje yakamulana (United Nations, UN), kalembile chikalata chachikusala kuti boma ja Russia jakasile lilamusi lyalikusakamula masengo m’yilambo yejinji. Mwakamulana ni chikalatachi, boma ja Russia jataŵile soni kwasunga ŵa Mboni sya Yehofa 18. Yeleyi yiŵele mkutendakwa m’misinda ja m’chilambocho kutandila mu May 2018 mpaka July 2019. Kaguluka kalamwile boma ja Russia kuti jikusosekwa kwagopola mwachitema ŵa Mboni sya Yehofaŵa.

Mbali jandanda ja mfundo sya m’chikalatachi syakopweche pa 15 Meyi, 2020. Soni mbali jakumalisya chijikopoche pachangakaŵapa pa webusayiti ja United Nations.

Keleka kali katatu m’chaka chipitechi pele ŵa UN ŵaŵichile kunyuma Aklistu achimjetu. Pakwamba ya nganisyo syawo syakopwesye pachangakaŵapa, jemanjaji achijamwiche chilambo cha Russia ligongo lyakwatendela ngasa syakogoya ŵa Mboni sya Yehofa.

Paŵasalaga yakwamba yajikutenda boma ja Russia pakamulichisya masengo “machili gawo mwakupundanganya” pakwataŵa ŵa Mboni, ŵa UN ŵasasile kuti, “ŵapolisi ŵa ku Russia nganakola magongo gakupikani gakwetendekasya kwakwatendela ngasa ŵane.” Ŵajonjechesye kuti, “Pangali jwa Mboni sya Yehofa jwaŵasosekwaga kutaŵidwa kapena kumsunga mu ndende kapenasoni kumjimba magambo.”

Kaguluka kakanile yakuti ŵa Mboni sya Yehofa ali ŵakwimuchila boma. Kasasilesoni kuti pangali chakulemwa chaŵatesile abale ni alongoŵa ligongo jemanjaji “ŵagambaga kamulichisya masengo ufulu wawo wakulambila mwamtendele.”

Ŵakulola ya ufulu ŵa ŵanduŵa, ajamwichesoni matala gaŵakamulichisyaga masengo ŵakulamula magambo ŵa m’chilambochi pakwajimba magambo abale ŵetu. Mwachisyasyo, ŵa kotiŵa ŵasunjile alongo ŵetu ŵaŵili m’malo gangaŵajilwa pakwembecheya kuti ŵajimbe magambo. Ŵakulola ya ufuluŵa ŵasasilesoni kuti, lilamusi lyalikusakamula masengo pachilambo chosope likusalosya kuti “mundu akusaŵaga jwakulemwa pa pamjimbile magambo nikusimanikwa kuti ali jwakulemwa.” Ligongo lya yeleyi, alongo ŵetuŵa nganasosekwaga kwataŵa soni kwasunga m’malo gangaŵajilwa kapena kwika nawo ku koti mpela kuti ali yigaŵenga yakogoya.

Ŵakulola ya ufuluŵa ŵajisalile boma ja Russia kuti jimasye magambo gosope gakwamba kwimuchila boma gakwajimba ŵa Mboni ŵakwana 18 soni kuti akusosekwa kwalipila ŵa Mboniwo mwakamulana ni malamusi ga pachilambo chosope. Konjechesya pelepa ŵajiŵendilesoni boma ja Russia kuti “jiwungunyeje chenene soni mwakwanila yayitendekasisye kuti ŵanduŵa alaje ni yindu yangali chilungamoyi” soni kuti “jipeleche chilango chakuŵajilwa kwa jwalijose jwakasile ufulu ŵa Mboni sya Yehofa.”

Jemanjaji ŵasasilesoni kuti ŵa Mboni 18 ŵeleŵa ali “ŵane mwa ŵa Mboni ŵajinji ku Russia ŵataŵidwe, kusunjidwa soni kwimbidwa magambo paligongo lyakuti ŵakamulichisyaga masengo ufulu wawo jwakutenda ya dini.” Welewu uli ufulu wawukusakamula masengo pa chilambo chosope, welesoni chilambo cha Russia chajitichisye kuti chichikuyeje. Myoyo, atamose kuti apano ŵakulola ya ufulu ŵaŵanduŵa ŵasalaga mnope yakwamba abale ni alongo ŵetu 18, jemanjaji ŵasasile kuti yapatileyo “yikukamulasoni masengo kwa wosope ŵakusimana ni yakusawusya mpela yeleyi.”

Yaŵendile ŵakulola ya ufuluŵa, ngayikugopolela kuti yakusawusya yakusimana nayo abale ni alongo ŵetu ku Russia chiyimale, nambo pana chikulupi chakuti yindu chiyichenje. Tukwembeche yachijitende boma ja Russia ni nganiji. Apano, abale ni alongo ŵetu ku Russia akuyipilila yakusawusya yakusimana nayo mwakulimba mtima. Nambo tukumanyilila kuti Atati ŵetu ŵachinonyelo Yehofa chapitilisye kwapa mtendele wa mumtima pakupitilisya kumdalila jwalakwe.—Aloma 15:13.