Pa Juni 7, 2022 Luŵala lwa Magambo Lwakulola ya Ufulu wa Ŵandu ku Europe, lwalamwile a kuti boma ja Russia jili jakulemwa ligongo lyakusilagasya Mboni sya Yehofa. Luŵalalu lwasasilesoni kuti yajatesile boma ja Russia mu 2017 pakulekasya masengo ga Mboni sya Yehofa mchilambomo, kwaliji kulemwa. Luŵalalu lwajonjechesyesoni kuti boma ja Russia jangali machili gakulekasya mabuku soni webusayiti ja Mboni sya Yehofa ja jw.org. Boma ja Russia ŵajilamwilesoni kuti jimasye magambo gosope gajikwajimba ŵa Mboni sya Yehofa soni jagopole ŵa Mboni sya Yehofa ŵali mundende. Konjechesya pelepa Bomaji ŵajilamwilesoni kuti jawuchisye ŵa Mboni sya Yehofa ma ofesi gosope gaŵasumwile, soni kuti japepesye ŵa Mboniŵa ligongo lyakwasumula ma ofesi gawo mwakwapa mbiya syakwana madola 63,684,978 (MK 65,389,633,306). Luŵalalu lwalamwilesoni kuti boma ja Russia jalipile ŵakudandawulawo mbiya syakwana madola 3,682,445.

Kulamulaku, kukumasya magambo gakwana 20 gakutandila mu 2010 mpaka 2019, gagakwakwaya ŵa Mboni sya Yehofa ŵakwimbidwa magambogo ŵakwana 1,400. Kulamulaku kukukwayasoni ŵandu ŵane ŵajinji ŵanganajawusya magambo ku luŵalalu. Luŵalalu lwasasile kuti, Boma ja Russia “jikusosekwa kulolechesya kuti jimasisye magambo gosope gajikwembecheya kwajimba ŵa Mboni sya Yehofa . . . soni kuti jakoposye mundende ŵa Mboni sya Yehofa wosope.” (Maloŵega tugombelechesye mweji.) Kulamulaku kulosisye kuti abale ni alongo ŵetu ku Russia ali ŵangalemwa soni kuti kwaliji kulemwa kwajimbaga magambo ni kwataŵaga ŵandu ŵakupikanila malamusiŵa.

Pakulamula magamboga, Luŵalalu lwakanile yajiŵele jili mkusala boma ja Russia yakuti yakusatenda ŵa Mboni sya Yehofa, yikulupi yawo, mabuku soni webusayiti jawo yikusalimbikasya kwimuchila boma. Alole yine mwa yindu yalwasasile Luŵala lwa magambolu:

• Yitendo ya ŵa Mboni: Luŵalalu lwasasile mwangapita mumbali kuti maluŵala ga magambo ga ku Russia “galepele kupeleka umboni wakulosya kuti yakuŵecheta ya ŵa Mboni soni yakutenda yawo, yikusalimbikasya yachiwawa, uŵengani kapena lusagu.” (§271)

• Chikulupi chakuti ŵa Mboni akusajiganya yisyesyene: “Naga mundu akwalimbikasya ŵane kuti ‘aleche dini’ ja unami mwakwasalila yindu yambone ya mu dini jakwe soni akwalimbikasya kwinjila ‘dini jisyesyene,’ mundujo ngakulemwa naga akutenda yeleyo mwamtendele, soni pelepo nikuti mundujo akutenda yindu mwakamulana ni ufulu wakwete pa dini soni ufulu wakuŵecheta.” (§156)

• Kutajidwa miyasi: “Kukana kupochela miyasi jili mbali ja ufulu wa mundu wakusagula chikamuchisyo chachipatala chakusaka, soni yilambo yakamulene kuti chiyikuyeje lilamusili, lyalilisoni mu malamusi ga boma ja Russia.” (§165)

• Kukana kwinjila usilikali: “Ŵandu ŵaŵakanile kwinjila usilikali ligongo lya yikulupi ya dini, nganakasa lilamusi lililyose lya chilambo cha Russia.” (§169)

• Mabuku getu: “Yakusatenda ŵa Mboni soni ngani syasili m’ma buku gawo yikuwoneka kuŵa yamtendele soni yili yakamulana ni yakusajiganya yayili yangalimbikasya yachiwawa.” (§157)

• JW.ORG: Luŵalalu lwasasilesoni kuti ngani sya pa jw.org syangalimbikasya kwimuchila boma. Naga achakulungwakulungwa ŵa boma ŵayiweni kuti ngakukamulana ni ngani sine sya pa webusayitiji, nikuti akasalile achimsyenewo kuti agambe kutyosya mbali syakusiwona kuŵa syangaŵajilwasyo, mmalo mwakwalekasya ŵandu kuti akakamulichisyaga webusayitiji. (§231 soni §232)

Luŵalalu lulosisye mwangapita mumbali kuti boma ja Russia jatesile yindu mwalusagu soni “ngajitenda yindu mwachilungamo.” (§187) Mwachisyasyo, Luŵalalu lwapatilesoni yindu yine yakuyichisyayi:

• “Chakulinga cha boma ja Russia pakumasya mabungwe gagakusajendesya dini ja Mboni sya Yehofa, chaliji kusaka kwatendekasya ŵa Mboni sya Yehofa kuti aleche dini jawo soni kuti ŵane akajinjila mu diniji, ngaŵaga kuti ŵa Mboni sya Yehofa ŵakasile malamusi ga chilambocho.” (§254)

• Achakulungwakulungwa ŵa boma ja Russia ŵakundaga “kukuya yindu yakulemwecheka” pamagambo. Mwachisyasyo, mmalo mwakuti alole chenene mabuku gakusaŵandisyaga ŵa Mboni, Luŵala Lwekulungwa Mnope ku Russia lwakulupililaga mnope malipoti ga mbali jimo gaŵapelekaga ŵa polisi soni ŵakwimila boma pa magambo. (§203)

• Lilamusi lyakwayana ni kwimuchila boma lyalyakwayaga mnope ŵa Mboni Calipanganyisye mwakalamuka ni chakulinga chakuti liŵe lyangapikanika chenene mwamti lyatendekasyaga achakulungwakulungwa ŵa boma kwatendela yindu yangali chilungamo ŵa Mboni sya Yehofa. (§272)

Ngatukumanyilila kuti yalulamwile Luŵalu chiyakamuchisye mwamtuli ŵandu ŵa ku Russia. Atamose kuti luŵalula lutesile mbali jakwe, nambo m’weji ‘tukwembecheya AMBUJE, ligongo jwalakwe ali jwakutukamuchisya ni jwakutuchenjela.’—Salimo 33:20.