Pa Disemba 23, 2020, luŵala lwa magambo mumsinda wa Kemerovo, lwakanile yakuti M’bale Khasan Kogut atende apilo magambo gakwe. Yeleyi yikulosya kuti yalwalamwile luŵala lwa magambolu pandanda yakuti m’baleju atame pa ukayidi wa panyumba kwa yaka yiŵili ni hafu, chiyitande kukamula masengo. Pandaŵiji jwalakwe chakuyeje malamusi gapochele. Nambo ngasosekwa kwawula kundende.

Atamose kuti m’bale Khasan akudandawula kuti yalulamwile luŵala lwa magambo chiyisakasye mbili jakwe, nambope chachikumlimbikasya chili chakuti akumanyilila kuti Yehofa akusangalala najo ligongo lya kulupichika kwakwe. M’bale Khasan ni ŵamkwakwe lina lyawo Yekaterina, soni mwanache jwawo jwa yaka 8 lina lyakwe Timofey ali ŵakusimichisya kupitilisya kumtumichila Yehofa.

Pa Sepetemba 10, 2020, pakuŵecheta maloŵe gakwe gakumalisya mu luŵala lwa magambo, M’bale Khasan mwakulimba mtima jwatite, “Nguganisya kuti jemanja alamwile yeleyi kuti amboneje kuti ndili jwakulemwa. Nambope nganimba ndesile kuŵa jwakulupichika kwa Yehofa Mlungu jwangu soni kuya yangusakulupilila. Mulimose mwampaka yiŵele yindu paumi wangu, ‘kanga chiwa kapena umi, atamose malayika kapena ŵakulamulila, kapena yindu yayipali sambano jino, kapena yitichiwoneka msogolo muno, yamachili yine yiliyose, kapena yakwinani kapena yapasi pano, kapenasoni kandu kane kalikose kakupanganyidwa, ngasikatulekanganya uwe ni chinonyelo cha Mlungu.’”—Aloma 8:38, 39.