Pa Disemba 18, 2020, luŵala lwa magambo mu msinda wa Khostinskiy ku Sochi lwasasile kuti M’bale Nikolay Kuzichkin soni Vyacheslav Popov ali ŵakulemwa. Luŵalalu lwalamwile kuti M’bale Nikolay akatame ku kundende kwa chaka chimo ni mwesi pele M’bale Vyacheslav kwa chaka chimo ni miyesi 10. Nambo ligongo lyakuti jemanjaji atemi mu ukayidi kwa ndaŵi jelewu kwembecheya kuti ŵajimbe magambo, nikuti ngasosekwasoni kutama kundende. Ligongo lya yeleyi M’bale Vyacheslav juŵamsungaga kwembecheya kumjimba magambo chamgopole pachangakaŵapa. Nambo M’bale Nikolay amkopwesye pa ukayidi wa panyumba.

Nikolay Kuzichkin

• Chaka Chiŵapali: 1951 (Mu msinda wa Kostroma)

• Mbili ja Umi Wakwe: Ali amalisisye majiganyo gakwe gakwimba, jwatandite kukamula masengo gakwimba piyano. Jwalakwe ni ŵamkwakwe Olga akwete ŵanache ŵatatu. Akusamanyililasoni kulanga nyuchi

  Jwatandite kulijiganya Baibulo ni ŵa Mboni sya Yehofa kundanda kwa yaka ya m’ma 1990. Paŵakuweni kukwanilichikwa kwa yakulochesya ya m’Baibulo, yamtendekasisye kuti alipeleche soni kubatisidwa m’chaka cha 1993

Vyacheslav Popov

• Chaka Chiŵapali: 1974 (Mu msinda wa Tomsk)

• Mbili ja Umi Wakwe: Kutandila ali mwanache jwanonyelaga kwambula yindu. Kaneko jwatandite kukamula masengo gakusalalisya soni kulinganya yindu mnyumba kuti yiwonecheje chenene. Ali ku koleji, ŵasimene ni Yuliya juŵaŵele ŵamkwakwe. Jemanjaji ŵalombene mu 1998 mwamti akwete ŵanache ŵatatu. Jumo jwamkongwe, ŵaŵili ŵachalume. Ŵasamile kwawula ku Sochi m’chaka cha 2010. Liŵasali likusanonyela mnope kunguluka pa ayesi soni kwawula kunyasa

  Yuliya ni ŵaŵaliji ŵandanda kulijiganya Baibulo ni ŵa Mboni sya Yehofa. Baba ŵawo ŵa M’bale Vyacheslav ali ajasiche, jwalakwe ŵapataga chilimbikasyo kutyochela m’Baibulo. Mwamti mu 2004 ŵabatisidwe

Pa Okotoba 10, 2019 ligulo, achakulungwakulungwa ŵa kagulu ka asilikali soni ŵane ŵaŵajigele mbwa ŵakopochele mnyumba sya ŵa Mboni sya Yehofa syakwana 36 ku Sochi m’chilambo cha Russia.

Ali akopochele, ŵandu ŵaŵasimene chinga achakulungwa kapena ŵanache ŵasalilaga kuti agone pasi pandaŵi jiŵawungunyaga mnyumba syawo. Jemanjaji ŵasumwile mafoni gawo, matabuleti, makompyuta, mabuku, makope ni yine yejinji. Ŵasalile kuti akasagawonasoni mabuku ga Mboni sya Yehofa. Kaneko ŵamtaŵile M’bale Nikolay Kuzichkin soni M’bale Vyacheslav Popov. Lisiku lyakuyichisya abaleŵa ŵasalile kuti chiŵasunje kwembecheya kwimbidwa magambo.

M’bale Kuzichkin akusalwala yilwele yakulekanganalekangana. Jwalakwe ŵaŵele ali mkuŵenda mwakuwilisyawilisya kwa achakulungwakulungwa ŵa luŵalalu kuti amkunde kwawula kuchipatala nambo nganamkundaga. Jemanjaji ŵatite ulwele wakwe nganiwuŵa “m’gulu ja yilwele yakumtendekasya mundu kuti akasunjidwa mundende.” Kaneko M’bale Nikolay ŵamŵisile mu chipinda mwele mwaliji achikayidi ŵajinji. Ŵane mwa achikayidiŵa ŵakwembaga. Yeleyi yatendekasisye kuti ulwele wa M’bale Nikolay uyiche pakusawusya mnope.

Atamose kuti kuŵichidwa kwa mu ukayidi kwa M’bale Nikolay kwatendekasisye kuti umi wakwe uŵe pangosi, nambope jwalakwe jwatite, “Kuŵichidwa kwangu mu ukayidi kuli mpela ambisile chipangiso chakumulika naga mundu akwete ndamo syambone kapena iyayi.” Mmalo mwakuti aganisyeje ya yakusawusya yakwe, jwalakwe akusamanyika kuti ali mundu jwamtendele, jwakusalingalinga kwakamuchisya achimjakwe ŵakulaga nganisyo soni ŵakwete nganisyo syakusaka kuliwulaga.

M’baleju ali amsunjile kwembecheya kuti amjimbe magambo, ŵachengaga masiku gakuti apikanile magambo gakwega kwakwana maulendo 6. Nambo pa Epulo 22, 2020 ŵamsalile kuti atande ukayidi wa panyumba. M’baleju jwafoweche mnope mwamti jwalepelaga kwima. Yindu payayiche pakusawusya myiyi ni paŵamkundile kuti ajawule kuchipatala.

Masiku gatemi M’bale Vyacheslav mu ukayidi kwembecheya kumjimba magambo, gaŵele ali mkugajonjechesya maulendo gakwana 14. Apano pamasile chaka ali ngakuwonegana ni liŵasa lyakwe.

Tukumyamichila mnope M’bale Nikolay soni Vyacheslav pa yindu yakutenda soni kusachilila kwawo pakuchimbichisya ulamusi wa Yehofa. Jemanjaji akutenda yindu mwakamulana ni yayili pa lilemba lya Salimo 16:8 papakusati, “Ngumanyilila kuti AMBUJE ali ni une ndaŵi syosope, ali chiŵandika ni une nipo pangali champaka chinjogoye une.”