Pa Nofemba 24, 2020, luŵala lwa magambo ku Petropavlovsk-Kamchatskiy lwaluli mumsinda wa Kamchatka lusasile kuti M’bale Sergey Ledenyov ali jwakulemwa. Jwalakwe amlamwile kuti akasimanikwasoni jwakulemwa kwa yaka yiŵili soni kuti chipamale yaka yitatu ali kumlolela ni chakulinga chakuti amloleleje naga ali jwakupikanila malamusi. Yeleyi yikugopolela kuti jwalakwe ngajawula ku ukayidi pandaŵi ajino.

Pa lisiku lyakumalisya kumjimba magambo, jwalakwe jwaŵechete mwakulimba mtima yayikusagopolela kuŵa jwa Mboni sya Yehofa. Jwalakwe jwatite, “Lina lyakuti Yehofa, nganiliŵa lya mundu kanga bungwe kapena dini. Lina lya lyakuti Yehofa lili lina lisyesyene lya Mlungu. Mu Baibulo, m’buku ja jwakulochesya Yesaya, akwakolanga ŵakutumichila ŵakwe ŵakulupichika kuti ‘mboni syakwe.’ Mwakamulana ni maloŵe gelega, pamsongano wawatendekwe mu 1931, twatandite kamulichisya masengo lina lyakuti ‘Mboni sya Yehofa.’ Linali likulosya kuti masengo getu gali gakwakamuchisya ŵane kuti ammanyilile Mlungu jwali Mkupanganya, Mkulupusyo soni Jwakulamulila jwa yindu yakwinani soni yapachilambo chapasi, soni kuti ŵandu amanyilile chakulinga chambone chakwete kwa ŵandu. Uneji soni achimjangu tukulitenda kuti tukwete upile ligongo lyakumanyika ni linali.”—Yesaya 43:10.

Mwakulimba mtima M’bale Sergey jwalusalile luŵala lwa magambo kuti, “Ngangutenda woga, ligongo pangali chandesile chakulosya kuti ndili jwakulemwa. Mtima wangu ukunjitichisya kuti pangali chakulemwa chandesile kwa Mlungu soni kwa mundu panganiji.”