Pa Disemba 21, 2020, luŵala lwa magambo lwa mu msinda wa Leninskiy ku Rostov-on-Don lwalamwile kuti M’bale Semyon Baybak ali jwakulemwa. Luŵalalu lwalamwile kuti m’baleju chaŵe panyumba nambo akuyeje malamusi gapochele kwa yaka yitatu ni hafu. Nambope ngasosekwa kwawula ku kundende.

Paŵamjimbaga magambo, M’bale Semyon jwakamwile maloŵe ga mundu jwine jwakulola ya ufulu wa ŵandu ku Russia. Jwalakwe jwatite, “Jemanja [ŵa Mboni sya Yehofa] ngope syenu sikusaŵa syakusangalala atamose kuti ŵandu akumlagasya.” Ni kaneko M’bale Semyon jwasasile kuti, “Yeleyo yili yisyene. Mwamti ngangudandawula ni yindu yayikundendechelayi.” Kaneko jwaŵalasile lilemba lya 2 Akolinto 4:8, 9 pakukamulanya ni yayikumtendechela jwalakwe soni abale ni alongo ku Russia. Lilembali likusati, “Tukusimana ni yisawusyo yakulekanganalekangana nambo ngaswanyidwa, pane ngamanyilila yakutenda nambo ngajasa mtima. Amagongo akutulagasya, nambo ngatukusoŵa ŵakutukamuchisya. Akutugwichisya pasi, nambo ngatukonasika.”