Pa Januwale 25, 2021, luŵala lwekulungwa lwa magambo lwa Kabardino-Balkarian Republic, lwakanile apilo jaŵatesile achakulungwakulungwa ŵa boma pa chigamulo chachapelechedwe pa Okotoba 7, 2020, chakuti M’bale Yuriy Zalipayev ali jwangalemwa. Achakulungwakulungwaŵa akwete upile wakutendasoni apilo chigamulo cha luŵala lwekulungwalu. Nambope, M’bale Yuriy, jwangali magambo galigose. Pandaŵi ajino, jwalakwe akwete ufulu ŵakupochela chipepeso ligongo lyakumlambuchisya magambo.

Pandaŵi jaŵamjimbaga magamboji, Yuriy jwamdalilaga Yehofa soni jwaliji jwakulimba mtima atamose kuti jwamanyililaga kuti komboleka magamboga kugalawuka ni kumgwila. Chigamulochi mkanichipelechedwe, Yuriy mwakulimba mtima jwalusalile luŵala lwa magambo kuti Mlungu pachangakaŵapa chamasye kusakala kosope, kupwatika kulagasidwa kwakusimana nako Ŵamboni sya Yehofa m’chilambo cha Russia. Jwalakwe jwatite, “Atamose alinganye mapulani gamtuli pakusaka kutulagasya, nambo pana chindu chimo chakusosekwa kumanyilila jemanjaji. Akusaka asokonasye chikulupi chetu pa yindu yasasile Mlungu kuti chamasye kusakala pachilambopa. Nambo mapulani gawo ngagakamula. Ngwete chikulupi chakuti pachangakaŵapa ŵandu ŵamitundu josope chachimanyilila kuti m’weji tuli abale ni alongo. Pangali chilichose champaka chitulekanganye. Baibulo jikusasala kuti, ‘Jwalakwejo tachilamula sikati ja yilambo kumasya kungapikanganana sikati ja ngosyo sya ŵandu. Ŵandu tachisyana mapanga gawo kuti gaŵe majela, nipo soni mipamba jawo kuti jiŵe yipula yakatila nyambi. Mitundu ja ŵandu ngasijijimuchilana ni mawupanga, soni kulijiganya soni kuputa ngondo.’—Yesaya 2:4.

“Ngwete chikulupi chakuti maloŵe gelega chigakwanilichikwe pachangakaŵapa.”