Pa Sepetemba 2, 2020, * luŵala lwa magambo lwa ku Berezovsky lwaluli mu dela wa Kemerovo

Kutama ku ukayidi kwa yaka 6 ni hafu

Sergey Britvin

• Lisiku Lyakupagwa: Ogasiti 18, 1965 (Mu dela ja Kemerovo)

• Mbili ja Umi Wakwe: Kwa yaka yejinji aŵele ali mkamula masengo gakwendesya machine gakunyakulila yindu yakusitopa mnope soni gakwendesya magalimoto gekulungwa. Nambo jwalesile kukamula masengoga ligongo lya yakusawusya ya m’chilu. Apano akusanonyela kutenda maseŵela gakulimbisya chilu

• Ŵalombele mu 1992. Ŵamkwawo lina lyawo lili Natalya. Ŵatandite kulijiganya Baibulo m’chaka cha 1995 panyuma pakuti amanyilile kuti Mlungu chachajimusya ŵawe. Mkupita kwandaŵi, nombe najo Natalya jwatandite kulijiganya Baibulo. Jwalakwe jwatandite kulijiganya ligongo lya chikulupi cha ŵamkwakwe. Ligongo lya chikulupichi, ŵamkwakwewo ŵakombwele kuchenga yindu yejinji paumi wawo

Vadim Levchuk

• Lisiku Lyakupagwa: Febuluwale 6, 1972 (Mu dela ja Kemerovo)

• Mbili ja Umi Wakwe: Jwalakwe jwaleledwe mu liŵasa lyanganonyela ya Mlungu. Jwalakwe jwakamwile masengo ga migodi kwa yaka 14

• M’chaka cha 1992 jwatandite kulijiganya Baibulo. Soni mu 1997 ŵalombele Tatiana. Jemanjaji akwete ŵanache ŵaŵili. Wosope mu liŵasali akusanonyela mnope maloŵe ga Mlungu. Akusanonyelasoni maseŵela gakulimbisya chilu soni kunguluka mmalo gakulekanganalekangana

Pa Julayi 22, 2018, kagulu kane kakulola ya chiteteyo (Federal Security Service) kakasile nyumba syakwana 8 sya abale ni alongo ŵetu mu msinda wa Berezovsky. Yakuyichisya yakwe yaliji yakuti M’bale Britvin soni Levchuk ŵataŵile soni kwawusya yiwusyo yejinji kwandaŵi jelewu. Payatendekwe yeleyi, luŵala lwekulungwa lwa magambo mu dela ja Kemerovo lwalamwile kuti abaleŵa ataŵidwe kwembecheya kwimbidwa magambo. Jemanjaji ŵatemi mu ukayidi chiŵandika chaka ni hafu. Pa Desemba 25, 2019, abaleŵa ŵaŵisile mu ukayidi wa panyumba. Jemanjaji akupitilisyape kutama kweleku mpaka apano.

M’bale Britvin soni Levchuk ali ŵane mwa abale 5 mu dela ja Kemerove ŵakwimbidwa magambo ligongo lyakuti ali ŵa Mboni sya Yehofa. Tukusitwaganichisya soni kwapopelela abale ni alongo ŵetu wosope ŵali mu ukayidi ku Rassia. Lilemba lya Ahebeli 13:3 likusatulimbikasya kuti, “Mwakumbuchileje ŵele ŵali mu ukayidi, nipo mŵe mpela kuti mkulaga nawo yalumo mu ukayidimo. Mwakumbuchileje ŵele ŵakulaga, nipo mŵeje mpela mkulaga nawo yalumo.”