Pa Febuluwale 1, 2021, * luŵala lwa magambo ku Abakan lwaluli mudela ja Khakassia chilulamule magambo ga M’bale Roman Baranovskiy soni mamagwe ŵali Mlongo Valentina Baranovskaya. Ŵakulamula magambo nganaŵe kusala kuti jemanjaji chakatame ku ndende kwa yaka yilingwa.

Roman Baranovskiy

• Chaka chakupagwa: 1974 (Balakovo, Saratov Region)

• Mbili jakwe: Akusakamula masengo gakulinganya nyumba kuti akomboleje kwasamalila mamagwe. Akusanonyelasoni kwimba gitala, ung’asi wakolanjidwa kuti chesi soni mpila

  Paŵaliji jwachinyamata jwasakaga kumanyilila chakulinga cha umi. M’baleju ŵasasile kuti, “Ndaŵi syejinji namŵendaga Mlungu kuti angamuchisye kumanyilila chakulinga cha umi.” Mu 1993, ŵatandite kulijiganya Baibulo ni Mboni sya Yehofa. Kaneko mu 1997 ŵabatisidwe

Valentina Baranovskaya

• Chaka chakupagwa: 1951 (Vannovka, Kazakhstan)

• Mbili jakwe: Aŵele ali mkukamula masengo ku banki soni kwakamuchisya ŵandu pangani sya mbiya, mpaka paŵalesile masengoga mu 2006. Akusanonyela kuteleka yakulya, kulemba nyimbo soni ndakatulo

  Yimpepe ni mwanache jwakwe ŵatandite kulijiganya Baibulo ni Ŵamboni sya Yehofa mu 1995. Ŵasangalele mnope paŵamanyilile kuti Mlungu jwangalambusya. Kaneko ŵabatisidwe mu 1996

Chilo cha pa Epulo 10, 2019, ŵapolisi ŵa mu msinda wa Abakan ŵawungunyisye m’nyumba syakwana mcheche, kupwatikapo ja M’bale Roman Baranovskiy soni ja mamagwe. Ŵapolisiŵa pakutyoka ŵajigele ma Baibulo, mafoni soni yindu yine. Kaneko ŵatandite kumjimba magambo M’bale Roman soni Mlongo Valentina.

M’bale Roman ŵasasile kuti, “Pandaŵi jaŵayiche ŵapolisiŵa, twaliji pamisongano ja mkati mwa wiki. Pandaŵiji twakambilanaga lilemba lya 1 Akolinto 10:13. Lilembali likusatujiganya chindu chine chakusosekwa mnope. Yehofa ngakusatusagulila yakulingwa yampaka tukombole kuyipilila. Jwalakwe ngakusaganisya kuti: ‘Mkwete chikulupi chakulimba, ni m’chikombole kupilila yakulingwayi. Nambo mmwe chikulupi chenu nganichiŵa chakulimba mnope. Myoyo, chinampe yakulingwa yangasawusyayi kuti mpilile.’ Yikaŵe kuti Yehofa akusatenda yeleyi nikuti tukasosekwaga kulidalila. Nambo ndaŵi jilijose mpaka tusimane ni yakulingwa. Nambope mpaka tukombole kupilila naga tukusadalila machili ga Yehofa.”

Mu Julayi 2020, Mlongo Valentina ŵalwasile ulwele wa kuwa yiŵalo. Mlongoju ŵatite, “Ulwele wangu pawakulaga mnope, ni panayiwonagasoni kuti Yehofa akungamuchisya mnope. Yili myoyo ligongo nganindeka kupopela. Yaliji mpela jwalakwe anyakwile m’makono mwakwe. Ngwete mtendele wa mumtima.”

Yasimene nayo paumi wakweyi yikumtendekasya mlongo Valentina kuŵecheta mwamachili kuti, “Ndili jwakusachilila kumtumichila Yehofa mpaka kalakala atamose ndili simene ni yindu yakusawusya paumi wangu.”

M’bale Roman ŵasasile kuti, kuganichisya yisyasyo ya ŵandu ŵakusiŵasala m’Baibulo soni ŵamasiku agano, ŵele ŵakombwele kupilila yakulingwa, kumkamuchisye kuti alimbisye chikulupi chakwe. Pandaŵi jakuganichisya ya ŵanduŵa, m’baleju akusaliwusya kuti, “Ligongo chichi jemanjaji ŵasosekwaga kupilila? Ana ni yindu yapi yayakamuchisye kuŵape ŵakulupichika kwa Yehofa? Ana Yehofa ŵakamulichisye masengo chamtuli msimu wakwe pakwakamuchisya jemanjaji? Kwanga kwa yiwusyoyi kumkamuchisye m’bale Roman kusimichisya kuti, atamose asimane ni yakusawusya yamtuli, “Yehofa chachimpa machili gakupunda gachipago kuti akombole kupilila.”

Tukumpopelela M’bale Roman, Mlongo Valentina soni abale ni alongo wosope wa ku Russia kuti apitilisye kudalila Yehofa kuti ŵapeje machili.—Salimo 46:1.