Pa Januwale 19, 2021, luŵala lwa magambo lwa mu msinda wa Kemerovo lwakanile yakuti M’bale Sergey Britvin ni Vadim Levchuk atende apilo magambo gawo. Yeleyi yikulosya kuti yalwalamwile luŵala lwandanda yakuti chatame pa ukayidi kwa yaka mcheche chiyitande kukamula masengo. Nambope jemanjaji atemi kwa yaka yakupunda yitatu kundende soni pa ukayidi wangatyoka pa nyumba kwembecheya kwajimba magambo. Yeleyi yikulosya kuti mwine pachichimaleje chaka chimo chiŵakoposye. Atamose kuti akusimana ni yakusawusya, jemanjaji ali ŵakusachilila kupitilisya kuŵa ŵakulupichika.

Paŵajimbaga magambo ku luŵala lwandanda, jemanjaji ŵaŵechete mwakulimba mtima yakwamba chikulupi chawo mwa Yehofa soni umbone wapatile ligongo lya kumtumichila jwalakwe.

M’bale Sergey ŵalusalile luŵala lwa magambo kuti, “Ana chakulinga chawo pakunagasya chili chamtuli? Ana akusaka ndeche yindu yangusayikulupilila? Kukulupilila Yehofa kungamuchisye kuti mbe mundu jwambone soni msika jambone mchilambo cha Russia. Ndili jwakusangalala kuti Yehofa akungamuchisya kuti ngomboleje kulisamalila liŵasa [lyangu]. Ngumyamichila mnope Yehofa kuti umi wangu ukwete chakulinga soni ngwete chembecheyo chambone msogolo. Atamose kuti jemanjaji akulambuchisya kuti ndili jwakulemwa nambo kuŵa paunasi wambone ni Yehofa Mlungu chili chindu chakusosekwa mnope paumi wangu.”

M’bale Vadim jwatite, “Kutandila pandaŵi jiŵandaŵile, mbele ndili mkutenda yindu mwakuwusimana mtima. Yeleyi yitendekwe ligongo lyakuti Yehofa ŵangamuchisyaga mwamti ndili jwakusachilila kupitilisya kuŵa jwakulupichika kwa jwalakwe. Mulimose mwayiŵele pa magamboga, nambope chakusosekwa mnope paumi wangu chili kutenda yakusasaka Mlungu. Mwangasamala kandu kuti ndili ku ndende, chimbitilisyepe kola ndamo syasikusamsangalasya Mlungu mpela chinonyelo, kusangalala, mtendele, kuwusimana mtima, chikulupi, umbone mtima soni kulilekasya.”