Pa Nofemba 24, 2020, * luŵala lwa magambo ku Petropavlovsk-Kamchatskiy lwaluli mu dela ja Kamchatka, chilulamule magambo ga M’bale Sergey Ledenyov. M’baleju mpaka atame mu ukayidi kwa yaka 6.

Sergey Ledenyov

• Chaka chakupagwa: 1974 (ku Ossora, mu Chigawo cha Kamchatka)

• Mbili jakwe: Apali ŵanache 6 mu liŵasa mwawo. Jwalakwe akusanonyela kulemba soni kwambula yiwulili. Akusakamula masengo gakutaŵa nyumba soni kuŵika matayilosi. Pandanda m’baleju jwakwete nganisyo syakuti yajikusasala Baibulo yangakamulanaga ni sayansi. Nambo jwachenjile nganisyosi pandaŵi jaŵalijiganyisye Baibulo ni jwa Mboni sya Yehofa. Jwalombele mu 2017 mwamti ŵamkwakwe lina lyawo ali Anna. Ŵamkwakweŵa ŵaŵechete kuti kukamulichisya masengo yajikusasala Baibulo, kukamuchisye kuti ŵamkwangu aŵe ŵakusimana mtima soni ŵachinonyelo.

Pa Disemba 2, 2018, gulu ja ŵapolisi jajajigele uti soni kuwala masiki jajinjile mnyumba ja M’bale Ledenyov ku Petropavlovsk-Kamchatskiy. Jemanjaji ŵamtaŵile soni kumsalila kuti ali jwakulemwa mwakamulana ni Atiko 282.2 ja chilambo cha Russia. Magamboga gatandite pa Nofemba 28, 2019.

Pa Disemba 12, 2019, luŵala lwa magambo ku Petropavlovsk-Kamchatskiy lwaluli mu dela ja Kamchatka lwawuchisye nganiji kwa jwakwimila boma pa magambo. Yeleyi ndaŵi syejinji yikusatendekwa naga luŵala lwa magambo lupatile yakusawusya yine yekulungwa mpela kusoŵa kwa maumboni ga nganijo. Nambo pa Febuluwale 4, 2020, luŵala lwekulungwa lwa magambo lwachenjile yalwalamwile luŵala lwine lula, mwamti lwagatandite magambo gala. Panyuma pamagamboga, achakulungwakulungwa ŵajigele ŵamkwawo ŵa m’baleju soni mlongo jwine ni kutanda kwawusya yiwusyo. Chakulinga chawo chaliji chakuti ŵakanganichisye ŵanduŵa kuti apeleche umboni waunami pakumsisya M’bale Ledenyov. Nambo Mlongo Ledenyov soni mlongo jwineju, ŵakanile kutenda yeleyi.

Ŵachibale ŵa m’baleju ŵanganaŵa ŵa Mboni ngakupikanichisya ligongo lyakwe jwalakwe akumlagasya ligongo lya yindu yakusakulupililaga.

Kwende tumpopelele M’bale ni Mlongo Ledenyov pakwembecheya kupikana yakuyichisya ya magambo gawo. Tukukulupilila kuti msimu wa Yehofa chiwakamuchisye kuti aŵe ŵakulimba mtima.—1 Petulo 4:14.